【愛情】關於我一覺瞓醒發現喺初戀屋企⋯！: 26. 空位

「朱古力啦朱古力啦！」阿逸拎起個朱古力夾心嘅Macaron遞到樂恩嘅嘴邊，「小朋友就食朱古力味啦！」

「我22歲啦！仲小朋友呀？」樂恩向前開口咬住阿逸拎喺手上嘅Macaron

見到呢一幕嘅我忍唔住瞪大眼，本來嘴角都要準備上揚，我好快就抿緊唇忍住笑容，嘩～呢啲咪偶像劇情節？

但我一直都覺得，可以話係察覺到樂恩係有少少中意阿逸，我覺得唔出奇，阿逸又好似大哥哥嘅形象，份人細心、溫柔而且又識整甜品，所以樂恩會中意佢都好正常

「不過對你呢啲就嚟30嘅人嚟講，我都算係小朋友嘅～」樂恩笑嘻嘻講道





「你乖乖地食Macaron啦⋯」阿逸似乎都唔識反駁佢，拎起成碟Macaron遞比樂恩

樂恩拎咗兩個然後就行咗去廚房，阿逸無奈咁叉住腰望我，我笑而不語聳肩

阿逸行入嚟水吧，踎低喺放甜品嘅玻璃凍櫃前執一執啲甜品嘅位

我突然感覺到拎住喺手嘅手機震咗一震，我嘅注意力即刻就去咗手機度

浩宜：今晚一唔一齊食飯，等你收工，食你上次話想食嗰間





上次本來想同浩宜試嗰間日本菜，但最後我地都約唔到時間見面所以一直冇食到⋯

「好！餐廳見啦」我二話不說即刻答應咗

⋯

我收工之後直接起咗餐廳，我到嘅時候浩宜已經坐喺度等緊我

「點呀？我聽靖佑講話你同男仔合租，點呀點呀？」浩宜一合埋餐牌就忍唔住要八卦我，「靚唔靚仔？咩樣㗎？」





「唉～靚仔，靚仔呀～」我無奈咁嘆氣，「咩樣呀？我初戀個樣囉⋯」

我就知道我嘅浩宜最關心我呢啲事，都唔關心下我番工攰唔攰之類⋯

「即係點？」浩宜get唔到我講緊咩，我又嘆多次氣

「字面嘅意思，就係宜家同緊我一齊住嗰個男仔，就係我以前同你提過嗰個中學嘅男朋友⋯」我托住頭講道，「嗯⋯就係咁⋯」

「就係你話過你好中意嗰個？」浩宜一個難以置信嘅表情望住我，「咁你地有冇點呀？」

「冇點，可以點？」我搖搖頭，「就係一齊住，仲可以點？」

「你係唔係仲係咁中意佢？」浩宜突然咁樣一問，我有啲措手不及，即刻就唔知要點答

「唔⋯就係⋯」我個腦就係空白一片，好似突然諗唔到形容詞去形容一樣，「呃⋯唔識講⋯好難形容對佢係咩狀態⋯」





「會唔會有機會一齊番？你既然咁中意佢嘅話⋯」浩宜側住頭望我

「冇諗呀⋯唔想去諗⋯」我自己都突然間有啲迷惘，「諗嚟都冇咩意思⋯」

「咁你地平時點樣？」浩宜問

「好普通咁相處，冇咩好特別⋯」我邊回想邊搖頭，「算啦，順其自然啦～」

「以我嘅經驗嚟睇，講得出「順其自然」呢四個字，多數都係心入面好在意，但係無能為力。」浩宜講道

「咁唔係我可以點⋯？先唔講我點諗，佢嘅想法都唔係我可以控制⋯」我解釋道

「你嗰陣大學嗰兩個勁快就散咗啦～阿遠就耐啲，但佢都係唔到你嘅標準～」浩宜搖搖頭，無力一笑，「明明阿遠做咗咁多嘢討你歡心，你偏偏就有感動冇心動⋯」





「你都有好多男仔為你做好多嘢啦，又唔見你真係心動下？」我冷笑一聲

浩宜喺我眼中完全係嗰種生得靚、多人追、超有魅力嗰種靚女，但我地浩宜偏偏唔想安安穩穩咁同一個人喺埋一齊，佢個心仲係中意玩⋯

「我真係唔明，佢都對你咁狠心啦，你點解仲要留個位比佢？」浩宜托住下巴，對我擺出一個高冷臉問道，「你就唔可以放低然後開開心心咁識其他人咩？」

