【愛情】關於我一覺瞓醒發現喺初戀屋企⋯！: 30. 稱呼

「我覺得你買咁多薯片我每隻都會開嚟食⋯」

我諗起啱啱知珩望緊薯片嘅時候講咗句

「真可怕⋯」我收回視線同時搖搖頭，「一見番面真係不得了⋯所有嘢又變番做習慣⋯」

我仲以為嗰啲小事已經唔記得，但原來佢地冇被遺忘，只係收埋喺海馬體入面⋯喺我再見佢嘅時候，塵封嘅記憶同習慣又會出番晒嚟⋯

有時同一個人之間快樂嘅回憶太多都唔係一件好事，因為會令到有好多嘢都可以牽動到你嘅情緒





「太多嘢變咗啦⋯」我喺心入面對自己講，「又有太多嘢好難解釋⋯」

⋯

⋯

⋯

「呼⋯」我輕呼一口氣，終於吹完頭啦，「好攰⋯」





阿立話佢買咗薯片番嚟，我打開個袋睇嘅第一感受係：「全部都係我中意食嘅薯片⋯！」

有一刻我喺度諗，阿立其實⋯係唔係特登買我中意嘅味番嚟，佢係唔係都記得⋯？

如果佢唔係，我只可以話可能係佢轉咗口味，但如果佢係嘅話，我覺得我會忍唔住笑意，開心一下

「到底我諗緊啲咩⋯」我拎住把梳，望住鏡入面嘅自己

同阿立一齊住之後，我就有啲搞唔清到底我諗緊咩⋯有時好自然嘅動作令我覺得我同佢好似變番親近；有時又覺得，我同佢之間嘅界線好似好模糊；有時又會覺得⋯好想同佢有接觸，想證明佢唔討厭我⋯





「唉⋯點解我會咁樣⋯向前望唔好咩？」我摸住自己嘅頭髮問自己

可能⋯對所有人嚟講，什至對我自己嚟講，成件事嚟得好突然，但，感情唔係可以控制嘅事⋯

見番佢、同佢同一屋簷下之後，我⋯會好想去證明，我同佢仲係親近⋯

我唔知我要證明比邊個睇，可能係希望話比自己聽，當初阿立要分手、要不辭而別，唔係因為佢討厭我⋯

「再咁樣想證明，我會又沉落去⋯」我已經感覺到自己好似會喺唔知邊一日又沉落去

呢種個心囉囉攣嘅感覺已經好耐冇出現，好難實際形容係咩狀況，但大概係見到佢嘅時候就好自然有呢種感覺⋯

嗰日諗起以前嘅事，嗰份快樂令我好難受，難受到忍唔住喺街已經有啲鼻酸想喊⋯

我好努力咁抬頭，想將眼淚收入去，但係愈想冷靜，我就愈想喊





嗰日嘅我好醜，我明明番到屋企樓下，但我最後因為眼淚同嗰啲開心嘅回憶一湧而出，我坐喺樓下喊完先上番嚟

「拜托唔好再發生⋯」我用手拍自己嘅額頭，將呢個想法拍入我個腦入面，「喺街度喊真係好醜㗎李知珩⋯」

我行出廁所行去廚房掉衫，行到去廚房門口就見到阿立好Chill咁企喺櫥櫃枱前批緊蘋果

「許翊瑜。」我帶住嘗試嘅性質開口叫出呢個我冇叫過好多次嘅名

「係⋯？」阿立顯然地有啲唔識比反應，佢遲疑又小心咁回答我

「冇，就係想試下叫你全名。」我望到佢嘅反應嘅時候耷低頭笑咗一笑，佢嘅反應同我想像中嘅反應差唔多

「Okay⋯」阿立露出一個無言以對嘅笑容，稍微瞄咗我一眼





「聽起嚟好怪呀可？」我笑問，「我自己都覺得好怪。」

「聽起嚟好唔自在。」阿立都笑言，佢唔慣我咁樣叫佢全名，「你都冇咩點叫過我全名，呀～有，你入錯房瞓仲鬧我嗰次⋯」

「Sorry～我真係冇心，我真誠咁向你道歉⋯」我雙手合十放喺臉前，合埋雙眼表示我係好有誠意咁道歉

「聽慣你叫阿立，叫全名聽起嚟好似要準備鬧我咁⋯」阿立將蘋果切好一件件放喺碟上面，然後將碟推到我面前

「睇下順唔順口嘛～」我拎起一件蘋果擺入口咬一啖，「不過講完都覺得唔順口，都叫咗咁耐～」

「隨你中意點叫啦～」阿立洗乾淨把刀，然後伸手拎件蘋果，「都冇咩所謂。」

「不過嗰陣，你唔係唔中意人地咁叫你咩？」我望住佢咬住個蘋果，但因為騰唔到手出嚟只可以咬住食唔到

阿立抬起頭，將蘋果咬一啖，自動跌落去嘅時候又咬一啖





「其他人真係唔好，但我體諒你中文差。」阿立望一望我，從佢嘅眼神中我睇得出，佢笑緊我

「邊個中文差？」我唔忿氣咁挺直腰板企問佢

「你呀。」阿立望住我露出笑容，「你中文差。」

「我邊係⋯！」我反駁佢

「得啦，你改口嘅話聽起嚟會好唔習慣。」佢搖搖頭，伸手又拎一件蘋果放入口

「許翊瑜你仲食唔食？」我拎問佢

「做咩又叫我全名⋯」阿立無語咁笑問我，「好驚呀突然間⋯！」





「我就係普通咁叫一叫你咋嘛～」我跟住佢一齊笑，「你做咗虧心事咩？做咩咁驚？」

「冇做虧心事。」佢只係微微聳肩，側住頭望我，「只係聽唔慣。」

「哦～」我笑一笑點頭，拎起一件蘋果又擺入口

其實蘋果可以拎出廳先食，但我同佢都冇拎起碟行出廳，一直企喺洗手盆前面食蘋果；我小心翼翼咁抬眼望向佢，想睇下呢一刻嘅佢係咩表情

「只係食緊蘋果⋯」我默默咁收回視線

我瞄一眼玻璃碟，碟上面仲有一件蘋果，我又望一望阿立，佢同我做緊同樣嘅嘢，都係望緊嗰件蘋果

「你食埋啦。」「你食啦。」

我同佢異口同聲開口，我地對望咗一眼，然後都因為呢個突如其來嘅默契而笑起嚟




IG Link: https://www.instagram.com/nd_cotttoncandy/?hl=zh-tw