男男路: 圍繞身邊已六百天
圍繞身邊已六百天
沒有委託的日子，對阿超而言是日常，雖然Michelle很努力的宣傳，但這模式的生意的確沒有很多人會接受。而為了維持生計，忍無可忍的Michelle終於狠狠的訓示了她的老闆──阿超一番。
「老闆，你可唔可以積極啲去搲生意同埋做委託啊？咁耐都無啲似樣嘅委託，無飯開喇。我唔理，你今日唔揾單似樣嘅生意返嚟，我劈炮唔撈喇！」Michelle這次格外認真，阿超都心知不妙，奈何生意不是說有便有。
「我親愛嘅秘書，你唔好唔撈呀，我靠哂你㗎啦，但啲生意真係唔係話有就有，我都唔想㗎……」阿超故意裝出可憐的樣子，以淚汪汪的雙眼哀求。
「哦？真係咁想我繼續做？」Michelle收起認真的樣子，取而代之的是陰險的面容，阿超看到已經心知不妙，但亦已經騎虎難下，只好點頭示意。
「咁好啦，既然無job，咁你出去炒散做parttime啦。」Michelle說，明顯她是早有預謀。
「咁……」阿超內心十分抗拒，但又不能拒絕，所以一時之間不知如何應對。
此時Michelle拿出電話，向阿超展示一篇招聘文章，內容大概是一艘郵輪招聘大量一次性的員工，工作日期是明天，為期兩日一夜，薪金兩萬元起，而工作崗位分別有清潔、侍應、廚師、水手、服務員等等。
「嗱，擺明係筍工先叫你做啦！」Michelle神氣的說。
「筍係筍，但你唔覺得真係太筍咩？有無伏㗎？同埋點解係一次性？好怪喎……」阿超大惑不解。
「我上網睇過，零負評，而且揾到資料證明呢間公司真係存在，無問題嘅，而且老闆你咁醒，識執生㗎啦，點會有事呢？」Michelle伶牙俐齒，阿超無從反駁。
如是者，阿超便去應徵，而且順利獲聘，即時收到前期工資一萬元，並將在明天登上這艘郵輪，成為其中一名清潔部員工，開始這兩日一夜海上打工之旅。
「我聽日就上船，公司交畀你睇住先啦。」阿超一面收拾行李，一面對Michelle說。
「係係係，平時都係我一個睇住㗎啦，都無咩分別。」Michelle特意把聲線提高，話中帶刺。
阿超不好意思的說︰「我都知你辛苦，所以我咪聽你話去打工囉，公司真係唔可以無咗你㗎。」
「哼！」Michelle故作生氣道︰「你知唔可以無咗我啦咩？」
活了多世、通曉人情世故的阿超一聽這句便知語帶相關，但總不能否認她的確在公在私也對自己幫助很大，所以他擠出燦爛的笑容說︰「梗係啦，你先係大佬，我會畀心機做好呢份工。」
「咁就乖啦，順便講聲你知，啱啱喺你interview嗰時我接左個job，內容係扮衰人，等委託人可以英雄救美。」Michelle冷冷的說︰「衰人你做開，所以問題不大，時間係今晚十一點，地點轉頭send畀你，錢都收左，要做得好好睇睇。」
「咁趕？我驚做得唔好，而且我聽日就上船，今日應該要好好休息吓……」阿超嘗試拒絕。
「噢！咁我只好同個client講老闆唔接，打爛個金漆招牌，賠返double訂畀佢啦。」Michelle再次提高聲線說。
「咁又唔好，我做我做，品牌形像好重要嘅，點可以隨便打爛佢呢？」阿超只能無奈答應，Michelle再勝一仗。
晚上十一時，阿超根據指示，去到客人指定的地點──一間屋村糖水店，由於快要打烊，店內並沒有客人，員工也只有兩位，一位在店面，另一位在廚房。