「我冇特登留個位比佢⋯」我望一望周圍，「但⋯呃⋯唔⋯唔識解釋，但我唔係要特登為佢留位⋯」

我嘅語言組織能力突然出咗問題咁，大腦完全組織唔到要點樣解釋，成件事點解會咁難

我其實冇為佢預留一個位置，因為由佢粒聲唔出搬走，不辭而別嗰一日開始我就預咗，我同佢唔會再見

今次嘅再見，係我意料之外嘅事，我都冇諗到我同佢真係會再見，我點會為一個唔知會唔會再見嘅人留個位⋯？

「如果你遇到一個你好中意嘅人嘅話，你就會明⋯」我嘅指尖掂住玻璃杯嘅杯身，水珠沿住玻璃杯嘅弧度滑落嚟，喺撞到我嘅手指嘅時候變成一細灘水，「有啲感覺唔係你可以決定話有就有、話放棄就放棄⋯」





向來都話初戀難忘，但難忘嘅唔係因為呢個人係你嘅初戀，而係因為你對呢個人嗰種心動感覺係冇可能喺其他人身上再次搵到

「你知我中意自由，冇人話一定要有男朋友先會開心～你睇下我～我冇拍拖，自己一個，但我都好開心～」浩宜拍一拍自己心口笑道

明明有好好嘅條件，但浩宜偏偏唔想拍拖，偏偏中意自己一個⋯為嘅係嗰份無憂無慮咁玩嘅自由⋯

「嗯嗯嗯⋯」我敷衍咁點點頭，「好呀好呀～期待你以後搵到中意嘅人嘅時候會係咩樣啦～」

「以後再講啦～我宜家冇咩想法就係啦～」浩宜毫不在意咁聳肩，「你諗下你同呢個人繼續一齊住嘅話會變成點好過啦～」

「可以點，咪就係合租人。」我以平淡嘅語氣講道，「我同佢又唔可能⋯唔知道，但我地都係對方嘅過去啦唔係咩⋯？我同佢都已經向前行，又點會突然掉頭⋯？」

「你甘心？咁難得先見番，你心入面就冇少少想法？」浩宜用質疑嘅語氣問我，仲要做埋手勢，「你冇又知佢都冇？小學同學、中學同學、初戀，可以話放就放？」





「唔知呀⋯！你唔好令我更加唔知點咁⋯」我選擇咗終止話題，唔再討論落去，「唔可以再喺呢個話題繼續啦⋯我地講下其他嘢好唔好？」

浩宜講嘅嘢好似叫緊我向前行，但同時又要我回頭望一下過去，搞到我都唔知我要點先好⋯如果諗完咁多嘢之後，我番到去就冇辦法好平靜咁面對阿立⋯

食完飯我搭車番屋企，落車之後我散住步慢慢行番去，風迎面吹嚟，但浩宜講嘅嘢都牢牢咁記喺我個腦入面

「唉⋯」我忍唔住嘆氣，「好掛住以前嘅日子⋯」

比浩宜咁樣講一講之後，本來就已經有啲迷惘嘅我，宜家更加唔知自己諗緊咩⋯

「好掛住以前嘅一切⋯」我邊苦笑邊行，腳步都隨住掛到我臉嘅苦笑而變到有啲沉重，「以前嘅所有嘢都好好，我好好、阿立好好、我同阿立都好好⋯」

喺行番屋企嘅短短路程上，我諗起嘅都係以前嘅快樂，但快樂好短暫⋯明明只係短短嘅一年，但對我嚟講就係冇辦法抹走嘅一年

「哈⋯」我抬起頭輕呼一口氣，唔知點解忽然間有啲眼濕濕嘅感覺

明明係諗起開心嘅事，但我就有啲心酸⋯但我唔可以喺大街上面喊咁醜，因為我個妝會花

「唔好諗唔好諗⋯！」我對自己講道，「過咗去啦過咗去啦！」

可能係因為，開心嘅事會有唔開心嘅事伴隨而嚟⋯

我企咗喺原地抬起頭想冷靜一下，唔開心嘅事可唔可以好似粉筆字一樣抹咗佢就算⋯？原來真係唔可以⋯

「最衰都係浩宜一直喺度講⋯」我低聲抱怨咗一句

一定係因為浩宜一直講一直提一直問，搞到我一直諗一直諗一直諗，成個腦都係以前嘅事，都番唔到嚟宜家呢一刻




IG Link: https://www.instagram.com/nd_cotttoncandy/?hl=zh-tw