【愛情】關於我一覺瞓醒發現喺初戀屋企⋯！: 64. 購物日

星期六，中午

「你想食咩？」阿立先將其中一份餐牌掀開放到我面前

「我想食⋯吉列雞排⋯」我將餐牌打直棟起，指比佢睇我要食嘅餐

「好呀。」阿立擰轉頭就叫侍應

同以前一樣，同阿立一齊出去食飯，我淨係要揀食咩餐就夠，其他都係阿立會搞掂





檸檬茶送到過嚟，阿立自動自覺咁將我杯檸檬茶拎到佢自己面前，拎起鐵匙羹戳檸檬

「唔該～」我手上拎住手機，等佢戳好檸檬將佢推到我面前

阿立沉默不語，抬眼望我一眼後，臉上掛住柔和嘅微笑，都唔知佢係習慣定只係順手

「食完嘢去買塊鏡，買點樣嘅好？」阿立問我

「冇咩所謂呀～睇下你想要咩樣？」我飲一啖檸檬茶，將檸檬茶推到一邊，「陣間一齊去睇下～」





我地隔離枱坐咗四個學生，可能係補完課放學，睇起嚟都似高中生

「星期一係唔係有默書？你地溫咗未？」其中一個女仔問，「我未溫，佢勁大段囉！」

「背咗一半，聽日先背嘅話實背唔切！」坐佢斜對面嗰個女仔講嘢嘅語氣有啲輕鬆

「我都未背！我都未！」坐喺先開口嗰個女仔隔離嗰個女仔伸出手，兩人擊個掌

望住佢地，我嘅嘴角不禁上揚，大家仲會講溫咗書未嘅感覺有啲青春，怕自己會成為小組入面考得最差嗰個





「好懷念呀～」我上身前傾湊前對阿立講道，「見到人地仲著住校服好羨慕～」

「你唔係永遠嘅18歲咩？」阿立嘅嘴角上揚，柔和嘅目光同我對視一眼，輕輕一笑

「點同？」我無奈咁嘆一口氣，「以前讀書好似咩都唔洗煩，宜家咩都要煩，我都想一直做小朋友⋯」

「宜家都幾好呀，各有各好啦～」阿立朝隔離嗰幾個女仔望咗一眼，我只係留意住阿立嘅眼神同表情

佢會唔會都諗起以前嘅我同佢⋯？

會唔會記起嗰啲已經離我地好遠嘅記憶？

腦海中會唔會浮現出我同佢嘅笑臉，一切同快樂有關嘅事⋯？

「好似好耐都冇見過你紮馬尾。」阿立將目光收回落喺我身上，佢嘅微笑令我感覺到佢係諗起以前，「平時喺屋企都冇紮起頭髮。」





我伸手放喺後尾枕，由後尾枕順住摸落到我嘅髮尾，我平時番到cafe就會紮起頭髮，但係收工就會解番

「以前番學，長頭髮一定要紮起嘛～」我摸住自己嘅髮尾，「你咁樣一講，我都有啲懷念自己著校服紮馬尾嘅日子～」

我定睛凝視阿立，有一個瞬間，我眼前嘅佢變成中學嘅佢嘅模樣

著住整齊企理嘅校服，目光同我對上嘅時候露出燦爛嘅笑容，喺望我嘅時候，眼神中永遠都會有滿滿嘅溫柔

「以前Miss Ng嘅中文堂真係好正，每日最期待就係上中文堂～」我笑道，腦海中頓時浮現出上堂嘅時候嘅笑聲，「都唔知點解你唔中意上佢堂⋯」

「佢成日都叫人答問題，唔識答又話人唔識答，識答又要追問多題⋯」阿立同我完全係呈相反狀態，「張sir嘅英文堂係可以瞓覺，中六個個星期都做listening，做到耳仔痛，聽到做listening已經攰⋯」

「噗⋯！坐後排嘅都瞓晒，我都最怕佢要做listening⋯聽到都覺得好驚⋯」我疲倦咁搖搖頭，諗一諗以前每隔兩日就做一次listening就覺得好攰





講多兩句，諗多兩諗，就會又覺得以前真係好開心，回頭望一眼，原來我已經同著校服嘅日子拉開咗一段距離

同阿立⋯都分開咗好幾年，我嘅目光悄然落到阿立身上，心入面泛起陣陣嘅婉惜

「咁樣又過咗幾年啦⋯」阿立緩緩開口

我抬眼望佢嘅時候，佢嘅眼神令我忍唔住去諗：「佢係唔係都會覺得惋惜⋯？」

「但應該唔會啦⋯當初提分手都係佢提先⋯」我喺下一個瞬間就撥走呢種猜測，因為腦海浮現嘅係佢講分手嗰陣同之後對我嘅冷漠

我同佢之間，係一個又一個嘅未知數，如果一齊番，係唔係代表唔會再分開？如果又一次分開，係唔係代表我地真係唔合適？

如果最後嘅結果係分開，咁我地嘅最後，又一次變成Bad ending，到時，又會傷咗邊個嘅心？

「諗緊咩？」阿立開口問我，佢嘅聲線傳入我嘅耳中，聽起嚟就同當年嘅佢無異





「冇，冇諗咩。」見到佢嘅溫柔嘅微笑，我將嘴角撐起再搖搖頭

「食完嘢就行啦，慢慢行過去啦。」阿立已經食完，佢飲一啖水沖一沖口，然後就坐喺度等我食完，「你唔洗急，慢慢食。」

阿立不經意嘅一句，又自然咁將我推到以前嘅回憶：佢食嘢永遠都好快，顯得我食到好慢，然後佢次次都會笑住提我唔洗急

「嗯⋯」我耷低頭望住白飯點一點頭

食完飯之後，我地直接向今日嘅目的地出發，入到去仲要兜好幾個彎先可以去到我地要去嘅位

「喺嗰度。」我指住左邊，嗰度放咗大量嘅鏡，「你想買咩鏡？有全身鏡、半身邊，厚身鏡、薄鏡、圓鏡⋯」

「過去睇下。」阿立喺我身邊行過，行過嘅時候仲拍一拍我





我跟喺佢身後行到去各種嘅鏡前面，見到鏡嘅慣性動作，就係會拎起手機對鏡影張相

「知珩，你話呢個⋯」鏡中嘅阿立擰轉頭望向我，下一秒嘅佢走向我企喺我隔離，我嘅膊頭貼住佢嘅手臂

佢好似知道我要做咩一樣企喺我隔離離住我嘅手機螢幕，我望住相機嘅畫面一笑：「笑～」

阿立盯住我嘅手機螢幕露出笑容，我只係影咗一張，然後就收起手機

「你啱啱問我咩？」我抬頭望佢

「你覺得要呢種掛牆嘅鏡好定係放地下嗰種全身鏡好？」阿立指一指我同佢面對住嘅鏡，又轉身指向右邊嘅落地鏡

「掛牆係唔係會好啲？」我望住面前嘅掛牆鏡沉思，「落地鏡嘅話就要打斜放，睇起嚟好似水平線睇好啲？」

「你試下呢個。」阿立拉住我行到去落地鏡前面，「你睇下。」

本來只有阿立身影嘅落地鏡，宜家有我嘅身影，我望住鏡思考，落地鏡好定係掛牆鏡好？

「一齊行傢俬舖，感覺好似好溫馨嘅一家人⋯」我望住鏡中嘅自己，成個腦都係呢樣嘢




IG Link: https://www.instagram.com/nd_cotttoncandy/?hl=zh-tw