【愛情】關於我一覺瞓醒發現喺初戀屋企⋯！: 73. 炫耀
我嘅餘光淨係見到游巧盈臉上嘅強顏歡笑，我心中暗喜，贏嘅感覺真係好好，特別喺經人地把口講係我贏
「唔—」「盡量啦。」
我正要否認嘅時候，阿立又搶先我一步代我答埋，今日做咩個個都打斷我講嘢？
「哦～」我地個枱嘅都係同學，個個都即刻笑住點頭，一個已經了解情況嘅樣
我側住頭望住阿立，佢就好似冇事發生一樣微笑，佢瞄我一眼，然後彎腰喺我耳邊道：「望我做咩？」
「你做咩講大話？」我嘅手掩喺嘴前，微微抬起頭問
「你唔係好開心咩？」阿立反問我，我抬眼只見到佢上揚嘅嘴角
「我地又冇真係復合⋯」我細聲咁講嘅同時，用手肘輕撞佢一下
「咁以後再解釋。」阿立轉身坐番低喺櫈上，拍一拍我張櫈示意我坐低
我嘅餘光一直默默咁留意住游巧盈，游巧盈無趣咁行番去自己嘅位置坐低
雖然我向來覺得搵代替品係好差勁嘅事，不過我宜家係有啲幸災樂禍嘅心態
「我真係衰⋯」我都忍唔住喺心入面無奈咁責備自己一句
⋯
婚宴差唔多到尾聲，大家食完甜品又再坐多陣都離開宴會廳
大家企喺酒店大堂等埋一齊走，同學嘛，畢業之後各散東西，好難先見一次，都明嘅
「有啲痛⋯」我耷低頭望住鞋尖
今日因為係婚宴，所以著咗高踭鞋，但可能唔係成日著，隻腳有啲痛⋯
「做咩？」阿立可能見我企得唔自在就湊近我低聲問
「腳有啲痛有啲攰，好耐冇著高踭鞋。」我細聲咁回答，其他人仲喺度傾緊計
「借住力先。」阿立嘅手微微提起示意
「嗯。」我捉住阿立嘅手拉住佢嘅衫袖借力一陣
游巧盈望向我呢邊，我當冇望到佢，佢大概會覺得我係挑釁佢
除咗係我本來就唔中意佢之外，加上上一次仲特登喺廁所講說話比我聽
佢同阿立講咗兩句，我只係企喺阿立隔離捉住佢
大家話走嘅時候，我偶然聽到游巧盈問阿立搭咩車番去，阿立嘅目光落喺我呢邊
「冇所謂。」我細聲講道
轉身走嘅時候，游巧盈唔知咩事，轉個身都可以企唔穩，我望住佢伸手想捉阿立
「搭唔搭的士？」我將阿立拉向我嗰邊轉身指住外面的士站，「我隻腳好痛好攰⋯」
「好呀，我地—」「嗒嗒—」
我聽到兩下高踭鞋聲之後擰轉頭，見到游巧盈踉蹌一下但又好快企番穩，尷尬咁笑一笑
游巧盈收起笑容嘅第一件事係望住我，佢嘅眼神已經係鬧緊我，但我嘅心情爽快咗一下，用力咬緊牙關等自己唔好笑出嚟，邊個叫佢學埋呢啲招數？
大家散啦，我地行出酒店大堂，搭巴士嘅搭巴士，搭地鐵嘅搭地鐵，搭的士嘅搭的士
我先坐入的士，阿立嘅手掩住車門框嘅邊，免得我撞到頭，我坐好扣安全帶嘅時候，阿立坐下嚟坐喺我隔離
我擰轉頭望一眼，望到游巧盈嘅略帶失落嘅背影，我今次就真係嘴角上揚
「開心啦？稍微咁報復咗一下。」阿立用佢低沉嘅聲線開口問我
「咩呀？你嬲呀？」我擺出一個理直氣壯我冇錯嘅樣，將下抬微微抬起望住阿立
「冇，冇嬲，我同佢冇關係。」阿立搖搖頭，聲線都特別平靜
我拎起手機，阿逸同cafe group都有message send嚟
最近阿逸多咗搵我，有啲嘢我始終都係察覺到
我有啲卻步但又唔想表現得太抗拒，始終係同事，番到cafe都要一齊做嘢
只係我怕我會做多咗，令佢又會諗多咗⋯只要佢冇表白，都仲可以係朋友；一旦佢表白，我同佢嘅關係就會變得尷尬，總覺得會同樂恩嘅關係都變得尷尬
雖然樂恩冇講，但我都係可以察覺到樂恩嘅感情，佢特別中意搵阿逸，佢亦特別主動
我都係女仔，都有暗戀過人，所以佢嘅心情我都會明白
車不知不覺就駛到番去屋企樓下，我一步一步退出去落車，一企喺地面就覺得雙腳都冇力，向前行嘅時候什至可以唔小心向前撠咗一下
「小心⋯！」阿立迅速咁伸手捉住我嘅手肘扶住我，「你點呀？」
「冇事，只係著咗高踭鞋太耐，有啲腳軟⋯」我擺擺手後企番好
「嗯，快啲番去除鞋透下啦。」阿立有啲擔心咁皺起眉頭
阿立行喺我前面，可能因為想我快啲番到屋企除鞋休息，佢嘅步伐都有啲急
「呀嘶⋯！」我跟想上佢步伐，但喺我右腳邁出第一步踩到地面嘅時候，刺痛嘅感覺好似閃電一樣由腳踝傳到上嚟
「做咩呀？」阿立即時轉身小跑兩步番到嚟我面前，「係唔係啱啱扭到啦？」
「可能⋯」我皺起眉頭，刺痛感令我成個人都唔敢郁，企喺原地好似比人點咗穴咁
「你行唔行到？」阿立嘅手捉住我嘅前臂扶住我
我嘅右腳微微提起，小心翼翼咁向前行一步踩到前面嘅地：「呀嘶！」
「行到，但痛⋯」我講完都覺得自己講緊廢話
「唉⋯明知自己平衡力唔好，著咁高嘅高踭鞋做咩？」阿立皺起眉頭，用半擔心半責備嘅語氣對我講
「唔高㗎！我對鞋三吋踭嚟⋯！」我即刻反駁道
「三吋仲唔夠？」阿立無言咁側住頭望我，然後嘆氣，「唉⋯手。」
我聽話咁將手遞比阿立，佢將我隻手放到佢嘅手臂上，將佢嘅手臂挽住
「慢慢行番去啦，呢度二十步左右。」阿立遷就我一細步一細步咁行
IG Link: https://www.instagram.com/nd_cotttoncandy/?hl=zh-tw