【愛情】關於我一覺瞓醒發現喺初戀屋企⋯！: 122. 大危機

「好呀，今日麻煩你送我過嚟啦～」知珩微笑道，然後同我揮揮手，「番工見～」

「番工見！」我點一點頭，再望多浩宜一眼

「下次見～」浩宜嘅回答令我愕然，所以係有下次

我轉身走嘅一刻，餘光見到知珩拉住浩宜，湊近到佢嘅耳邊細聲講嘢，唔知道佢同浩宜講咩呢⋯

我擰轉頭回望一眼，咁啱又同浩宜對上視線，佢微微側一側頭，然後對我揮揮手





我覺得我都唔會冇機會⋯我希望佢唔係比緊啲假希望我⋯

⋯

⋯

⋯

同浩宜食完飯番嚟都已經10點幾，今日仲要番完工，好想番到屋企即刻沖涼灘低





我推開屋企門嘅時候，第一眼見到嘅係坐喺餐枱前嘅阿立

「番嚟啦？」阿立抬頭望過嚟

我知道佢今日都係等緊我番嚟所以坐喺可以望到門口，同時又最近門口嘅位置

每次番到嚟打開門，見到佢坐喺呢度等我番嚟，我都覺得好感恩，我係有幾幸運先可以遇到佢？

「番嚟啦～」我企喺門口除鞋，換上拖鞋，喺佢行過嚟嘅時候，我伸手攬住佢補充一下能量





「今日食飯點呀？」佢將我嘅袋拎落嚟掛喺門邊嘅掛勾上

「冇呀～就係陪浩宜食下飯，同佢傾下計，順便比卓卓拉下好感度～」我即刻同阿立分享

阿立默默咁聽住我講，我拉住佢講幾耐佢就聽足幾耐，會比充足嘅反應，唔會敷衍我、隨便答兩句就算

「今日同浩宜番嚟嘅時候經過婚紗店，就順便一齊討論咗一陣婚紗～」我自然咁提起食完飯行街嘅事，「佢擺喺櫥窗嗰件好靚！好似公主裙！」

「唔⋯半年，半年內，得唔得？」阿立開口嘅時候，神情忽然間變得特別認真

「我唔係呢個意思啦～我只係分享比你聽我見到覺得靚嘅嘢～」我笑住搖頭

我本來嘅意思唔係要暗示佢要求婚，我只係單純咁想分享下，我本來都唔急住要結婚，亦冇覺得宜家咁樣唔好，佢比嘅安全感比得好充足，我唔會擔心太多

「呢個唔係遲早嘅事咩？我係朝住呢件事去㗎！」阿立更認真咁講，「我計過㗎啦，你想去旅行嘅話都夠錢去，婚禮又好、婚紗都好都足夠，半年內一定可以啦。」





我一直都冇好認真咁諗過結婚呢個問題，感覺對我嚟講好遙遠，身邊有啲同學都已經結咗婚，反而我好似冇咩太長遠嘅想法；不過阿立好認真咁諗好咗，我心入面覺得好踏實，有佢好多嘢都唔洗煩咁多

「你咁快諗晒啦？」我放鬆自己成個人，由得自己跌入佢嘅懷中，耳仔靠喺佢嘅胸膛上，聽住整齊規律嘅心跳聲，「搞到我好似咩都冇諗過咁樣⋯我覺得可以一直同你一齊就足夠，我冇覺得要急住將自己嫁出去⋯但你諗晒嘅話，我都冇嘢好做啦⋯」

「有呀，諗下之後想點影結婚相、想著咩婚紗、想唔想擺酒、想去邊度渡蜜月、以後屋企點裝修⋯唔係好多嘢比你諗咩？」阿立攬住我搖嚟搖去，搖去左邊講一樣，搖去右邊又講一樣，「點會冇嘢諗？」

