【愛情】關於我一覺瞓醒發現喺初戀屋企⋯！: 09. 誰受情傷？
諗起我同佢嘅過往，再望一眼宜家嘅狀態，心情有啲矛盾⋯
以前明明一切都咁美好，但我地嘅最後，居然係變成陌生人，我當時都冇諗過我同佢會有呢一日⋯
「唉⋯執埋啲嘢算啦⋯」我自言自語咁講，然後將書櫃上面嘅書整齊擺好
由佢搬走嗰一日起，我都覺得係永別一樣唔會再有機會見面，但原來，冇講「再見」嘅不辭而別，係代表你地最後都會再見一面
「唉⋯」我不自覺咁嘆一口氣，我都唔知道呢個嘆氣嘅意思係無奈定感慨
但係，我知自己早就放低咗，只係對於我嘅初戀有特別深嘅印象，初戀難忘嘛～
「執埋啲嘢就搞掂啦～」我以輕快嘅聲線嚟鼓勵一下自己
執埋個櫃我又可以睇下電腦睇下手機，然後又一日啦～更開心嘅係，聽日係我嘅Day off～
⋯
今日Day off 嘅我約咗大學同學食飯，就係嗰個本來係同我合租但最後甩我底，搞到變成我同阿立合租呢個尷尬狀況嘅原兇
「嗨～」我一行入餐廳，眼利嘅靖佑即刻就見到我對我揮手，「呢度！」
「做咩咁好約我食飯？唔洗陪男朋友咩？」我拉開櫈坐低喺佢對面
「哎～一齊咗咁耐啦～都唔洗日日見住嘅～」靖佑同男朋友一齊咗都差唔多六、七年，但每次提起男朋友都係甜絲絲嘅表情
我拎起餐牌，邊睇餐牌邊同靖佑講下近況，不外乎都係最近番工點、有咩好笑嘢、有咩黑仔嘢，又或者係女仔都中意講嘅八卦嘢
「你點呀？同新嘅roommate一齊住點呀？」靖佑突然問起，雖然今日嚟嘅時候我都覺得佢會提一提，「阿瑜份人Okay呀可？佢有冇做啲咩過份行為呀？」
靖佑唔知道我同阿立本來係識，我亦冇同靖佑提過我同阿立以前嘅事，所以靖佑以為我同阿立係陌生人，擔心我地夾埋嚟
「冇啦，我地多數都係各自喺自己房，都好少講嘢。」我都係講緊事實，平日屋企嘅狀況真係咁樣
「咁都好啲⋯」靖佑拍一拍心口，好似鬆咗一口氣，「聽我男朋友講，佢以前大學嗰陣已經係咁樣，好多時都係專心做自己嘢。」
我微微點頭，對於阿立大學嘅事，我完全唔知道，因為我地後來都冇再聯絡，見靖佑提起唯有扮咩都唔知咁聽
「不過我男朋友話，佢喺大學嗰陣都幾常換女朋友。」靖佑咁樣一講，我拎起特飲嘅手即時一頓
佢喺大學嘅時候有再拍過幾次拖⋯？不過，其實都唔出奇，呢啲年紀會想拍拖、換多幾個都好正常
「係咩⋯？」我一臉平靜咁點一下頭，就好似我對呢個人嘅事完全冇興趣一樣
「最耐好似都係半年左右⋯」靖佑講道，然後笑道：「我男朋友話可能佢以前受過情傷之類，因為佢好似話過佢中學嗰陣識過個女朋友⋯」
「可能啦⋯」我聽到靖佑咁講之後敷衍咁笑咗一笑
情傷⋯點睇佢都係傷人嗰個係唔係⋯？當初同我講分手嗰個係佢；咩都冇講就突然搬走嘅係佢；喺我眼前消失嘅人都係佢
比起佢，我覺得我個心仲受傷⋯
但原來，佢有喺大學朋友面前提起過中學同過我一齊嘅事，雖然可能都唔會指名道姓咁講，但原來佢有提過⋯我以為佢唔會提起⋯
「講開又講，你同咗你爸媽講未？」靖佑問我
「你講緊合租嘅事？未呀⋯我就係唔想再住喺屋企靠父母，所以先要搬出嚟同人合租⋯」我搖搖頭
其實我仲未諗到點開口同我爸媽講同我合租嘅人係男仔嘅事⋯
雖然我覺得冇咩，至少我識呢個人，亦知佢唔可能做啲咩，但我爸媽未必咁諗⋯
「但你都唔暪得幾耐㗎喎，佢地總有一日會知。」靖佑有啲替我擔心
「到時再算⋯」我無奈咁道，「仲有呀！我講咗係同你合租！你唔好爆我出嚟！」
「你唔係咁大整蠱呀嘛⋯！」靖佑一個無言以對嘅表情，「你同佢地講同浩宜合租唔係好啲咩？」
「佢地熟浩宜多啲嘛！咁樣好難兜⋯！」我笑道，「你下次有機會見到我爸媽，唔好亂講嘢⋯！」
「知啦知啦，點都幫你兜嘅⋯」靖佑比咗個Okay手勢，下一秒又拉到另一個話題，「你地平時會唔會一齊番工㗎？」
「唔會啦，平時我起身番工嘅時候佢都未起身⋯」我諗起每朝早嘅畫面，就係我出門口啦，但佢嘅房門仍然係緊閉起嚟，有時都可以聽到鬧鐘聲
「可能做攝影師嘅番工時間鬆動啲掛～」靖佑聳聳肩
「哦～佢都好啱做攝影呀⋯」我托住臉頰不自覺就講咗出口
「幾啦～」靖佑微微點頭，「你有冇睇過佢影嘅相？佢會將影出嚟嘅每一張相影到好有故事～」
「冇⋯有機會就八卦下啦～」我笑住咁講咗個大話
阿立以前都好中意拎住相機影相，出街嗰陣佢都會帶埋相機一齊，佢話影相好有意思，可以將時間影低落嚟困喺相紙上，佢都話過將來如果可以嘅話想做個攝影師，周圍影下相記錄世界嘅美好
「你幾時拍拖呀？拍拖要請食飯！」靖佑托住頭，好快咁又轉咗個話題，佢講嘢完全唔跟節奏
「我都想拍拖，不過睇timing啦～」我笑道，基本上佢每次咁問我都係咁答，「隨心啦～」
「你又受過情傷呀？做咩一個二個有條件嘅都唔願拍拖⋯」靖佑反咗個白眼，「邊個咁大膽要你受傷！」
我笑而不語，淡定咁飲啖提子特飲，仲問我邊個咁大膽，我個同屋主囉⋯仲可以係邊個⋯
我同靖佑食完嘢又周圍行咗陣，見到時間都差唔多嘅時候，我同靖佑都覺得差唔多要番屋企
「咁我地下次再約啦～」喺小巴嚟到嘅時候我對靖佑講道，然後目送佢上車
「拜拜！」靖佑坐喺窗邊嘅單人位，對我揮揮手同時用口型同我講拜拜
我喺小巴開走之後都行去搭車番屋企，我望一望時間，其實都就嚟十點，都唔算好晏
我地合租冇門禁，而且我又同咗阿立講我會晏番，咁應該冇咩大問題啦～
雖然講係咁講，但唔知點解當我番到屋企門口拎住鎖匙準備開門嘅時候，會莫名覺得緊張
IG Link: https://www.instagram.com/nd_cotttoncandy/?hl=zh-tw