【愛情】關於我一覺瞓醒發現喺初戀屋企⋯！: 10. 有心事嗎？
「我番嚟啦⋯」我輕輕力咁扭鎖匙推開門，然後習慣性咁講一句，不過係好細聲咁講
我行入屋，門比我再推開啲，我就見到阿立坐咗喺餐枱前面打開電腦做緊嘢，佢就對住門口坐；阿立聽到開門聲，佢嘅目光從電腦嘅螢幕移開，微微抬頭望我
「我番嚟啦⋯」我有啲僵硬咁微微一笑，然後好順手咁將門上嘅防盜扣扣上，「咔。」
「嗯。」阿立低聲咁回應咗一聲
我將手上一袋袋嘅購物袋先放到餐枱上，手扶住門邊嘅鞋櫃將腳上嘅長靴除落嚟，順手咁將鞋放番入鞋櫃
「你仲做緊嘢呀？」我見佢好專注咁睇緊電腦，手拎住mouse好似仲做緊嘢
「嗯，仲執緊相⋯聽日要交番去比老細⋯」阿立點點頭
「你都仲係咁中意影相呀～」我笑一笑講道，「興趣做職業真係好。」
「還好啦⋯有時都辛苦。」阿立輕輕一笑，目光始終冇離開過電腦mon，「出糧嗰陣最滿足。」
喺行番房嘅時候經過阿立身後，我好奇咁企喺度望下佢做緊咩
「做到自己中意嘅嘢真係好。」我望住阿立執緊嘅嗰輯相，應該係佢公司嘅product宣傳相
「你唔係都做到咖啡師啦咩？」阿立嘅反問，係我意料之外嘅事，「沖咖啡唔係你中意做嘅嘢？」
「我係呀～」我笑道，「望住人地飲完自己沖嘅咖啡，露出滿足嘅笑容嘅時候好滿足～」
阿立回頭望咗我一眼，臉上掛住淡淡嘅笑容，我望住佢嘅笑容，唔知點解我會下意識咁呆咗一下
呢個時候我拎喺手上嘅手機忽然響起嚟，我即刻回神聽電話：「喂？倩佑？」
「我番到屋企啦，你到未呀？」靖佑嘅聲線聽起嚟一啲攰嘅感覺都冇
「我到啦。」我向後行咗兩步細聲咁講道，「你快啲休息啦～聽日仲要番工。」
「嗯！咁你都早啲瞓啦～下次再約啦～Mua～」靖佑甜絲絲咁講道
「我又唔係你男朋友⋯」我無奈咁細聲講道，「再約啦～拜拜～」
我收咗線之後企喺阿立嘅身後望一望佢，佢好似仲有好多嘢做，我都係唔好阻住佢比較好啦
「我⋯唔阻你做嘢，你加油⋯」我禮貌咁同佢講聲，但對佢咁禮貌令我唔太自在，「你都早啲瞓⋯」
「嗯，好。」阿立望我一眼，臉上掛住淡淡嘅笑容微微點一下頭，「你都早啲瞓。」
我見佢仲要做嘢就先番房，我將房門細力咁閂埋，連閂門聲都唔想發出影響到佢做嘢
「呼⋯聽日仲要番工⋯」我將手機放到床頭櫃上差電，然後開著咗床頭燈
我拎起手機嘅時候，又諗起靖佑喺食飯嘅時候同我講嘅嘢：「佢喺大學嗰陣都幾常換女朋友。」
「成日換女朋友⋯」我諗到呢度，又忍唔住諗係唔係真係因為我嘅關係令佢成日換女朋友
真心中意一個人但比對方傷害嘅話，一係會變成冇心機拍拖，怕重蹈覆轍；一係會一直換女朋友，一直搵嗰個人嘅影子，阿立會係因為後者嘅原因所以一直換女朋友⋯？
「算啦！唔諗啦！關我咩事！」我拎起放喺床上嘅屋企衫，「沖涼然後瞓覺！」
⋯
