【愛情】關於我一覺瞓醒發現喺初戀屋企⋯！: 63. 香水
「睇下到時佢個預告好唔好睇先。」我微笑道，呢個唔係接受亦唔係拒絕，至少我冇一口拒絕佢
「好！」阿逸一口就答應
佢嘅心情從來都好明顯，正常嘅時候係冇面情但感覺到寬容；開心就笑；唔高興就黑面；煩躁就真係生人勿近嘅氣場
都算係做咗好一段時間嘅同事所觀察到嘅事？
「原來我都喺cafe做咗兩年幾⋯」我一時間有啲感概，「啱啱嚟嘅時候都係你教我沖咖啡。」
「你都做咗兩年幾啦？」阿逸稍微回想一下，「宜家都可以自己一個處理到水吧，仲可以帶個新人，叻女啦～」
「冇你咁叻，你咩都識，cafe入面嘅嘢都係你打理。」我禮貌咁將讚美推番比佢，不過我講嘅都係事實嚟
我啱啱嚟cafe嘅時候，都係跟住阿逸學嘢；佢好早就喺cafe做，沖咖啡又好、整甜品又好、煮嘢都好，個個都係跟住阿逸學
相反我好少見到店長，我喺度都做咗差唔多兩年多啲，但都好少見到店長
「店長真係好信得過你就真。」我微笑道
「佢？佢梗係信得過我，如果唔係都唔會放手比我負責。」阿逸露出淡淡嘅笑容，「我都唔係一開始就咩都識，都係慢慢學起。」
「但你整甜品真係好叻！」我都忍唔住感歎道，「限量甜品真係日日多人叫，日日賣晒！」
「嗰陣我啱啱學整甜品嘅時候，整個海綿蛋糕都試咗好多次，店長都硬食咗好多失敗品～」阿逸回想起以前嘅時候，臉上嘅笑容都特別燦爛，「你沖第一杯咖啡嘅時候，都好慘不忍睹，宜家咪又係好好，拉到好靚嘅花？」
「都係跟你學番嚟。」我垂低頭，的確，我嘅基本都係跟阿逸學番嚟
「沖咖啡又好、整甜品都好，都要用真心去沖去整，因為客人會食得出當中嗰份真誠；客人食得開心，整嘅人都會開心。」
當時阿逸教我沖咖啡嘅時候，語重心長咁樣同我講咗呢一句，我到宜家都記得佢講嘅時候嗰個認真嘅樣
當下我淨係覺得：「呢個人好認真，點解可以又識整甜品又識沖咖啡，仲識拉好睇嘅拉花？我係唔係都可以做到？」
「你當時講嘅嘢，我到宜家都仲記得，而且我都覺得你講得好啱。」我認真咁同阿逸對視，「出嚟做嘢未必真係會做到自己想做嘅，但既然做到，就要用心去做。」
「咁耐都仲記得？」阿逸露出訝異嘅笑容，「呢個都算係我嘅⋯番工座右銘？」
「我覺得你講得好有道理。」我微笑回應佢，「下下為錢嘅話，人生會好悶。」
列車駛入月台，喺兩聲提示聲之後車門打開，我同阿逸行出車廂
「今日⋯送到呢度得啦。」喺行到閘口嘅時候，我停落嚟望向阿逸講道，「今晚都夜啦，你都快啲番去休息，聽日要番工。」
「唔⋯」阿逸提手望一望手錶，露出禮貌嘅微笑點一點頭，「好啦，咁你番到去同我講聲？」
「嗯，好呀。」我點點頭，伸手拍一下佢嘅手臂，「快啲番去啦，聽日番工！你係我地嘅好榜樣嚟，唔可以遲到。」
「知啦～」阿逸無奈咁側頭對我笑，「番去啦。」
我拎出八達通，行出閘之後我再擰轉頭望一眼，阿逸仲企喺原地，我對佢揮揮手
佢朝我抬一下下巴，揮一揮手，我諗我轉身走嘅時候，佢應該都轉身走啦
「我番緊嚟，啱啱出地鐵站」我send咗個message比阿立同佢講聲，陣間佢又要嬲
我急步行番屋企，番到屋企門口嘅時候都喘緊氣⋯
「咔—」我扭動鎖匙開門，㩒低門柄之後推門入屋
一入到屋就見到阿立坐喺餐枱前望住電腦做緊嘢，阿立聽到開門聲就朝我呢邊望一眼
「我番嚟啦。」我自然咁開口講咗句慣性口頭禪
「嗯，番嚟啦？」阿立以平靜嘅語氣開口答我一句
「你仲做緊嘢呀？」我見佢一直望住電腦，下意識就開口問佢
「唔係呀，睇緊片只係。」阿立搖搖頭
我每次番嚟嘅時候都會見到阿立坐喺同一個位置，帶住電腦坐喺面向門口嘅位置
今次同樣嘅情況，令我忍唔住去諗，佢係唔係因為我未番，所以坐喺呢度等我番嚟⋯？
「戲好唔好睇？」阿立合上電腦，帶住微笑問我
「好睇呀～好刺激！」我連忙換上拖鞋，拉開佢隔離嘅櫈坐低，同佢分享今日套戲有幾好睇，「睇到我都好緊張！不過唔知佢會唔會出續集就係⋯」
「你今日⋯噴咗香水？」阿立忽然眉頭一皺，本來臉上輕鬆悠閒嘅笑容收起，將我由頭到腳打量一次
「香水？冇呀，我番工都唔噴嘅。」我有啲不明所以嘅望住佢搖頭，「可能係一齊睇戲嘅同事嘅香水掛～」
我再次抬眼嘅時候，阿立只係安靜咁望住我，佢嘅眼神令同佢對視嘅我下意識將目光移開
「你聽日唔係要番工咩？仲唔去沖涼瞓覺？」阿立將電腦合上，伸手喺我嘅額頭上輕拍一下
「哎吔⋯！」我嘅指尖輕掂住額頭，朝阿立一笑，「都係。」
我孭住我個袋起身番房，擰轉頭望一眼嘅時候就見到阿立將佢嘅電腦拎起番房
「唉～」我嘆一口氣，但冇覺得好攰，只係發口痕嘆個氣，「沖涼先～」
我企喺廁所嘅玻璃鏡前面，將身上嘅衫都除落嚟
「香水味⋯應該係阿逸嘅香水味⋯」我將T-shirt拎喺手中，但冇將衫放到鼻前嘅打算，「阿立聞到啦⋯？咁即係估到我同邊個睇戲啦⋯？」
算啦，唔諗啦，佢估唔估到都好，佢⋯又冇得話啲咩⋯
「唉⋯真係好複雜⋯」我喺將頭髮綁起嘅時候低聲嘆氣，「點解感覺好似我係渣女一樣⋯？」
算啦算啦，渣女就渣女啦，我單身又有咩所謂⋯？我又唔係出軌⋯？只係有選擇就認真諗清楚咁解？
「星期六快啲嚟啦～休息日～」我心入面都係比較期待休息日到
IG Link: https://www.instagram.com/nd_cotttoncandy/?hl=zh-tw