阿超坐下，點了一碗楊枝甘露，不消兩分鐘便送上，此時阿超要開始工作了。
「唔該。」阿超接過糖水，往女侍應胸前一看，還特地碰了一下她的手，然後調戲道︰「咦？隻手幾滑喎，平時搽開啲咩？」
女侍應嚇得立即縮手，匆忙逃回廚房，幸料阿超一把抓住她的手，繼續調戲︰「Katherine，唔駛趕住走喎，都無客，坐低陪我食埋個糖水，順便傾吓偈。」
「喂，你唔好搞事喎，我糖水姊唔係好恰㗎，你會後悔。」廚房內的女工怒吼。
這位女工無論造型、樣貌、語氣和聲線都與「飯堂靚姑」有得媲美，但阿超一於很少理，因為今天他的人設是流氓，所以要賤到尾，直到委託人出現，並英雄救美。
「嘩！我先唔信，飯堂靚姑你收聲啦！而家我同呢位靚女傾緊偈，你繼續洗碗啦！」阿超相信他扮得越壞，越能襯托出委託人的好，英雄救美的計劃便越成功。因此他一不做，二不休，走過去拉着Katherine的手強行拖走，此時有一隻強而有力的手抓住阿超，阿超心想︰「英雄終於出現，我終於可以收工。」幸料當他轉頭一看時，發覺竟然是飯堂靚姑，他心裡頓時罵聲四起。
「好，既然要扮衰人，咁就做得徹底啲。」阿超心想，然後用力一甩，飯堂靚姑便飛撞到牆上，Katherine立即上前查看，而阿超也在心裡為這一個舉動道歉了上萬次。
與此同時，一把男聲從店外傳入來，而且越來越近，越來越大聲︰「Pat，你有無事呀？你呢個大男人竟然喺度蝦女人，有無搞錯？」
此人正是委託人潘先生，他一把推開阿超，雙眼充滿愛意的上前關心飯堂靚姑Pat，然後再轉身指着阿超破口大罵︰「你呢條粉腸，竟然傷害我最愛嘅Pat，我唔教訓你我唔姓潘！」
說完更裝腔作勢，舉起拳頭準備好開戰，雖然他口裡說得好聽，動作也配合得宜，但雙眼卻不斷向阿超打眼色，阿超當然識相，拋下一句︰「對唔住大佬！」便落荒而逃，不過卻在門前再次被潘先生拉着。
「大佬，做咩事呀？」阿超裝作驚慌之餘，更多的是真的不知潘先生拉着他的意圖。
只見潘先生指了那碗楊枝甘露一下，然後攤出手掌對着阿超，他便立即意會到是什麼一回事，於是快快的從口袋裡拿出數十元交給潘先生，然後便跑走了。
至此戲便演完了，阿超到了約定的地點等待潘先生的到來，整件事大概都依阿超所想發展，要說有什麼意外的話，便是女主角竟然是飯堂靚姑Pat，而不是樣子清秀的Katherine，但口味的事各有所好，也管不了別人，一想到自己今世想愛的人是男人，更覺得自己無資格評論其他人。
不知過了多久，潘先生終於來了，他對阿超的表現讚不絕口，開口第一句便是讚賞︰「你演得實在太好喇，好彩有你喳！我暗戀咗佢好耐㗎啦，一直都唔敢表白。之前好幾次想開口，但又覺得差咁啲開場白咁，最後諗到呢個方法，雖然老套啲，但好彩佢都受，真係唔該哂你呀！」
「份內事嚟啫，接得你單job就一定會做好，呢個係我哋嘅服務宗旨。」阿超自豪的說。
「呢度係尾數，你點點，另外仲有啱啱嘅糖水錢。」潘先生充滿誠意的雙手奉上金錢，阿超確認數目正確便說︰「下次再有啲咩需要幫都可以揾我哋。」之後便離開了。
在回去的路上，阿超回想這次委託，得出一個結論︰無論對方長得怎樣，愛都會跨越一切，並且要有一些經歷才能拉近兩人的距離。
「不過具體要點做就之後再算喇，聽日上船有排做，今晚都係早啲抖好過。」阿超自言自語，然後踏着輕快的腳步回公司去了。