【愛情】關於我一覺瞓醒發現喺初戀屋企⋯！: 29. 零食

「吓～」Ella即刻用佢最拿手嘅招數：嗲

佢對其他同事都係咁，唔係淨係對我，不過我唔太受呢套，因為我講嘅都係佢應該要做嘅嘢

「放工前執好啲相。」我直接無視佢嘅撒嬌，喺佢再開口前我起身離開位

「哦⋯」佢見佢嘅招數冇效，唯有乖乖地執番好啲相

所以話，有時都唔知到底係佢係我助手，定我係佢助手⋯





一行入茶水間就見到Mavis企喺雪櫃隔離好chill咁飲緊水

「咁得閒買埋咖啡先番嚟呀～」Mavis見我行入去就即刻問我，「今日係唔係嗰個女咖啡師？」

「嗯⋯你想點？」我拎住水杯行去飲水機前彎腰，「你又想起識人？」

「靚女都係好cool、沉默寡言⋯」Mavis一提起就忍唔住要嘆氣，睇起嚟佢仲未同到知珩講嘢，下一秒嘅佢忽然間伸手打咗我一下：「如果有咁靚嘅女朋友，真係即刻心定晒！」

我聽到佢後半句之後好想對佢反白眼，但我冇咁衰，只係我知道中意玩嘅人先唔可能輕易咁因為一個人而停落嚟





「咁你加油啦～」我飲咗啖水，淡淡然咁同Mavis講，「識到佢再同我講～」

雖然我同佢講加油，但喺我個人嚟講佢唔會識到知珩，特別係上次見到佢一直撩知珩講嘢，知珩臉上嗰個表情，我就知道Mavis唔會識到佢

「你下次要唔要同我一齊去嗰間cafe買咖啡？」Mavis見我行出去，佢即刻跟上嚟攬住我膊頭好似好friend咁

「我拒絕。」我望向佢，微微一笑，「要溝女自己去。」

「你就唔想識下女仔咩？呢啲年紀就應該識下女仔～」Mavis側住頭細聲咁同我講，佢嘅語氣聽起嚟就好似我同佢係同一類人一樣咁，「可能好彩可以識到佢做女朋友呢～最多我唔同你爭啦～」





吓⋯？我點解要同你爭⋯？望住佢呢個理正氣壯嘅渣男笑容，我突然間好想坦白同佢講，佢一直想識嗰個咖啡師同我係識嘅，而且我地拍過拖，不過呢啲嘢，同同事冇必要講出嚟

「唔洗啦，我唔同你爭。」我撥開佢隻手，直接拎住杯水快步行番埋位

我咁樣講，只係單純咁覺得我冇同Mavis爭嘅必要，畢竟就算Mavis要追都應該難追到

我行番埋位坐低，仲未收工，所以我都係要繼續努力工作啦～

「唉⋯聽日又要出去影相⋯」我望住枱頭嘅schedule，聽日又有其他影相schedule

公司好多要影相嘅project基本上都係我一個人做，所以忙起上嚟嘅話我真係連去廁所嘅時間都冇，識分身都搞唔掂

今日我成個晏晝都喺公司做嘢，再執多幾張相之後望向落地玻璃窗外嘅時候，外面嘅天都變咗深藍色，原來都過咗日落啦⋯

「嘩～搞掂啦～」Ella大聲慨嘆起嚟，對我招手叫我望一望，「阿瑜～我搞掂啦～連埋今日要嘅嗰份都搞掂啦～」





「Okay⋯Okay⋯都Okay，等交上去之後睇下阿姐要點改啦～」我逐張好快咁睇咗一次，佢搞掂咗啲嘢我都鬆一口氣，「時間差唔多，收工。」

我拎埋袋起身去打卡收工，Ella小跑上嚟跟喺我後面打卡

落到大堂之後，我同Ella行出公司所在嘅辦公室大樓，但我地向唔同嘅方向行，佢去搭巴士，我去搭地鐵

「陣間番到去要唔要去超市買啲麵包⋯？」我行行下嘅時候，突然間諗到麵包，「番工前食個包都唔錯，有早餐落肚⋯」

喺番到屋企附近嘅時候我兜路行去超級市場，行到入去嘅第一件事係拎個籃先，免得陣間拎到成手都係嘢

「買咗麵包先⋯」我低聲咁提自己一聲，要先行去睇咗麵包先

因為我怕我最後拎住個籃去比錢嘅時候會唔記得咗自己本來係要買麵包⋯但發生嘅機會好微，不過喺我有可能唔記得前都係做咗先啦～





「方包⋯餐包⋯唔⋯」我望住架上嘅麵包有啲三心兩意，拎住兩款包揀嚟揀去，「方包啦⋯」

我拎住袋方包轉身行開，但會唔會餐包好啲⋯？但我又中意食方包多啲⋯唔⋯

「算啦⋯」我轉身行番番去，一手將方包放番上架，然後將餐包拎落嚟擺入籃

我又行前幾步去其他嘅貨架前睇下其他零食，有時想食零食嘅時候都冇嘢好食，買番幾包薯片番屋企都好

「買咩好⋯」我企到去擺滿零食嘅貨架前嘅時候又開始猶疑起嚟，由左到右望過去，然後又由右望番去左，隨手拎起一包薯片，「呢個兩包啦⋯」

我拎起兩包燒烤味嘅薯片，然後又拎咗兩包蕃茄味嘅蔬菜條，又拎多幾盒百力支擺入籃入面，最後我都係買咗啲零食同麵包番屋企

「咔—」屋企嘅大門喺一聲開鎖聲之後打開

「我番嚟啦～」知珩推門行入嚟，佢今日好似心情好好





「歡迎番嚟。」我坐喺餐枱前望一望佢，今日我又係喺廳睇電腦

「唉～今日好忙呀⋯夜晚突然好多單⋯」知珩邊除鞋邊自顧自咁抱怨起嚟，「做死人真係⋯」

知珩除鞋行入廚房洗手，然後行出嚟廳，佢一眼就留意到我放喺枱上面嘅大膠袋

「我買咗啲零食，你想食嘅話可以食。」我開口同佢講一聲，然後伸手打開膠袋，「買咗餐包，你都可以食。」

「好呀～」知珩點點頭，然後打開膠袋望，「嘩～有蔬菜條！」

佢拎咗包蔬菜條出嚟遞比我睇，明明係我買番嚟，但係佢嘅舉動睇起嚟好似話比我知袋入面有蔬菜條咁

「仲有百力支！」知珩一個興奮嘅表情，唔知仲以為呢個袋係百寶袋，有咩寶物喺入面





「嗯，你中意就開嚟食啦～」望住佢開心嘅表情，我都好自然咁笑一笑

「我覺得你買咁多薯片我每隻都會開嚟食⋯」知珩輕輕咬唇望住袋入面嘅薯片，然後拎出手機，「我同你AA啦～過番數比你～」

我咩都未講，手機已經震一震話我知有人過咗數比我

「呢個蔬菜條我真係超中意食！」知珩拎住包蕃茄味嘅蔬菜條愛不釋手，一直拎住，「我陣間要食一包！」

佢講完即刻跑番入房，我靠落櫈背朝佢房望一眼，佢好快攬住啲衫跑番出嚟衝入廁所

「又冇人同佢爭，洗唔洗咁趕⋯」我望住閂埋嘅廁所門無奈咁笑

我擰轉頭望番電腦嘅時候，餘光留意到打開咗嘅膠袋，我望到入面所有嘅薯片




IG Link: https://www.instagram.com/nd_cotttoncandy/?hl=zh-tw