【愛情】關於我一覺瞓醒發現喺初戀屋企⋯！: 121. 危機感
「比人抄牌啦？」沖緊咖啡嘅知珩見我行入水吧，加把口講個笑，「哎呀～」
「哎呀啲咩？」我蹲低喺甜品櫃前執單
「睇下你幾受歡迎，番工都有人抄牌。」知珩笑道
「知珩你番工都成日有人嚟抄你牌㗎⋯」我無奈咁回答，「仲好意思話我⋯」
比起抄我牌，想抄知珩嘅牌嘅人應該仲多，每隔幾日都有人問知珩
「有花生食又何樂而不為？你怕我同浩宜講呀？」知珩望一望我，好似睇穿我嘅想法一樣
「咁⋯又唔係⋯」我冇諗得太清楚，但答完之後就覺得比浩宜知都唔係一件壞事
「我唔會同浩宜講嘅～」知珩望咗我一眼之後笑道
「冇咩所謂⋯」我無奈咁夾起一個果撻放喺甜品碟上面，「講唔講都一樣。」
「唔爭取一下呀？等浩宜有啲危機感唔係好事咩？」知珩將沖好嘅咖啡連同單一齊放喺出單處
危機感⋯如果佢中意我嘅話係幾有用，不過佢話考慮，即係佢未必會咁在意呢啲事；諗深一層，有幾多人考慮完之後係真係有結果？
「最近都唔知咩事，搞到好似我好受歡迎咁⋯」我帶住不解嘅感覺無奈笑道
「受歡迎嘅人都唔會發現自己受歡迎。」知珩笑道，「我地不嬲都話你係門面嚟，好有用；浩宜知道嘅話，可能又會再考慮清楚～」
「佢決定啦，我滿足㗎啦～」我笑道，不過我當然係口不對心，點可能真係就咁滿足
口講希望對方幸福就足夠，唔通自己心入面冇諗過最好只有自己可以係比到幸福對方嘅人？帶住感情嘅思緒都係自私
「知珩姐呀⋯有時真係唔羨慕你唔得⋯」我拎住甜品行去相應嘅枱，將甜品放低喺枱上面比客人
「個個淨係識羨慕我⋯」知珩笑住搖頭慨嘆
「浩宜係唔係⋯成日都去酒吧⋯？我見佢好似都好常同佢啲同事一齊去玩⋯」我小心翼翼咁低聲問知珩
「佢？佢只係中意飲酒飲到醉，忘記煩惱啫，自己一個番到屋企又冇咩可以做，難得有人陪佢去玩去飲酒唔係好事咩？」知珩稍微思考咗一陣之後答我，我覺得知珩唔會講大話，「你介意佢會去酒吧？」
「都⋯唔係嘅，只係好多時都見佢飲到醉晒咁，所以好奇下。」我只係輕嘆一口氣
「浩宜冇咩情傷，因為通常都係佢飛人；不過佢飲醉咗，有時都係好事，會勇敢啲～」知珩自己講完都忍唔住笑，「有時要決定係唔係姊弟戀，對女仔嚟講都係要考慮清楚嘅事嚟，佢都考慮埋你嗰份㗎～」
「我知啦～」我點點頭
「我今晚又同浩宜約好咗食飯，喺佢公司樓下等佢。」知珩無奈咁聳肩，「搞到我最近都好少同男朋友一齊食飯。」
「你都會覺得要成日見住男朋友？」我有啲意外，可能我一直覺得知珩係嗰種好獨立嘅人，唔會太依賴男朋友
「會呀～就算一齊住都會想成日見～」知珩一提起佢男朋友，笑意都忍唔住，幸福嘅感覺強烈到我都可以感覺到，「有時放工好攰，番到去見到佢就好足夠啦～」
望住知珩提起男朋友嘅時候嘅幸福，忽然有啲好奇，浩宜拍拖嘅話會唔會都係咁⋯？不過，呢個再講啦⋯
到咗夜晚收工嘅時候，我喺休息室行出嚟嘅時候，知珩咁啱企咗喺休息室門前
「咁快手嘅你？」知珩好順口咁講咗一句，然後就伸手推門行入休息室
「知珩知珩！」我喺佢半個人入咗休息室之際叫住佢，「我送你過去得唔得？」
「送我過去⋯哦，可以呀～」知珩幾乎冇考慮太耐就答應咗，「等我一陣。」
知珩閂咗休息室嘅門同時，阿逸喺廚房行出嚟，身上仲著住cafe嘅圍裙
「你仲未走嘅？」阿逸望咗坐喺吧枱前嘅我一眼，然後行入水吧
「等埋知珩。」我講道，「你唔換衫走？收工啦都。」
「諗住擺埋啲貨先走。」阿逸打開水吧上嘅櫥櫃，「唔通聽日早啲起身番嚟擺咩？今日做埋先走。」
「好似好耐都冇見樂恩番嚟，佢放假？」我咁啱諗起好似幾日都冇見樂恩，因為最近cafe好靜
「係呀，佢攞咗幾日假休息。」阿逸愣咗一下，然後先微微點頭，「佢話番咗太耐想休息下。」
「咁突然嘅⋯佢冇番嚟顯得呢啲時間好靜⋯」我托住頭拎起手邊嘅耳機放喺手轉，「佢平時太多嘢講，宜家冇人講嘢好唔慣。」
「都係嘅，佢喺度又真係唔同啲。」阿逸提手就將一筒新嘅外賣杯放上櫃，「活躍啲。」
「冇人成日叫住你唔習慣啦？」我忍唔住笑問，不過都係講笑嘅性質咁講，「佢喺度嘅話成日都叫住你。」
「Okay啦，都冇咩慣唔慣嘅～」阿逸嘅笑容有啲無奈，但睇起嚟又唔淨止只有無奈咁簡單，「佢過兩日番㗎啦。」
「行啦卓思齊。」知珩開門行出嚟
我同知珩一齊行出cafe，唔知點解會有種我喺知珩身上𢱑好感度咁樣，自己諗完都覺得好笑
「你做咩咁好人送我去呀？」知珩笑問，我覺得佢根本係明知故問
「想喺佢啲好閨密身上𢱑下好感。」我用講笑嘅語氣笑道
「哦～我唔會講你壞話嘅，一定為你好好咁保持形象。」知珩拍一拍我膊頭，「唔會破壞你喺浩宜心目中嘅形象。」
「冇咩形象可言⋯」我更無奈，我覺得我都係喺佢面前做自己，同平時一樣冇咩太大分別，「都同平時差唔多。」
我將知珩送到去浩宜番工嘅地方樓下，我地到嘅時候，浩宜已經喺度等緊知珩
「你地一齊嚟嘅？」浩宜見到我嘅時候係明顯嘅意外
「哦，佢話送我過嚟。」知珩走向浩宜
浩宜冇望知珩，目光反而一直停留喺我身上
「再望多一秒啦⋯一秒⋯」
我承認我嘅貪心，唔係好正常嘅事咩⋯？
知珩望一望浩宜，又望一望我，我察覺到大概係對視嘅時間太長，知珩喺度始終有啲尷尬
「知珩，咁我番去先啦⋯！」我收回視線望向知珩
IG Link: https://www.instagram.com/nd_cotttoncandy/?hl=zh-tw