MK學院: MK仔女江湖事件簿—四葉草篇(10)

「做咩咁好心？」玫瑰喺我身邊點煙：「我都係唔會原諒你哋。」

我理得你。

我苦笑：「你原唔原諒我哋係你嘅事，我對你呢個家姐好唔好係我嘅事。」

我哋始終都係一家人。

喺微弱嘅燈光之下，我見到佢左手仲拎住包煙。





佢沉默咗一陣，之後就遞咗包煙過嚟。

佢打開煙盒：「拎枝。」

我猶疑咗一陣，之後就小心咁拎咗枝煙出嚟。

我咬住枝煙：「火？」

邊個嚟？





佢遞個火機畀我：「自己嚟。」

我點火之後還返個火機畀佢，而佢就露出一個意味深長嘅微笑。

我微笑：「唔該。」

多謝你。

佢呼出一口煙，煙霧喺半空中飄散。





佢將煙灰扽落樓下：「你哋走咗之後點？」

都有眼見架啦。

「佢入咗去，我又嚟咗呢到。」我苦笑：「你話呢？」

傻嘅都知。

「嗯。」佢望一望條街：「我走喇。」

班南亞佬散曬水，下面暫時都算安全。

佢講完就轉身行去樓梯口，而我就嗌停佢。

我衝上去搭住佢膊頭：「如果出面風聲緊就返嚟搵我。」





我冇能力照住你，但可以比個位你匿下。

「嗯，會搵架喇。」佢苦笑：「如果我未死嘅話。」

講呢啲。

「個天邊有咁易比你死啊？」我苦笑：「壞人不嬲長命百歲。」

不過係百病纏身嗰隻。

「嗯。」佢望住我個肚：「再見，保重。」

佢講完就轉身行落去，而我就即刻耷低頭望落去…





我苦笑：「頂。」

真係停落嚟先識痛。

我講完就兩眼一黑，再擘大眼就見到熟悉嘅天花板。

係醫院嘅走廊。

「你起身喇？」

係巧大把聲。

我望過去：「點解你會喺到？點解我會喺到？」

佢喺走廊另一邊行嚟床邊，仲突登踎低就我。





「唔好郁，你個傷口擘開咗。」佢摸咗下我個頭：「玫瑰叫完白車就通知咗我。」

估唔到佢咁好心。

我微笑：「咁咪幾好。」

至少佢唔想我死。

「我走先喇，你出院打個電話比我。」巧大起身：「我要去幫玫瑰拆掂單嘢。」