【愛情】關於我一覺瞓醒發現喺初戀屋企⋯！: 25. 錯覺

夜晚

食完飯之後我地都各自番房，等到差唔多到10點嘅時候，我先拎住換洗嘅衫褲行到去廁所門口，聽日仲要番工，今日休息完，聽日又要番工

「叩叩—」我先敲一敲門

唔⋯冇人應門，即係冇人啦，咁我開門啦～

喺我扭動門柄要推開門嘅時候，廁所門忽然間由裏面拉開





我比突然間嘅開門拉力搞到比唔切反應，跟住門打開嘅方向邁步；我下意識提起腳踩入廁所嘅範圍

「呀⋯！」我下意識細聲咁叫咗一聲，下一秒就直接撞咗落去阿立嗰度，咁樣撞到應一應，我都覺得有啲痛⋯

「你小心呀⋯」阿立嘅語氣聽起嚟有少少擔憂，「有冇事？」

「冇呀⋯」我抬起頭望佢，然後搖搖頭，「你有冇嘢⋯？」

「冇呀。」阿立笑一笑





「你喺廁所嘅話做咩唔應門？」我問佢

「吓⋯？我抹緊頭髮，冇留意到你有敲門。」阿立拎起毛巾嘅一邊示意

阿立嘅頭髮都未吹乾，髮尾仲有就滴落嚟嘅水珠，佢嘅頸上搭住一條米黃色嘅毛巾

佢身上面有一陣好柔和嘅沐浴露香味，成個人感覺好乾淨、好軟綿綿一樣

可能係因為啱啱沖完涼，佢成個人都暖笠笠，好溫暖，令人完全唔想行離佢半步





「好暖⋯」我心入面第一個想法係呢個，「阿立成個人都好暖⋯」

我抬起頭嘅時候，佢亦定睛望住我，我眨一下眼，即刻回神

「呀⋯Sorry⋯」我即刻推開佢向後行一步，「嚇咗我一跳⋯」

「下次小心啲。」阿立冇講啲咩，只係微微一笑，「廁所我用完㗎啦，你用啦。」

「唔該⋯」我攬住啲衫微微低頭，連視線都唔會同佢對上

佢側側身喺我隔離行出去行番房，我即刻行入廁所閂埋門；廁所入面仍然有啲水蒸氣，仍然係有陣陣暖意

「餘溫仲喺度⋯」我輕握起拳頭，手心嘅熾熱仍然殘留喺度，我又伸手摸一摸後腰

喺我撞落佢度嘅時候，佢⋯好似係下意識嘅反應一樣，輕輕咁攬住我將我扶實





佢手心嘅溫度喺我嘅後腰停留，我搭喺佢腰間上嘅雙手都好似識得發熱一樣

「我一定係太耐冇見佢所以先會咁⋯」我望住鏡中嘅自己開口安慰自己

熱水打喺身上嘅時候，真係會令人有種消除疲勞嘅感覺

我將沐浴露搽喺身上面，空氣中好似都彌漫住沐浴露嘅淡香一樣，但呢一刻喺我腦海中閃過嘅，係啱啱我同阿立四目相對嘅時候我所聞到嘅沐浴露香味

「同一隻沐浴露嘅香味⋯」我細聲咁喃喃自語

咁樣稍微諗咗一諗之後，我都唔知發熱嘅感覺係因為熱水定係因為諗到唔太應該諗嘅嘢⋯

自從上次終於講咗佢搬屋嗰件事之後，雖然冇講得好清楚原因，但至少呢件事拎咗出嚟大概解釋





「總之唔係你諗嗰啲原因⋯」所以，係點解⋯？

唔知係唔係我嘅錯覺，感覺上我同佢好似少咗一層本來夾喺我地之間好薄嘅隔膜，好似又變番親近少少⋯

以前成日有個錯覺，以為時間會沖淡問題、沖淡一切，但原來當真係再見嘅時候先知，時間將冇佢地沖淡

將兩個人之間嘅隔膜撕開、將兩個人拉番近嘅，大概係將問題拎出嚟解決，拔走喺心深處未清理乾淨嘅刺

「算啦，我都係唔好諗咁多冇用嘅嘢⋯」我沖走身上嘅泡，放棄再思考同一個問題，「反正⋯算啦⋯」

⋯

Cafe入面都係得小貓三四隻，都係嘅，過咗最忙嘅時間，又到咗企喺度數手指嘅時候

「哐。」阿逸拎住隻碟行出嚟，將隻甜品碟擺喺吧枱，「知珩，試下。」





「又有嘢呀？」我望住枱上嘅碟，碟上面擺咗一個小型嘅Macaron塔，睇起嚟幾好食，「Macaron～」

「係呀，試下，睇下會唔會太甜～」阿逸將隻碟推近我，「白色夾心係雲尼拿，黑色係朱古力，淺啡呢個係紅茶。」

真不愧係我地cafe嘅甜品負責人，成日都整咁多好食嘅甜品，佢係真係整得好食㗎！好睇又好食，所以好賣得，每日係真係限量發售

「我食雲尼拿。」我拎起一個白色夾心嘅Macaron，放到嘴邊先咬一細一啖

「點呀？會唔會太甜？」阿逸緊張咁問我

「我覺得有少少甜，但又唔會話食完要一直飲水嗰種。」我認真咁比comment，「好食，而且整得好靚～好啱打卡！」

「知珩食緊咩呀？我又要食！」樂恩見到我食緊嘢就行過嚟吧枱





「阿逸整嘅新限量發售甜品。」我指一指阿逸，阿逸見到樂恩即刻無奈咁望住樂恩，我覺得佢就嚟要反白眼

「我又要食～你又淨係拎比知珩試！」樂恩對阿逸講道，睇嚟佢兩個又要嘈一陣

我拎起手機，企喺咖啡機前面邊食Macaron邊睇手機，耳仔聽緊樂恩同阿逸好似冤家一樣嘅對話

「你咪食，我成碟擺喺度，有唔比你食咩？」「你唔叫我過嚟食我點知呀？」

「你宜家咪企咗喺我隔離囉！快啲食啦仲講⋯！」「我一定食！我要食呢朱古力！定係食紅茶好⋯？」

我抬眼有啲八卦咁望佢兩個一眼，阿逸有時對住樂恩真係一個冇晒符嘅樣，佢兩個又有大少少嘅年齡差，所以睇起嚟有時好似唔啱channel咁⋯




IG Link: https://www.instagram.com/nd_cotttoncandy/?hl=zh-tw