「呀⋯好攰呀⋯！骨頭都散晒啦⋯！」樂恩企喺cafe門口拉筋，望住阿逸鎖門，「快啲番屋企啦要⋯！我已經好肚餓啦⋯！」
「今日又會咁忙嘅⋯」我都覺得好攰，腳又痛手又攰，頸都好酸痛，「都冇停過手。」
「好！搞掂行得！」阿逸企起身將cafe嘅鎖匙袋好
「我行嗰邊，聽日見⋯」我指一指去地鐵站嘅路，我都攰到笑唔出啦已經
「我今日都行嗰邊，一齊呀。」阿逸孭好個袋對我講道
「我搭巴士呀，我行嗰邊啦拜拜⋯」樂恩指向反方向講道
「你番去小心啲啦。」阿逸一如既往咁提醒道
「知道⋯」樂恩乖乖咁點頭，「拜拜⋯」
平時朝氣勃勃嘅樂恩，今日難得滿臉寫滿疲倦，都冇晒平時嘅活潑，轉身行嘅時候都拖住腳步行，完全同平時唔一樣
「你番去食飯呀？」阿逸喺樂恩轉身走之後同我一齊行去地鐵站嗰邊
「嗯⋯」我微微點頭，其實我陣間打算番到去煮麵食就算
「你睇你呀～忙咗成日，笑容都冇晒啦～」阿逸笑一笑探頭望我
「忙咗全日仲邊有力笑⋯」我擠出笑容望向阿逸，「唔似你仲咁有活力笑得出⋯」
「呀？我呀？」阿逸好似有啲愕然一樣，「本能嚟～開心就笑唔開心就唔笑啦～」
「咁有活力真係好⋯」我望住阿逸臉上嘅笑容講道
「你一收咗工就唔多笑容。」阿逸忽然間講道，「不過你平時都好明顯都係番工嘅機械式笑容。」
「係咩？」我輕輕一笑，呢個「係咩」其實冇疑問嘅意思，只係順口咁講出嚟
有時可能係職業習慣，面對客人都會覺得有笑容會好啲，但習慣咗之後就好似係機械式一樣，番工笑咗一日，收咗工就唔想笑
「你要保持形象？笑多啲啦～唔好嘥咗個靚樣。」阿逸好似鼓勵我一樣講道
「唔係呀，邊有咩形象～都同平時一樣咋嘛～」我笑一笑講道
形象，可能喺同事面前都會有少少嘅，我有時都發現我喺同事或者唔熟嘅人面前同喺真係熟嘅朋友面前真係會有分別
「唔⋯可能你冇留意啦～其實係最近你真係少笑咗，笑容都好似冇以前咁燦爛。」阿逸回想後認真咁講道，「你係咪有咩心事呀？」
「係咩？」我有啲疑惑，我都唔覺我最近係咁樣，應該話我一直都係咁，「我冇咩心事呀，可能只係最近攰⋯」
「你有心事嘅話可以同我地講，唔同我講可以同樂恩講。」阿逸認真道，「唔開心嘅事屈喺心入面都唔好。」
「知啦⋯！」我笑一笑
阿逸其實好識照顧人，好多時我係咁樣覺得，可能因為佢又大我地幾年，所以會成日照顧我地，我地對佢嚟講又未到小朋友嘅，但對女仔佢都會比較照顧
佢係個好細心嘅人嚟，可能正因為佢細心，所以先可以做到整甜品呢啲需要細心同耐心嘅事
「聽日見啦。」我企喺地鐵站入口對佢講道
「嗯，拜拜。」阿逸微微點頭，「番去小心啲。」
我轉身行入地鐵站，唉⋯好攰呀⋯陣間番去一定要沖個涼先再食嘢
IG Link: https://www.instagram.com/nd_cotttoncandy/?hl=zh-tw