【愛情】關於我一覺瞓醒發現喺初戀屋企⋯！: 103. 同居

「結婚？未諗呀～同邊個呀？」我扮聽唔明，側住頭望住阿立，「我連同邊個結婚都未知。」

「你唔知咁我點知？」阿立嘅嘴角微微上揚，但好快又將揚起嘅嘴角壓番落去

「話說我啱啱先發現，平時你好少入我房。」我拎起一件蘋果放入口

「因為冇入你房嘅必要⋯」阿立無奈咁拎咗張紙由遞比我

「好似我成日都喺你房瞓咁樣⋯」我有啲難為情，咁樣數一數，我都喺佢房瞓咗三次





「有咩？」阿立不以為然咁問番我轉頭，「洗唔洗我今晚喺度瞓平衡一下你嘅心理？」

我冇即刻答佢，其實我又冇咩太大所謂，我覺得冇問題

「唔⋯你中意啦～」我繼續睇電腦，因為唔好意思直接望住佢答

「咁我番房啦。」阿立道，我嘅餘光見到佢企好轉身，我提手就拉住佢嘅衫角，「點呀？」

「食完啦蘋果，幫我拎個碟去廚房⋯」我將碟推向佢





「仲有冇？」阿立問我

「唔⋯床頭櫃盞燈壞咗，我怕黑⋯」我低聲道

「知啦。」阿立拎起碟，然後行到我嘅床頭櫃前將本來著住嘅床頭燈閂咗

⋯

我已經好耐冇試過唔開住枱燈瞓，因為對怕黑嘅我嚟講，閂咗枱燈嘅話會變得好冇安全感





今晚嘅枱燈閂咗，但阿立喺我身邊，我一啲都唔覺得怕

上次喺阿立房瞓嘅時候，阿立都有開住燈，只係將燈光較到最暗，但今晚完全冇燈照住

「洗唔洗開番燈？」阿立低聲問我，佢當然知道我所講嘅「床頭燈壞咗」係藉口

「唔洗，你喺度okay。」我抬頭望佢，手搭喺佢嘅腰上面

我房嘅窗簾比較透光，我都可以從窗簾滲入嚟嘅微弱燈光見到阿立嘅輪廓，佢嘅氣味同存在令我心境好平靜冇波瀾

「你有冇掛住我⋯？分開之後⋯」佢呢個問題嚟得突然，但卻係喺一個適當嘅氣氛

「有，但唔敢諗⋯」我誠實回答，「同你有關嘅嘢，我一樣都冇掉，但都收起晒唔敢拎出嚟⋯」

「拎出嚟睇嘅話會喊係唔係？」阿立笑起嚟，完全不留情面就笑我





「我會呀，真係會㗎！你上次冇聽到我媽咪講咩？」我抬起頭，臉頰貼住佢嘅膊頭，用只會對好close嘅人先有嘅撒嬌語氣道，「我喊咗好耐呀⋯」

「唔好喊啦，係我唔啱啦⋯」阿立轉側身，將我拉到佢嘅懷中緊抱住，「以後唔喊啦⋯」

「知係你唔啱啦？」我攞出底氣，有人縱容就會有嘅底氣

「係⋯係我唔啱⋯」阿立嘅下巴抵喺我嘅額上

「鐵盒入面嘅嘢，好似都已經好耐啦⋯都唔記得咗由幾時開始擺入去⋯」我嘅鼻尖貼住佢嘅胸口，「我只係知道分手之後，我就唔敢再掂嗰個盒⋯一打開，眼淚就會湧出嚟，會諗起嗰日點打都打唔通嘅電話⋯」

我合埋眼，咁又7年，7年前以不辭而別作為我地嘅終點，7年後嘅今日我地住埋一齊，由合租變番去當初親密嘅我地

「許翊瑜，我地以後都要一直喺埋一齊⋯」我低聲講道，呢個係我可以回答嘅最直白嘅回答





「好。」佢聽明我嘅意思，點點頭，「唔係要一直一齊，係會一直一齊。」

⋯

「嘟嘟嘟嘟！嘟嘟嘟嘟！」

再次睜起眼嘅時候，係第二朝早鬧鐘響將我叫醒；喺我嘅雙眼適應到光之後，第一樣映入眼簾嘅，係仍然瞓緊嘅阿立，我嘅嘴角喺我反應過嚟之前已經自動上揚

「真係呀⋯」我坐起身，伸手去閂鬧鐘，望一眼仍然安穩熟睡嘅佢，我伸手推咗佢兩下，「起身啦許翊瑜！要番工啦！」

「唔⋯！」佢皺起眉頭，呢個佢有啲可愛，我再搖多佢兩下，佢就睜開眼坐起身

「醒啦，番工啦！」我盯住佢嘅睡眼惺忪嘅樣

「嗯⋯」佢點點頭，下一秒就靠喺我膊頭上，「知啦⋯」





「許翊瑜！」我縮一下膊頭，佢就乖乖坐好，定一定回一回神，然後落地著拖鞋，行出去廁所

我完全唔急，落床之後先去打開窗簾，等陽光可以照入嚟我房，然後拎起手機行去廁所

「我又要一齊刷牙～」我今日嘅心情好好，好到可以出彩虹嗰種好，我企喺阿立身旁拎起牙刷擠牙膏

阿立望一望我，我睇緊IG，好自然咁就貼住佢企，完全唔覺得尷尬；我忽然靈機一動，打開IG嘅相機、較個filter、對住鏡準備好我嘅行動

阿立從鏡中望到我拎住手機對住鏡，好有默契咁同我一樣望住手機嘅螢幕，呢個story一po出嚟，等於同全部人講我同阿立係同居

畢竟喺呢個曖昧嘅時間點加上慵懶嘅居家服，真係好容易可以引人暇想

呵呵，拜拜啦游巧盈～





「咕嚕咕嚕咕嚕⋯涮！」阿立將口入面嘅牙膏沖走，然後特登行後兩步睇我嘅手機，「你要po出去呀？」

「你唔想呀？」我喺㩒po出去public之前先問阿立，不過佢又點會唔肯

「唔係呀，你po啦。」阿立笑一笑，「可以避免有人對你有小心思。」

「哦，差啲都唔記得咗我地阿立係佔有慾好強嘅人添～」我笑道，然後將呢張相po喺story，都算係一種宣示主權

「知就好。」阿立輕力咁捏咗我嘅臉頰一下，然行咗番房

⋯

我一手拎住沖好嘅咖啡，一手拎住鐵杯，今日拉咩圖案好？就拉個普通嘅葉啦～

聽住樂恩喺我身後出緊甜品，今日嚟叫甜品外賣嘅人都幾多，樂恩比較忙

我望住我隔離出單嘅機彈出嚟嘅單一張一張咁比我清，感覺好正，我減輕緊自己嘅工作量

「知珩⋯！」樂恩忽然拉咗我一下，我望向佢嘅時候見到佢指住排喺收銀處前嘅隊嘅後方，「你男朋友。」

「哦。」我同阿立對視咗一眼，我若無其事咁繼續沖我嘅咖啡

「我睇咗你今朝早嘅story啦～」樂恩忍住笑意，擰轉頭對我低聲講道，「你地發展得咁快嘅？咁快就同居啦？」

「咩呀？」我笑問道，「我冇同你講過咩？」




IG Link: https://www.instagram.com/nd_cotttoncandy/?hl=zh-tw