【愛情】關於我一覺瞓醒發現喺初戀屋企⋯！: 99. 邀約

「咦～周浩宜你夾個嘢食做咩夾多個小弟弟番嚟呀～」佢其中一個朋友露出意味深長嘅笑容打量我

「佢咪上次嚟接你嗰個男仔？」另一個朋友又道，佢一眼就認到我

「咁識食呀～」另一個朋友又道

「朋友咋！你地唔好一見仔就發晒癲咁啦～嚇死人呀！」浩宜接過我手上嘅碗放低喺枱上，但佢冇坐低，伸手拍一拍我嘅背：「佢地係咁㗎，一見仔就癲㗎啦，唔洗理佢地，幫我拎嘢番嚟唔該你啦～」

「唔洗，順手啫。」我搖搖頭，佢啲朋友講咩我都冇太留心去聽





「你啲嘢呢？」浩宜低頭望住我兩手空空咁企喺度有啲疑惑

「我未拎⋯」我唔好意思咁笑一笑

「小弟弟你咁可愛嘅？」坐喺空位對面嘅女仔笑住望我

「你又啱呀？浩宜㗎！」坐喺浩宜隔離嘅女仔指一指浩宜，「浩宜姐嘅嘢你都敢搶？想死呀？」

「我地浩宜好難追㗎～」坐喺最入面嘅女仔望住我滿臉認真咁道，但點睇都覺得佢想食花生多啲





「思齊你快啲番去啦，你再企喺度，佢地都唔知要講咩啦。」浩宜睇起嚟冇咩太大反應，可能慣咗佢地係咁樣所以冇覺得係咩一回事

「好呀。」我乖乖點點頭，「拜拜～」

「拜拜～」浩宜一笑，坐低同佢嘅朋友講咗兩句

我擰轉頭望咗一眼，然後快手去夾咗嘢食就番去

「卓思齊，你出去夾咩夾咗十分鐘？」我一坐低阿銘就問我





「吓？咁都要睇下諗下食咩好㗎。」我當冇事發生過一樣講道，「食啦，夾咗番嚟啦。」

「你食唔食牛肉？」趙梓穎手上拎住一個篩，裝起啱啱煮好嘅牛肉

「哦好呀。」我微微點頭，然後拎起手機，睇下浩宜有冇再send message比我

不過其實我都知足嘅，今日見到佢我都覺得好幸運㗎啦！畢竟平時好少機會可以見到佢⋯

「聽日係唔係上早堂？」思淼問

「唔係呀，聽日個lecture喺11點半，都唔早啦。」阿銘答佢，「卓思齊話放咗學去番工呀嘛。」

「哦係呀⋯」我無奈咁點頭，「番工呀要。」

「你cafe有冇咩靚女睇下？」思淼八卦咁問，「又或者單身嘅介紹下。」





「你自己嚟睇下，單身嘅就冇，有男朋友嘅就有。」我都覺得自己嘅回答有啲九唔搭八，不過隨便啦，同佢地講嘢冇咩所謂，「而且都係大過你嘅姐姐嚟。」

喺我地差唔多都食完準備走嘅時候，見到浩宜同佢幾個朋友喺阿銘同思淼身後行過

「你男朋友坐呢度呀原來？」行喺最前嘅女仔擰轉頭望浩宜

佢咁樣一講，阿銘佢地都望晒過去，又望住我，搞到我即刻面紅又耳熱

「唔係男朋友呀⋯」浩宜無奈咁否認，不過我心入面反而有小小高興嘅感覺

「我地走啦，快啲同人講拜拜啦～」企喺浩宜身後嘅女仔即刻就湊上嚟從後攬住浩宜

嘖嘖⋯有啲羨慕⋯





「好好好⋯拜拜⋯」浩宜似乎為咗應付佢地，所以對我提一提手

「拜拜～」我揮一揮手，其實我地都準備走

「周浩宜，落唔落下場呀？」

「仲落？聽日唔洗番工呀？Cherry聽日仲要present。」

「係呀⋯聽日仲要present呀⋯！我唔想呀⋯！好大壓力呀大佬！」

我無意間聽到佢地嘅對話，我忽然有一個想法，我拎起手機send咗一個message出去：「食唔食糖水？」

「識㗎？」思淼嘅目光由行到門口嘅佢地嘅身上移向我

「嗯。」我微微頷首，「Cafe同事嘅朋友。」





「哦～」阿銘面露出意味深長嘅笑容點點頭

我地都起身走，我行到出店門口嘅時候拎起手機睇下佢覆咗我未，佢覆機嘅速度好快，螢幕一亮就見到佢嘅message：「今日？」

「係」「咁突然嘅？」

「難得見到你一面」「咁識講嘢呀～」

「事實事實，所以食唔食？」「都可以」

見到佢答我「都可以」我心入面即刻激動起嚟，佢話可以同我一齊食甜品！

「喺嗰邊地鐵站等？」我問，主要睇佢嘅意願嘛





「好」佢嘅回答簡潔清晰，但都可以令我嘅心跳強而有力

「食唔食甜品嗰啲呀？」阿銘問

「我唔啦，我仲有嘢做。」我當冇約任何人，平靜咁拒絕咗佢呢個提議，因為我要留番個胃去食糖水

「呢個時間仲有嘢做？」趙子穎用疑惑嘅目光望住我，「早排你都直接番屋企㗎⋯」

「之前做project，做完都攰到半死啦。」我無奈回答，自然咁拎起手機睇一睇時間，「夠鐘啦，我行先啦！拜拜拜拜～」

我都唔等佢地比反應就小跑起嚟，其實一齊搭車番去冇咩問題，只係免得比佢地見到，又有花生比佢地食⋯

我睇住時間，喺地鐵行駛嘅時候我都已經夠緊張，隔咗差唔多兩個星期又可以見到浩宜～

冇試過一見鍾情，好有新鮮感，佢平時應該同知珩一樣好多人追，但佢應該都係老蘭嘅常客？雖然見過佢飲醉，但佢又未係嗰種醉到語無倫次嗰種，佢似係酒量唔差嘅人

「唔知有冇人追緊佢呢⋯？唔知佢中意咩類型呢⋯？」我坐喺車中嘅時候望住對面玻璃中嘅自己喺腦海中思考

其實我唔知要點樣追先好⋯要我問知珩嘅話我又唔知點開口，但我感覺佢大過我，應該唔會對我有興趣，對佢嚟講我應該真係小弟弟⋯

「唉⋯都係同知珩打聽下⋯？」我喺心入面嘆咗一口氣

地鐵到站，我企喺車門前等車門打開；我喺落車嘅第一件事，係即刻跑去浩宜講佢所在嘅車頭位置

「浩宜！」我小跑跑向佢

「你跑住嚟嘅？」企得畢直嘅浩宜聽到我叫佢，佢望向我，見到我跑過嚟嘅時候，嘴角試揚出一個好靚嘅弧度，「好心急要同我去食糖水呀？」

「嗯⋯嗯！梗係啦！」我比佢嘅玩笑搞到窒咗一下，心跳頓時漏一拍，佢嘅從容同我嘅緊張有好明顯嘅差別，「行啦⋯！」

佢行喺我隔離嘅時候，我一直不禁用餘光望佢，佢好似自帶磁石一樣，視線一旦落喺佢身上就冇辨法移開




IG Link: https://www.instagram.com/nd_cotttoncandy/?hl=zh-tw