【愛情】關於我一覺瞓醒發現喺初戀屋企⋯！: 102. 勇敢地
「唔洗，屋企好少煮飯。」我搖搖頭，壓抑住興奮嘅心情問：「係唔係行得？」
「係呀。」浩宜笑一笑，轉身去推門
我擰轉頭帶住感激嘅眼神望咗知珩一眼，知珩嘅嘴角滲出少許嘅笑意
「唔係知珩話我知，我都唔知原來佢仲係咁離譜，今次係我累到你啦⋯」浩宜苦笑道，佢嘅語氣聽起嚟輕輕鬆鬆，就好似唔想我有壓力一樣
「本來就係佢誤會咗，由佢啦～佢要誤會就誤會啦～」我笑一笑，「至少佢冇煩你先啦。」
「哦？咁貼心呀？」浩宜側住頭望住我，對我露出甜美嘅笑容
見到佢臉上嘅笑容，心跳⋯又漏拍啦⋯佢係唔係識啲咩控制人地心跳嘅方式？一靠近佢，我嘅心跳就會自然咁漏拍⋯
「嗯？」浩宜見我定睛望住佢冇出聲，佢嘅頭又再側多少少，嘴角上揚嘅弧度又多咗啲，「你覺得我靚啲定知珩靚啲？」
「你靚啲。」我諗都冇諗就開口答佢，用最認真嘅態度回答佢
「多謝喎～」浩宜照單全收，絲毫冇謙虛啲嘅打算，「知珩唔係你杯茶？」
「知珩靚係靚，但唔係我中意嗰type⋯」我尷尬咁笑咗一笑
「咁我係你中意嗰type？」浩宜追問，我即刻窒咗唔識答，見我有啲慌張，浩宜笑道：「講笑咋～你唔洗咁慌張～」
「我唔係慌張⋯」我搖搖頭，忍唔住吞啖口水滋潤一下忽然乾涸嘅喉嚨
我先唔係因為呢個玩笑而慌張，而係以為比你睇穿我嘅心思而慌張⋯
「都⋯我唔介意姊弟戀㗎～」我故作輕鬆咁笑一笑，然後默默咁留意佢嘅表情，察言觀色
浩宜用我無法睇穿嘅眼神望住我，然後輕輕一笑，佢呢個笑容嘅意思我估唔到、猜不透⋯
「你應該好多人追啦？」浩宜呢個問題，令我忍唔住諗更多，佢係唔係有咩暗示
「冇呀⋯」我搖頭，「分咗手之後都冇拍拖啦⋯冇人追。」
「咁靚仔都冇人追？」浩宜挑起眉，睇起嚟有啲唔太信我講嘅嘢，「你咁謙虛呀？」
「真係冇呀～」我笑道，又忍唔住偷望佢一眼，鼓起勇氣用開玩笑嘅語氣笑道：「你要唔要追下我？」
「要姐姐追你咁大膽呀？」浩宜撥一下頭髮，我又一次感受到咩叫做魅力
「我可以接受姊弟戀㗎！」我帶住半份無法隱藏嘅真心道，「唔怕比人講！」
「講到你好似真係想追我咁。」浩宜又笑道，佢真係當我係講緊笑
「我想呀！」我一下衝動，口快過腦就講咗真心話，但講咗嘅說話已經收唔番，我只好等佢嘅回答
佢好似都因為我突然衝口而出嘅說話而有啲措手不及，睇佢嘅表情似乎係諗緊要點答我先啱，要講啲咩去避開呢個話題先啱
「好笑！」浩宜喺安靜咗兩秒之後，拍我嘅背一下同時笑道，「姐姐唔啱你啦～」
眼神冇辦法講大話，佢聽得出我嘅意思，但唔想承認佢明白呢件事⋯
直到食完飯番去嘅時候，我冇再提起呢件事，我唔想我同佢嘅關係喺呢度止步⋯所以我都當我自己真係講笑就好啦⋯
「我送到你嚟呢度啦⋯」我將浩宜送到番屋企樓下，「你自己小心啲，都唔知你個ex仲會唔會嚟搵你⋯」
「應該暫時唔會啦⋯」浩宜無奈咁深呼吸一口氣，目光落喺我嘅面上，「下次見到佢，直接走啦，佢打人真係唔講笑㗎⋯」
「我知呀⋯」我摸一摸自己嘅臉頰，都係有啲刺痛嘅感覺，「點知佢會咁樣直接衝上嚟就打人⋯」
「知珩都要怪我累到你受傷啦～」浩宜伸手戳我面上瘀咗嘅地方一下
「嘶！真係痛呀⋯！」我作出反射動作，向後縮咗一下
「好啦好啦，唔戳你啦～」浩宜對我講嘢嘅語氣，聽起嚟就係當我係小朋友咁氹，「我番到啦，你快啲番去啦！」
「你入咗去我再走。」我講道
「咁細心？」浩宜笑一笑，「以後邊個做你女朋友，一定好有安全感。」
「咁你要唔要試下做我女朋友？」我笑一笑，想用笑容同開玩笑嘅語氣令成件事講出嚟嘅時候冇咁尷尬
「敢開我玩笑啦？」浩宜輕力打咗我一下，「我就唔同妹妹仔爭啦～」
「講到好似你同我爭10年咁⋯」我喺心入面打量佢，笑道：「睇起嚟同我都冇差好遠啫～」
「4年都好多㗎。」浩宜微笑起嚟，我希望呢個微笑嘅意思唔係婉拒，「你先21，我已經25。」
「我冇所謂呀～只要互相中意，年齡唔係問題。」我講出我嘅真心話，「真心相愛嘅話，10年20年都唔係問題。」
「再玩下先啦。」浩宜呢句，我聽得出佢嘅婉拒，「仲好後生。」
「好啦好啦，唔同你講笑啦，你快啲番去啦！」我趁我仲可以控制到表情嘅時候，連忙笑住咁捉住佢嘅膊頭，幫佢原地轉180度，推佢行前到大堂門口，「夜啦。」
「知啦！」浩宜對我回眸一笑，「我番去啦。」
我望住佢行入大堂，行到轉角位消失嘅時候，我嘅表情管理失效，表情即刻塌落嚟
「唉⋯睇嚟真係冇咁易追⋯」我企喺原位喃喃自語
⋯
⋯
⋯
「叩叩—」
「係？」坐喺書枱前嘅我望向門口，見到阿立推開門入，「做咩呀？」
「蘋果。」阿立拎住一個碟入嚟，輕力咁放喺我嘅枱面
「唔該～」我抬頭對企喺我隔離嘅佢笑道
「睇緊咩？」阿立一手扶住我嘅櫈背，另一隻手㩒住喺我嘅枱邊，我嘅額角都就嚟貼住佢嘅胸膛，「睇樓？準備搬出去唔同我合租啦？」
「唔係呀，你唔好誤會，只係唔小心㩒咗入嚟。」我即刻澄清，「我住得好地地，做咩要搬走？」
「哦，我點知你？」阿立挑起眉，用質疑我嘅眼神望我
「哼哼，我冇想搬走，痴喺度㗎啦！」我拎起一件蘋果遞到阿立嘅嘴邊，阿立咬咗一啖，我將剩低嘅一半入口
「以後結婚都唔搬走？」阿立講嘅嘢冇指向性，我覺得佢想伏我
IG Link: https://www.instagram.com/nd_cotttoncandy/?hl=zh-tw