MK學院: MK仔女江湖事件簿—四葉草(9)

我望咗下佢跑嘅方向，之後就衝咗落樓。

//

我喺轉角位挨住牆，後面傳嚟連綿不絕嘅腳步聲。

腳步聲越嚟越近，我嘅呼吸都越嚟越快。

我開聲倒數：「三、二、一。」





我倒數完就即刻踏前一步伸手出去，之就就一嘢將玫瑰扯入嚟。

佢好迷茫咁望住我：「咩料？」

屌你仲問？

我冇答佢，就咁一嘢捉住佢隻手就開始跑。

呢到每行兩步就有分叉路口，成個迷宮咁。





好彩我一早行熟曬，可以話係合埋眼都識行。

我哋喺巷同巷之間穿插，好快就嚟到一個十字路口。

我拉住佢準備行入一條黑到伸手不見五指嘅巷，覺得唔對路嘅佢即刻拉住我。

我認真咁望住佢：「信我。」

佢有啲猶疑，但後面傳嚟嘅腳步聲越嚟越近。





佢知自己冇得揀，唯有好唔情願咁扤咗下頭。

我帶佢住摸黑前進，見到右邊牆近地下有一點螢光筆嘅筆跡就轉右。

我哋轉咗三次之後就嚟到一道鐵閘前面，而覺得我玩緊嘢嘅佢都即刻掘住我。

已經冇曬腳步聲，終於可以慢慢嚟。

我喺牆上面嘅電箱裡面拎把鎖匙出嚟開門，開完就塞返落去。

我入閘：「行啦。」

佢企喺閘外向我擰咗擰頭，之後就轉身。

我上去拉住佢：「你而家行返出去死撚硬架。」





你唔好嘥我心機得唔得？

佢望咗下我，又望咗下後面。

佢伸手：「還掂都係要留多陣，行啦。」

我拉住佢入閘，轉多個彎就嚟到我住嗰棟。

我帶住佢直上天台，之後就喺邊位望返落大街。

大街到有成班擸住青嘅大隻佬，應該就係追殺玫瑰嘅人。

街頭已經有幾架警車到咗，睇嚟佢哋今次走唔甩。





我挨住石柵：「佢哋碌柒喇。」

真係嚇撚到瀨屎咁濟。