【愛情】關於我一覺瞓醒發現喺初戀屋企⋯！: 117. 刺痛

佢咁樣一問，我忽然唔識答佢⋯我唔知要點答佢，我望住佢，但咩都冇講到出口

見我冇出聲嘅佢，眼中嘅失望無從掩飾，係對我失望，大概係⋯佢連一個微笑都透露住滿滿嘅失望⋯

我見到佢咁樣，心入面有種鬱悶嘅感覺好似泡泡一樣一戳即破⋯

我番到屋企，換咗件衫，沖咗個涼，拎住罐啤酒坐喺窗邊，雨天果然都唔係咩好日子⋯

我以前，都有認真拍過拖，不過有一次同咗個渣男一齊，我發誓以後唔會再比人玩，人地玩我，我要玩得比佢狠，所以從來只有我飛人





我拍咗好多散拖，只係中意一時嘅新鮮感，只要我對佢嘅新鮮感一到期，我就會講分手，男人都係中意新鮮感啫，而且去得club玩嘅人都唔會係想拍長拖嘅人啦

對我嚟講，追我嘅人都幾多，但我從來都唔打算接受邊個，唔想限制咗我嘅自由，唔想比人約束住

我向來覺得比起愛人，我更愛自己，喺愛情關係入面，我好少會去諗人地嘅感受，我點解喺愛情入面冇咩共情能力⋯？

我一直覺得只係我更愛自己、更在意自己啫⋯但今日嘅我，似乎對自己都有新嘅了解

卓思齊係好男仔，我係打從心底咁樣覺得，正因為佢係好男仔，所以同我更唔匹配





應該話佢同我本來根本就唔會識，只係因為有知珩作為中間嘅交叉點，所以我同佢呢兩條平行線先會交疊

我呢種成日落吧落club、又唔會真心愛邊個嘅人，會耽誤佢去搵真正合適嘅人；我本來以後自己都可以同以往一樣瀟灑講再見，但今次有啲難

「你錫我係因為你中意我，定只係知我中意你，單純想玩我？」

佢講嘅一句喺我腦海中閃過，我當下居然唔知要點答，我居然有一刻會怕見到佢因為我而難受嘅樣⋯中唔中意呢件事，我都唔太清楚⋯但想玩嘅心態，都係夾雜其中⋯

「嘖⋯」我仰頭將頸枕喺梳化嘅邊上





佢失望嘅眼神令我都失咗魂，我呢種自私又唔會共情嘅人，因為一個細我4年嘅男仔，一個失望嘅表情，心揪住痛⋯

我嘅手喺身邊離我唔遠嘅位置摸一摸，摸到我嘅手機，開IG之後見到嘅第一樣嘢，係卓思齊po咗story，明明只係一個紫紅色嘅圈，但我都係忍唔住好奇心㩒咗入去睇

「我邊個都唔係」

深夜嘅街道，配上白色嘅文字，更加顯出佢嘅憂愁，一句「我邊個都唔係」直接刺痛我⋯

我今晚又係同酒、同愁緒一齊渡過⋯

⋯

⋯

⋯





「今晚做咩約我食飯？」我望住侍應將餐牌收走，我拎起枱面嘅玻璃杯飲一啖水

「宜家係唔係約你食飯都唔得？有男朋友唔洗要我呢個朋友？」浩宜帶住舉一反十嘅氣勢反問我，「同男朋友一齊食少一日飯都唔緊要啦係唔係？你地日日都見啦。」

「邊個激嬲你⋯？」見到佢嘅反應，我嘅第一下直覺係有人激嬲佢，「我問一句你問番我三句⋯邊個激到你咁嬲？」

「咁又冇⋯」浩宜嘅愣咗一下，氣勢即刻收咗，「又唔係邊個激嬲我嘅⋯」

「咁做咩⋯？」我有啲不解，諗咗一諗之後笑問：「你激親自己啦？」