「唔⋯婚紗我諗好㗎啦！不過可能到時睇多幾款又會三心兩意⋯」我笑道，心入面覺得好甜，「你要我諗嗰啲，好似都係啲我點樣令自己靚同開心嘅嘢⋯」

「你靚同開心先係最重要，你開心我就開心啦～」阿立咁樣一講，我就更加忍唔住覺得自己好幸福

「咁好啦～你唔會反悔㗎可？」我扁起嘴問佢

「唔會啦，人生大事嘅嘢，認定咗就唔改啦。」阿立無奈咁搖頭，「你唔係要去沖涼啦咩？」





「係！」我坐好起嚟，然後起身跑番房，「咁我去沖涼啦！」

我冇猶疑太多，我諗我喺同番佢一齊嘅時候，我都做好心理準備會同佢結婚，所以我冇太多嘅考慮⋯

原來我都到咗要諗結婚嘅年紀，忽然間有啲期待自己著婚紗出嫁嘅日子，帶住所有人嘅祝福同自己愛嘅人一齊，堅決咁同佢一齊行餘生嘅路

「期待⋯都期待嘅～」我熟練咁將散落嚟嘅頭髮梳成髮髻，偷偷地幻想一下自己以後著婚紗嘅模樣

我沖完涼出嚟，輕手輕腳咁行到阿立嘅房門口，宜家通常都一定會有一間房空咗出嚟，我企喺門口從門縫偷望入去，阿立坐喺電腦前面悠悠閒咁睇緊YouTube

我輕輕力將房門推開，放輕腳步行到佢嘅身後，突襲佢一樣伸手從後攬住佢

「聽到廁所閂燈嘅聲，估到你啦～」阿立嘅手搭喺我嘅手背上，指尖輕輕掃過我嘅無名指

遲早一日，我同佢會喺無名指戴上同對方同款嘅婚戒，呢一日，我忽然希望快啲嚟⋯





⋯

⋯

⋯

最近，浩宜成日都嚟cafe，好常可以見到佢嘅身影，唔知道今日會唔會見到佢⋯

「叮鈴鈴鈴～」

我推開cafe嘅門，今日我番晏，所以去到人地食完lunch嘅時間先番嚟

「呀，你番嚟啦？仲以為你今日唔番工添～」浩宜坐正喺對住水吧嘅吧枱前回頭望我





「唔、唔係呀，我番呀⋯」我即刻窒咗一窒

點解次次見到佢都會咁，見到佢坐喺吧枱前嘅瞬間，我已經忍唔住微笑

「你嚇親人。」知珩企喺咖啡機前面，咖啡機出緊蒸氣，「仲唔番去，夠鍾番工啦。」

我聽到之後加快腳步行入休息室，圍裙都未著好就行出去水吧，企喺水吧先繫番好圍裙

「未走呀，今日晏少少先番去，Hea多陣先。」我擰轉頭見到浩宜托住下巴望向我，佢係唔係知道我聽到所以特登講比我聽

「你今日唔忙？唔洗準時番去做嘢？」我順口一樣問道，順便拎起水吧嘅抹枱布抹一抹枱上嘅水漬

「你想我快啲番去？」浩宜反問我，我愕一愕然，但唔識答佢

「咁⋯你要番工嘛。」我微微一笑回答，心入面嗰句係想見多佢一陣

「我坐多陣番去㗎啦～你唔洗擔心我。」浩宜嘅指尖沿住杯邊掃咗一個圈，然後抬眼望我

「我冇擔心呀⋯」「嗨～我地又見面啦～」

喺同浩宜隔咗一個位嘅位置，一個著住背心嘅女仔行到坐低，係上次問我拎IG嗰個女仔

我有啲慌張，下意識想扮聽唔到然後擰轉頭睇下知珩喺邊，一擰轉頭，知珩同我對望一眼，撐起嘴角對我微笑一下

「我係同你打招呼啦～」著背心嗰個女仔直接伸手對住我揮手，「上次我地見過啦～」




IG Link: https://www.instagram.com/nd_cotttoncandy/?hl=zh-tw