【愛情】關於我一覺瞓醒發現喺初戀屋企⋯！: 74. 勝負

今日有少少微風，微風伴隨住海水嘅味道迎面吹嚟，以散步嘅步速一步一步行番去

阿立沉默不語，一步一步慢慢行，刻意咁遷就我嘅步速

我拎住手機睇ig，喺我嘅ig啱啱開到嘅同時，阿逸send咗個錄音message比我

「知珩！！！食唔食糖水呀！！！」我一㩒開音，錄音傳嚟嘅係樂恩活躍嘅聲音，睇嚟佢又拎咗阿逸嘅手機

「你班同事又叫你去食糖水？」阿立不經意咁望咗我嘅手機一眼，手機嘅畫面仍然停留喺我同阿逸嘅對話框





「係呀～」我笑一笑，「佢地又叫我去食糖水。」

「見你平時多數都係同嗰個整甜品嘅男仔一齊⋯」阿立忽然間冇頭冇尾咁講咗一句

「你話阿逸？都唔算成日同佢一齊掛⋯？」我嘅大腦稍微咁思考咗一下，「只係有時咁啱大家一齊食飯，佢送我番嚟咋嘛～」

「佢追緊你？」阿立靜咗一秒後問道

佢嘅視線冇朝我呢邊望過嚟，只係望住前方，一步一步咁行





「吓？都唔算⋯」我都有啲遲疑，下意識就解釋，「我同阿逸只係因為年紀近啲，所以熟啲⋯而且佢對個個都係咁⋯」

唔知點解我講後半句嘅時候有好微嘅心虛感，可能係有時我會察覺到唔同，但又會覺得其實佢只係對唔同人有唔同態度

就好似佢對樂恩，佢有時會好似大哥哥咁關心佢陪佢，但有時又會好似同樂恩同齡咁一齊癲一齊玩

但喺我面前，就會表現得成熟啲、溫柔啲，而且唔會有好似同樂恩一齊玩嗰陣嗰種癲

「即係都算係追緊你啦。」阿立嘅語氣好平靜，我有啲失望，我以為會喺佢嘅回答中聽到佢嘅妒忌





「佢又冇講明，當佢冇。」我聳肩，冇將我嘅情緒掛喺臉上

「嗯。」阿立淡然點頭，推住玻璃門等我先入去

我有感覺到阿立略帶點不滿嘅小情緒，但我都冇辦法做啲咩⋯我同阿逸係同事，會見到面係一定嘅事，而且人地又冇講啲咩⋯

「立？」我試探般柔聲叫佢一聲，佢淡然咁望我一眼

我抿住唇冇再出聲，番到屋企之後阿立一直喺我隔離扶住我，等我將鞋除落嚟之後又將我扶住行到梳化坐低

「都冇真係腫，應該都唔算好嚴重，好好休息下，唔好周圍行嚟行去啦。」阿立完全唔介意咁就直接捉起我隻腳

「嗯⋯」我嘅視線固定喺阿立身上，一秒都冇移開過

見到佢唔高興，我有啲開心又有啲唔開心⋯開心係因為我知佢介意，唔開心係因為佢唔開心⋯





「好啦，你早啲沖涼休息啦。」阿立將我隻腳就住力度放番低，「聽日要番工唔係咩？」

「聽日Day off。」我搖搖頭

「咁仲好，可以休息多啲。」阿立抬起頭對我微笑道，呢個假嘅微笑，「要唔要扶你起身番房？」

「嗯⋯」我下意識點頭，明明腳已經冇咁痛，但下意識就想再撒個嬌一樣就點頭

唉，我真係呀⋯都唔睇下自己咩身份⋯真係仲以為自己係18歲嘅自己咩⋯

⋯

夜晚沖完涼，我喺自己房拎住手機休息，阿逸send咗message比我





「咁夜都未瞓？」「未呀，聽日Day off嘛」

「你就好啦聽日放假，我都想放假⋯」「好快都放啦，星期二唔係你放咩」

「有排都未到星期二」「等幾日，時間好快過啫」

「你做緊咩呀？」「睇緊YouTube」

「見你story po咗婚禮」「今日中同結婚，去飲佢嗰餐」

「幾時可以飲你嗰餐」「有排啦～」

同阿逸嘅對話都係啲日常閒聊，有時講下cafe嘅嘢，有時又講下啲無謂嘢

「叩叩—」





我聽到敲門聲，即刻放低手機去開門，一打開房門就見到阿立著住屋企衫企喺門前

「藥膏，痛就搽啦。」阿立手上拎咗支止痛類嘅藥膏比我

「唔該⋯」我伸手去拎，心入面有一陣暖意流過

「知珩？」阿立見我隻手一直懸喺半空，有啲疑惑咁側頭望一望我

我好似冇意識一樣向前行咗一少步，喺我回神嘅時候，雙手已經攬住阿立嘅腰，頭微微耷低將額頭靠喺佢嘅膊頭上，絕對係一時衝動⋯

「做咩咁突然⋯？」阿立不解咁問我，我都唔知，「做咩事⋯？」

「冇咩，我都唔知⋯」我低聲回答，「真係⋯好奇怪⋯」





「咩好奇怪？」阿立問

「冇咩⋯」我搖搖頭，然後就鬆開手，將阿立輕輕推開同時我向後行咗一少步

我明明知道唔合適，但我都係下意識就做咗唔啱嘅舉動，真係得人驚⋯

「真係冇咩？」阿立輕皺住眉頭，擔心嘅語氣令我不禁撅一下嘴

「你同佢一直都仲有聯絡⋯？」我嘅視線落喺地上拉長嘅影子

「邊個佢⋯？」佢好似因為呢個問題冇指向性，所以唔知道我講咩，但係語氣聽起嚟就係明知故問

「冇嘢⋯」我忽然間唔想追問落去，我緩緩搖頭，淡然開口：「早啲瞓啦，聽日番工。」

我嘅手伸向門柄，打算閂門打斷所有要發問或者再講其他嘢嘅想法，但阿立一手就㩒住門，知道我要閂門所以頂住門唔比我閂

「做咩講一半唔講一半⋯」阿立嘅語氣特別柔和，呢一刻我忽然有種「淨係對我係呢種態度就好」嘅想法一閃而過

「冇，只係因為突然唔想知⋯」我撇開臉冇望佢

阿立沉默不語，但手一直頂住門唔比我閂門，我有時唔夠坦率，但諗深一層，我太坦率係唔係會表現出我太在意？

浩宜要我欲拒還迎，要我比佢知道我唔會得佢一個選擇，要令佢有危機感⋯但都要等到新鮮感散去先知道，到底係真心定一時之間

「我要閂門啦，縮手啦⋯」我輕推門一下示意，但阿立嘅手仍然抵住門，「陣間夾到你隻手⋯」




IG Link: https://www.instagram.com/nd_cotttoncandy/?hl=zh-tw