MK學院: MK仔女江湖事件簿—鐵娘子(2)

又係一個悠閒嘅下午，我同師傅都冇咩嘢做。

師傅就教緊拳，而我就拖緊地。

「喂！」大門方向傳嚟一把男人聲：「收陀地啊！」

我望過去就見到個著住黑色背心、穿窿牛仔褲，身高大概得米六嘅男仔。

唉，又係呢啲MK仔。





「師傅！」我擺低個拖把：「開唔開比佢啊？」

應該係話你想唔想打。

「放佢入嚟。」師傅伸咗個懶腰：「打輸先比。」

你話點就點啦。

「打贏再講。」我開門：「師傅落堂就會同你切磋架喇。」





等下啦，驚你太快落返去會比人笑。

「等你老母啊！」佢一腳踢冧個地拖桶：「叫你師傅躝落嚟！」

冇大冇細，而家啲後生仔真係。

「唔係我叫架。」我嘆氣：「佢叫架。」

有咩事打柒佢好喇。





「麻撚煩。」師傅從擂台跳落嚟指住我：「你同佢打，打贏你先到我。」

我想知…

「點解會咁嘅？」我喺佢耳邊講：「我唔識架喎。」

沙包就打得多，人就真係未打過。

「得架喇。」佢搭住我膊頭：「做返平時練習啲動作就得架喇。」

我望住呢個米六嘅MK仔…

「睇佢個樣好打極有限。」我搲咗搲下巴：「試試佢囉。」

當試下自己學嘅嘢。





「你而家睇唔撚起我啊？」MK仔行到去師傅面前：「搵個女人同我打？」

歧視女人，正仆街嚟。

我一個拖把掃落佢條腰到，避唔切嘅佢痛到彈咗起身。

「正撚樣。」我向佢碌嘢再補一腳：「最憎人歧視女性。」

女人得罪你啊？

「仆你個街！」佢撳住下體：「都唔講武德嘅！」

你係咪撞撚壞咗個腦啊？





「我係主，你係客。」我篤住佢額頭：「唔到你話事！」

仲同我講呢啲。

「你好嘢！」佢摸住額頭：「下次就拖馬打柒你哋。」

佢講完就跑咗出去，而我同師傅就擊咗個掌。

//

我開門：「我出去買嘢食啊！」

同師傅講低之後，我就嚟到𨋢大堂。

喺我入𨋢嘅一刻，一條毛巾從後撳住我個嘴。





一瞬間，我眼前就得返一片黑。

再擘大眼，我已經嚟到一間酒吧裡面。

喺我面前嘅就係今朝嚟搞事個MK仔，今次仆街了。

我想郁，可惜我啲手手腳腳比人綁住曬。