【愛情】關於我一覺瞓醒發現喺初戀屋企⋯！: 34. 照片
「好混亂⋯搞到我都唔知自己做緊咩咁⋯」我將疊相疊番好握喺手中，「如果冇見番佢就好啦⋯」
所有塵封起嚟、唔願去觸碰嘅回憶就喺我打開鐵盒嘅時候一湧而上，當初嘅心動、開心、傷心、難過嘅感覺一次過湧出嚟，我又攞番嗰啲我收起咗嘅感覺
「所有事都要重新嚟過先可以啦⋯」我將疊相放番入鐵盒入面，「阿立應該冇再keep住呢啲嘢⋯」
以阿立嘅狠心，佢應該一早將所有嘢都執走晒掉晒去垃圾桶
「如果佢仲有留起呢啲同我有關嘅嘢嘅話⋯」我忍唔住諗到呢個問題
唔好諗唔好諗⋯！你宜家同人地住喺同一間屋，點可以諗呢啲嘢？諗完之後又會唔知點面對佢⋯！
「李知珩，夠啦！唔好再諗以前啦！你同佢過咗去㗎啦！」我坐好個人，冷靜咁喺房入面對自己講，「你同佢唔係小朋友，要劃清界線，唔可以過界㗎啦！」
唔⋯咁樣講完之後，唔知點解我自己會有啲心虛⋯？邊個普通嘅異性朋友會餵對方食嘢、會攬呀⋯！
「李知珩！你醒下啦！你同佢係過去嚟㗎啦！」我雙手拍一下自己嘅臉頰，「過咗去啦！人地仲要識女朋友！點可能為你一個人停留？」
我垂低手望住眼前嘅鐵盒，係呀，我地都一早向前行，行行下又點會突然擰轉頭望⋯？都分開咁耐啦⋯
阿立對我嘅狠心係我冇諗到，但亦係因為佢嘅狠心，我就知道佢唔會為我停低⋯佢會繼續向前行，佢會好快咁放低我⋯
「知珩，出嚟食飯啦！」媽咪行到我房門口叫我
我將鐵盒嘅蓋蓋番好，放低手上嘅嘢行出房，順手將房門閂埋
⋯
我行出地鐵站行番屋企，一行出地鐵站，就見到阿立企喺斑馬線前面等緊轉燈
「阿立！」我趁轉做綠燈前上前拍佢，「你咁晏仲喺度嘅？」
「強制開OT⋯」阿立完全係一個攰樣，「幫同事執手尾⋯」
「喂喂，我媽咪煲咗湯，叫我拎番嚟同室友share。」我遞起拎喺手中嘅保溫壺，「你飲唔飲呀？番到去之後。」
「阿姨煲咗湯比你拎番嚟咁好呀？」阿立望咗我手上嘅保暖壺一眼
「本來媽咪話比我同靖佑，不過睇嚟要益你啦～冇靖佑份啦⋯」我扮無奈咁望住保暖壺嘆氣，然後望一望阿立
「咁冇辦法，為咗唔好浪費阿姨嘅一番心血，我會飲埋靖佑嗰份。」阿立微微點頭
⋯
我同阿立坐喺餐枱前飲湯，媽咪喺我走前特登再翻熱啲湯一次，所以就算番到嚟，湯飲起嚟都係熱辣辣
不過，兩個人好安靜，一粒聲都唔出⋯感覺氣氛好尷尬⋯成間屋都好靜，除咗飲湯嘅聲之後係完全冇其他聲
「話說，我今日番屋企食飯，搵到啲中學嗰陣嘅嘢⋯」我細細啖咁飲咗少少之後先一步打開話題，想打破呢種尷尬感，「係呢～你仲有冇留起中學嘅嘢？」
我有啲想知道，到底阿立有冇留起以前中學嘅嘢⋯帶住私心去問一個問題，喺等答案嘅時候真係會特別緊張，心跳嘅頻率都會有啲唔一樣
「有啲有，有啲掉咗。」阿立諗咗一諗，然後再開口答我
「哦⋯」我心入面失落咁一下
佢掉嘅嘢，應該係同我有關嘅嘢啦⋯我其實預咗，只係聽到佢嘅回答，我都係有啲忍唔住失落啫⋯
「你留起咗啲咩？有冇帶番嚟？」阿立忽然間問起，仲要問我有冇拎番嚟
我真係留起嘅嘢都唔多，不外乎都係以前同朋友嘅合照、收到嘅聖誕卡呢啲，但我特別留起放好嘅，就只有同阿立相關嘅嘢
但呢啲嘢，我點可能同佢講？
「太多啦！點帶過嚟！？」我笑一笑講道，忽然間醒起媽咪幫我執咗本相簿過嚟，「不過有本相簿，比媽咪執咗過嚟比我⋯」
我好快咁將湯飲完，起身行入房將相簿從書櫃入面抽出嚟，但喺我想轉身行出房嘅時候，雙腳好飲痴實咗喺地面咁郁都唔郁
「就算係睇都唔緊要，我Okay⋯」我嘅手放喺相簿嘅封頁上面，心入面默默對自己講，「所有人都有過去㗎啦⋯！我唔通一直都要當冇呢件事咩？一齊過咪一齊過，又有咩大不了？」
我深呼吸一口氣，然後拎住相簿轉身行出房
「登啦～」我拉開阿立隔離張櫈坐低，將相簿擺喺枱上面
「相簿？」阿立右手捧住碗，騰出嚟嘅左手伸手掀開相薄，「睇下。」
佢掀開相簿嘅第一頁，空氣都靜咗一下，佢由呢邊掀起，第一頁就已經係我同佢嘅合照⋯
可以貼四張相嘅一頁，我淨係貼咗一張相
「呢個係⋯學校open day影㗎⋯」我弱弱咁講咗一句介紹一下呢張相
「我知，你當我失憶呀？」阿立自然咁掀去下一頁，指住左上角嘅相，「呢張係sport day啦，我記得！」
「著住PE衫又喺運動場，點唔係sport day？」我雙手托住下巴笑住反問佢，「睇番啲相就覺得宜家自己好老⋯」
我望住當年先17、8歲嘅自己，再望下宜家已經25歲嘅自己，真係歲月不饒人呀⋯咁快又到20中嘅年紀，轉個頭又話已經30歲，我都想係永遠嘅18歲⋯
「都係嘅，你宜家唔化妝都得，嗰陣有人仲話寧願素顏都唔化妝～」阿立望住啲相笑住咁講我
「我宜家唔係素顏咩？唔係咩？」我不滿咁伸手輕打咗阿立嘅手臂一下，然後稍微湊近佢，雙手指住雙眼：「我連con都冇戴！你睇清楚！」
「睇到睇到，都係好清澈。」阿立又真係認真咁湊過嚟睇，「又真係素顏喎～」
「邊有人喺屋企都化妝？」我反咗個白眼，耷低頭望一望呢一頁嘅相，「又唔係有咩唔比得人知嘅秘密⋯」
「你啲秘完講咗出嚟就會破壞形象啦～」阿立好似隨口講一樣講咗個玩笑，「嗰年我地班嘅班衫都真係幾靚～」
「宜家睇番相，就覺得以前好青春～真係好呀～」我伏低喺枱上面，望住一張一張嘅相就有啲掛住以前嘅日子
我轉頭望向阿立，佢將碗放喺枱上面專心咁掀相簿睇相，我每眨一下眼，就會有一個同佢有關嘅回憶彈出嚟
IG Link: https://www.instagram.com/nd_cotttoncandy/?hl=zh-tw