【愛情】關於我一覺瞓醒發現喺初戀屋企⋯！: 118. 像本來的你一樣

「我知道呀，但係唔係我一日可以諗清楚嘅事，1年可以算，4年呀⋯你唔好同我講咩中意就唔好講年齡。」浩宜難得嘅苦惱同認真，都用咗喺呢度，「佢同我一齊，佢會比人笑⋯」

「你睇起嚟都冇好老啫⋯」我打量一下浩宜，雖然同我同年，但睇起嚟都唔係比真實年齡大嗰種，「講到好似你考慮緊嘅係一個細你十年嘅人咁⋯」

「咁都一樣啫，都係心理關口嘅問題。」浩宜微微點頭，「再考慮。」

⋯

「去唔去食刨冰呀？」浩宜忽然提議





「哦⋯都得～」我睇一睇手機嘅時間，順便同阿立講聲，「同你食埋刨冰啦～」

「你就算話唔同我食都一定要去㗎啦！」浩宜抬起下巴，「冇得你揀。」

「去！同你去！」我用力點一點頭，「我唔會重色輕友。」

我跟住浩宜去食佢想食嘅刨冰，之前都同佢一齊嚟過幾次，佢地啲刨冰又真係幾大份，一個人一定食唔晒

我地喺張小圓枱前坐低之後，浩宜已經迫不及待咁拎餐牌睇下食邊款





我嘅目光落喺近門口嘅嗰一枱，啱啱行入嚟坐低喺近門口嘅位置，4個人

「周浩宜⋯！」我拎住餐牌湊前，低聲叫咗浩宜一聲，「門口⋯！」

「門口做咩⋯」浩宜輕皺一下眉頭之後回頭望，「哦⋯」

浩宜冇太大反應，只係默默咁收回視線，但神情好明顯唔同咗⋯

卓思齊同佢啲同學一齊嚟，我冇認錯，其中一個係上次嚟過cafe嘅女仔





「咁啱嘅？」我send咗個message比卓卓

我偷偷留意卓思齊嘅背影，見到佢側一側身將手機從褲袋拎咗出嚟，然後擰轉頭望，同我對上眼

「又見到你啦～」佢send咗個message比我，「咁夜都見到你」

「陪浩宜食，而且8點都唔叫夜啦」我都只係陳述事實

「icic」佢呢個回覆顯然有啲敷衍，又或者佢都唔知可以覆咩

「我估坐卓卓隔離個女仔，實係中意佢。」我低聲同浩宜講我嘅猜測

「嗯，咁同我冇咩關係㗎⋯」浩宜唔在乎咁點頭

「你係好有信心定已經放棄啦？」我望住浩宜仲若無其事咁點餐





「兩樣都唔係。」浩宜將餐牌放回原位，撐起兩邊嘅角嘅笑容睇起嚟好虛偽，「唔係我放唔放棄嘅問題—」

「咁係邊個嘅問題？」我喺浩宜講完之前已經忍唔住要打斷佢，浩宜微微張開口，但冇講啲咩，「邊個以前大大聲聲同我講，中意就去追，中意就試，唔比勇氣去試點知啱唔啱？」

「嗨。」一把聲喺我嘅身後傳嚟

我擰轉頭望，餘光見到浩宜一臉愕然咁抬起頭，卓思齊企喺我眼前，佢嘅目光卻毫不掩飾咁落喺浩宜身上

「你同你啲朋友一齊嚟食宵夜啦？」我望一眼門口嘅方向，佢嘅朋友望咗過嚟

「嗯，佢地話食，所以就一齊過嚟。」佢對我笑一笑，「你地都食宵夜啦？」

「呢個時間應該都唔算宵夜？」我笑一笑





「我番過去先啦，番工見啦～」卓卓拍一拍我膊頭，佢嘅眼神似有意迴避浩宜

「哦好呀～」我微微點頭

喺卓卓轉身走嘅時候，我隨即望向浩宜，浩宜擰轉頭望咗一眼

「唔捨得呀？叫住佢囉～」我冇好氣咁講

「叫住佢做咩⋯我唔想幫佢地埋單⋯」浩宜反咗個白眼

食完番去嘅時候，卓卓就行喺我地嘅正前方，我即刻推咗浩宜一下

「你快啲上前叫佢，陣間又比人截糊，到時你唔好喊！」我低聲對浩宜提醒道

「我做咩要喊？」浩宜撥開我隻手，「你行呢邊咩？你要搭同我反方向嘅車，月台喺上層。」





「知啦知啦⋯唔阻你！」我敷衍咁揮揮手，然後向電梯嘅方向行去

一向敢愛敢恨嘅浩宜，今日居然會猶疑不決，感覺都幾新鮮，不過佢會猶疑，唔係都係一件好事咩？

我遇番阿立之後，所有事都向好嘅方向行緊，所以作為好朋友，都希望浩宜搵到自己嘅幸福

我希望浩宜諗清楚，認清楚自己嘅想法之後，可以好似以前咁樣勇往直前

⋯

⋯

⋯





「嗨～」浩宜行到我身旁，佢每次都係咁若無其事，「又見面啦～」

「嗨。」我見到佢行到我隔離嘅時候，嘴角都係會不自覺咁上揚起嚟

「啱啱喺刨冰店都見到你。」浩宜抬頭望我嘅時候，唔知點解我感覺到佢有一份歉意夾喺其中

「我知道你見到我。」我點點頭，「我估你未必想太尷尬，所以冇同你打招呼。」

「嗯⋯」佢輕撅嘴一下，係我睇唔明嘅表情

行出地鐵站，我決定依舊將佢先送番去，呢個時間都係送一送佢比較安心

今日嘅路上，唔知點解有種詭異嘅氣氛，心入面凝住會有咩發生；我偷望浩宜一眼，佢好似同平時有啲唔同

「你係唔係—」「卓思齊—」

我同佢幾乎係同時開口，我即刻將我本來想問嘅嘢收番，但佢搶先一步開口：「你先啦⋯」

「你係唔係⋯」我開口講到一半，但因為啱啱嘅重疊，所以我唔太記得我想講啲咩，喺我諗緊自己本來要問嘅嘢嘅時候，我下意識就開口：「有咩想同我講⋯？」

我點解會下意識問佢係唔係有嘢想同我講？我問咗出口之後，自己都覺得奇怪⋯我講緊咩⋯？

「係。」浩宜冇隱瞞嘅打算，直接點頭承認，「你係認真？喺對我⋯中意我呢件事上面。」

我唔知道點解佢會突然提起呢件事，我以為呢件事已經唔會再被提起，原來佢有在意緊呢件事，心情忽然間變得有少少複雜同緊張

「本來，我都唔太信，一見鍾情。」我認真咁諗咗一陣，喺兩秒嘅沉默後點點頭，「不過我宜家可以肯定我係。」

心動嘅信號嚟得太明顯，無論係第一次見到佢，又或者嚟到呢一刻望住佢都好，我都係會比佢深深咁吸引住；我可以感受到心跳嘅頻率變動；我可以知道自己手心出緊汗；我可以察覺到我嘅視線冇離開過佢

要強迫自己唔去留意一個自己在意嘅人好難，要一直提醒自己「唔好望！唔好望！」先可以勉強將衝動壓抑落去，我從來冇試過咁肯定自己嘅心意同想法

「我明明，已經好婉轉咁表明過，點解你唔放棄？」浩宜追問




IG Link: https://www.instagram.com/nd_cotttoncandy/?hl=zh-tw