「知珩，你話人點解會口不對心⋯？」佢望住杯中只剩一半嘅水，雙眼中係我估唔到嘅情緒，「世上除咗人心難測，人嘅關係更難測⋯」

「咁⋯人係咁㗎啦～」我無奈聳肩，托住下巴望住有一絲憂愁嘅浩宜，「所以你講緊你自己同某個明戀你嘅人？」





浩宜嘅沉默，代表我講中咗⋯我的確好意外

「最自私嘅周浩宜，居然會因為人地令自己憂愁？」我不禁笑道，呢個笑夾雜咗嘲諷嘅意思，「我冇睇錯呀嘛？」

「我冇憂愁，只係心情有啲一般；搵你嚟訴苦，你就喺度窒我⋯」浩宜不悅咁望我一眼，用手指將垂喺臉旁嘅髮絲向後梳

「冇窒你，我點敢呀？」我抿一抿唇，輕嘆一口氣，「卓卓最近，睇起嚟好似冇咩事，但係一安靜落嚟，佢嘅愁緒就好明顯⋯」

「我知。」浩宜煩惱咁托住額，憂愁都喺雙眸中滲出嚟，重重咁嘆一口氣之後坐好起嚟，拎起啱啱放到枱上嘅酒杯，「我嗰日，錫咗卓思齊，然後佢問我錫佢係因為中意佢定想玩佢⋯我當下，咩都冇講，唔知要答咩，答咩都唔啱咁⋯」

「我點解會咩都冇答？我諗咗幾日都唔知點解⋯我見到佢好明顯嘅失望，但我冇諗過要佢難過⋯」

「我好矛盾，我知道佢中意我，我都覺得佢喺我嘅圈子入面好⋯與別不同⋯好想試下新嘅感覺；但我又覺得，佢好好，但我唔好，我同佢唔係一路人⋯」

「知珩呀知珩，你話好似你咁幾好？一早搵到個對你一心一意嘅人⋯」





「你飲醉酒啦？」我望住佢手中全滿嘅酒杯

「一啖都未飲，點醉？」浩宜嘅嘴角微微上揚，輕笑一聲

「你唔係敢愛敢恨㗎咩？」我問道，「既然中意，咁咪去，你大過佢呢件事，佢都冇介意過。」

「再⋯諗諗？」浩宜仲係喺度猶疑，佢抬眼望一望我，「我嘅意思唔係話唔中意，只係再考慮清楚。」

「就算你叫佢唔好等你，你覺得佢會唔會？反正我覺得佢都係對你一心一意。」我將我眼見同我感覺到嘅嘢話比浩宜知，「佢口講話唔再聯絡，但你約佢嘅話，佢應該都會乖乖地出嚟。」

「我前一排仲講緊唔想拍拖⋯」浩宜自嘲般揚起嘴角，「不過又唔係真係⋯特別想，就係諗下⋯」

「你中意咪認⋯敢愛敢恨嘅你呢？」我無奈咁望住浩宜，「真係中意啦？好少見你咁猶疑不決。」





浩宜沉默不語，但大概真係，只係浩宜唔想承認佢係動咗心

「你唔好同佢講。」浩宜提醒我，眼底嘅迷惘盡露，「太折磨人。」

「你都知？」我今日只係一個聽訴苦嘅工具人，浩宜嘅心意我唔會同卓卓講，畢竟係佢地兩個人自己嘅事

有一刻我喺度諗，如果真係中意，浩宜會去，唔係真係習慣咗人地主動，而係浩宜自己都猶疑緊

「不過你係諗都唔好諗咁耐，好嘢唔係得你一個想要。」我講道，「暫時佢應該都係一心一意對你，但你同佢講咗嘅嘢佢都係有擺喺心，唔可以話佢會放棄，但亦唔代表佢諗清楚之後唔會。」




IG Link: https://www.instagram.com/nd_cotttoncandy/?hl=zh-tw