【愛情】關於我一覺瞓醒發現喺初戀屋企⋯！: 100. 找錯對象
食嘢嘅時候，我講下番學嘅事，佢講下番工嘅事，好似相差咗四年，但四年好似都唔係真係差咁多⋯
佢講嘢嘅時候，我嘅目光完全冇離開佢多過兩秒，佢成個人都閃閃發光咁，令我嘅視線都寸步不離
食完糖水行出鋪頭後沿路散住步行番去，行到一步嘅時候，一個男人迎面行嚟，睇起嚟都係25、6嘅年紀，佢嘅視線停留喺浩宜身上
我忍唔住輕皺起眉頭瞪佢一眼，但喺我望向浩宜嘅時候，發現佢嘅眼神有意避開對方嘅男人
喺我同浩宜行到離佢好近嘅位置，差唔多要擦肩而過嘅時候，一句說話傳嚟：「周浩宜，難怪你死都唔肯同我復合。」
我頓時擰轉頭，但已經見到佢捉住浩宜嘅手，浩宜滿臉厭惡咁盯住佢，一手將男人嘅手甩開
「我唔同你復合係因為嫌污糟。」浩宜以不屑嘅語氣道
我連忙行到去浩宜嘅身前，將嗰個男人推開，等佢離浩宜遠啲
「難怪電話又唔聽，message又唔覆，原來搵咗新男朋友。」佢嘅語氣極唔友善，打量我一次之後冷笑一聲，「睇起嚟細過你？幾時開始中意細過你嘅？」
「同你有冇關係？」浩宜反咗個白眼、翹埋雙手擺出高傲嘅姿態，「我中意邊個都唔會中意番你，望多你兩眼，我怕我反胃。」
一切嚟得太突然，呢種情景我以為得電視劇或者小說先有，冇諗過真係會喺現場發生
「你講咩？」對方嘅眉頭緊鎖，伸手想捉住浩宜嘅手
我喺佢提手嘅時候，用力將佢隻手推開，佢不屑嘅目光頓時落喺我身上
「我話你呢啲一腳踏四五船嘅人遲早浸死喺污水渠。」浩宜原來會用呢種嫌棄嘅表情講呢種毒舌嘅說話，佢擰轉頭望向我嘅時候，又變番平時笑盈盈嘅佢：「思齊，行啦。」
「哦。」我望一眼眼前嘅男人，又望一望浩宜
浩宜捉住我嘅手肘，一眼都冇再望嗰個人就拉住我走，直到過咗馬路佢先鬆手，我先開口：「ex？」
「佢只係算一個人生污點。」浩宜輕笑一聲，不以為然咁講道
「佢又會突然喺度截你嘅？佢想追番你？」我問
「我覺得佢只係因為面子所以想復合，嗰陣我好好咁直接喺學校飛咗佢，佢覺得冇面。」浩宜聳肩，講起嗰段同佢口中嗰個人生污點嘅過往，「然後我一分手就block晒佢所有嘢，唔比機會佢再搵我，電話、IG、Whatsapp、Facebook⋯可以block到佢嘅我都block晒，佢都煩咗我差唔多⋯大半年？」
「佢都幾有恆心⋯」我有啲無奈，搵一個完全唔想同你復合嘅人搵足半年佢唔攰？
「恆咩心，只係一個睇面子重要過一切嘅人。」浩宜搖搖頭，然後抬起頭望我，「不過睇起嚟佢應該暫時唔會煩我住啦～」
佢係指佢誤會咗我係浩宜男朋友嘅事⋯？所以唔會煩佢住？咁⋯我又冇咩所謂嘅～今日都比人誤會咗好幾次⋯
「搞到你一直比人誤會唔好意思啦～」浩宜望住我，帶住淡淡嘅笑容微微側一側頭
「唔洗⋯」我搖搖頭，我都樂意比佢地誤會，「你本來⋯有男朋友？」
「冇啦，之前咪話冇，所以我班朋友成日喺度亂講嘢，叫我唔好再玩。」浩宜笑道，見到佢嘅笑容我就覺得鬆一口氣，佢嘅情緒真係嚟得快去得快
「有男朋友比人誤會就話啫，你又未有男朋友～」我本來有啲擔心，但聽到佢咁講就安心啲
「所以話嗰個污點應該唔會煩我住啦。」浩宜笑道
我將浩宜送到番屋企樓下，今日嘅相處好似令我對佢嘅了解又多咗少少，但係我有啲唔滿足，想再了解佢多啲⋯再知多啲⋯
⋯
上完上到夜晚9半嘅堂，我行出學校門口搭車番屋企，我行落巴士，諗緊陣間要買咩番屋企食比較好
我離遠就見到一個人大搖大擺咁走向我，我望佢一眼，原來係前幾日嚟煩浩宜嘅嗰個ex
「當睇唔到佢算。」我喺心裏道，然後自然靠埋一邊行，免得撞到佢
「喂。」佢一步行到我面前擋住我，我頓時停低腳步，佢同我差唔多高，我同佢嘅視線對上，「真係你。」
「吓？」我有啲唔明佢想講咩，不禁輕皺一下眉頭
喺我都未比得切反應嘅時候，佢一拳就打過嚟，我下意識閃開，但係因為反應未番得切嚟所以避唔切，一下就打到我嘅顴骨
我向後行咗兩步，即刻捉番住平衡，摸一摸顴骨嘅位置，咩事呀呢個人？
「喂！你咩事呀！有病呀！？」我嘅憤怒感由肚升上嚟頭頂
「我話你呀，離周浩宜遠啲，唔好阻住晒。」佢一步行到我面前試圖令我有壓迫感，佢咬緊牙道
「你邊位？用咩身份要我離佢遠啲？」我不禁失笑，「你一個一腳踢幾船仲要比人飛嘅人，有咩資格喺度講嘢？」
「我好心勸你，先苦後甜，周浩宜呢個人冇心㗎，佢玩你咋。」佢用挑釁嘅語氣講道，望住佢呢個欠打一身嘅表情，我真係想打佢
好心勸我？我未見過係咁樣勸，咩都唔講，上嚟就送人一拳，佢似係撩交打多過勸我
「而且你唔夠我玩㗎啦～」佢滿臉自信咁講，「你覺得你贏到我咩？浩宜呢種人唔啱你，一睇就知你仲有前途啦。」
「我真係唔知道你喺我面前嗶哩吧啦講咩，係咁有自信嘅，都唔洗行到嚟我面前講啦。」我輕嘆一口氣，用關懷智障嘅眼神望住佢，「真係莫名其妙，比浩宜侮辱完一輪唔順氣就嚟到我面前講咁多，真係唔知有咩意思。」
佢似乎比我講中咗心聲，佢打算由我入手將我勸退咗先，因為喺佢潛意識中，我係浩宜嘅新男朋友，係佢嘅絆腳石
佢講咗一輪，我真係唔知佢講咩，語無倫次，邏輯都完全錯誤⋯
IG Link: https://www.instagram.com/nd_cotttoncandy/?hl=zh-tw