哇我有超能力呀!!但係點解得五秒咁撚少?!: chapter.45 一個人

一個禮拜過去，我無收到eva既任何聯絡亦唔敢主動搵佢，而且我同佢都無返工。

呢一個禮拜我突然發現，我習慣左...我習慣左生活多左兩個重要既女性：eva，connie。

但係我唔敢聯絡eva。

同時我唔敢去廣華醫院探connie，一來我唔知點面對connie，二來我唔敢響同eva咁既關係下見connie...

以往每一日都會收到eva既短訊或者來電，突然之間無左，我意識到無左。





意識到無左果一刻我感覺到強烈既落寞，呢種感覺帶比我既只有辛苦，好難受，好痛。

越係難受，我越怕同eva就係咁，我越怕我就越唔敢主動搵佢...

無左正職...阿mark果邊亦係part time...我一個禮拜以黎都響自己間房渡過，無出街，長時間對住電腦，睇劇，打機，睇新聞，然後痛苦既多餘思考總響我哪怕一丁點兒閒暇既時侯困擾我。

點解會咁？

點解會搞成咁？





係咪我有邊到做錯？

Eva話唔想為左我對connie做既事而嬲我係真定假？

定係響eva眼中睇出我有隱瞞？

又或者我根本唔應該同eva講咁多？

同eva只需要分享生活小事就夠？





又或者我從一開始就唔應該捲入呢一輪事件中？

我係咪其實安安份份做好我既普通職業就好？

點解我會有超能力？

問題越係諗...心越係難受。

唔知道過左幾多日，steven打比我話connie想我同eva去探佢，而eva應該收到connie親自打比佢，佢主動搵我一齊去探connie。

響病房見到進仔steven同connie有講有笑，而我響connie面前表現得同eva如常...至少我認為如常...

connie拉我埋去細細聲講：「放心喎我唔會同楊小姐打小報告既。」

望見connie開朗既心情，聽到connie同我講呢句，我憑意識拉動臉部肌肉令我睇起上黎笑緊。





steven同進仔唔知connie真正既情況，醫生既推斷只係connie丈夫自殺對佢既打擊實在太大，而connie又一直壓抑悲傷，令到身體機能承受唔住而急速惡化。

我同eva知道實情，但係我地兩個都同樣難以忍受...知道實情而目睹眼前光景既難受...

呢股難受既感覺壓到我幾乎無法呼吸，我同eva留左無耐就離開左先。

而離開病房令我面對更大既難受...

我同eva並肩而行，但係路上一直保持沉默，慢慢...慢慢行出廣華...慢慢行到油麻地a2出口...慢慢等車到...慢慢搭到去樂富...慢慢出閘...慢慢行到佢樓下。

我清楚感受到呢股沉默，呢股沉默帶比我既難受不比響病房既難受差。

如果要我答邊樣更難受，我答唔到，我只能夠講同樣足夠令我近乎崩潰。





我同eva企響佢樓下，同時望住大廈大門，清楚明白呢度門既意義...

我期望eva先開口...證明佢想講...

我唔敢開口，我懦弱我膽小...我怕。

eva行前左兩步，轉身望住我。

四目交投，我彷彿由eva眼神聽到佢問：「我地可唔可以好似以前咁傾計？」

但係我唔肯定，我清楚知道eva仍然無開口。

我唔敢開口講哪怕只係簡單既兩個字：可以。

我忍唔到呢種沉默對視既難受，我合起雙眼，幾秒之後再打開，再望住eva。





eva捕捉到我既眼神，彷彿有一絲明悟，佢垂頭。

望住eva唔知垂頭左幾耐，等到佢抬頭既時侯，眼神變得堅決，然後回頭再度走入大廈。

淨低我一個企響原地垂頭。

涼風呼嘯，秋天了。