MK學院: 二十八.

「你一蚊都唔要？」我問佢。

雖然你都有拎返個成本。

「唔洗喇。」佢嘆咗啖氣：「我都就死啦。」

咁唔關事架。

「都要留錢比社團架。」





你唔食咋嘛，你下面嗰啲都要食架。

「社咩團啊？」佢微笑：「我一早當咗MK學院嘅人係親生仔。」

我哋呢啲小薯仔嚟架咋。

「你突然間比咁多錢我都唔知點用。」

講真，無啦啦多咗一個Doub都唔知拎嚟做咩好。





「我相信你知點用。」

定係…

「你想將MK學院變做…」

我唔希望係咁。

佢打斷我：「唔係啊。」





咁係想？

「我知你咩人，但都唔洗去到呢個程度啊嘛？」

我知你係講義氣嘅人，但都唔洗義氣蓋天啊嘛？

「人之將死，其言也善。」佢裝返好個手柄：「我都係唔想佢哋…」

我明你心意。

我打斷佢：「咁你肯定喇嘛？」

佢扤咗扤頭，而我都拎枝筆出嚟簽名。

我將張合約收好：「咁嚟緊一年…」





我同佢握咗握手：「合作愉快。」

凱婷喺呢個時候行咗入嚟，我估佢係見到開咗燈所以入嚟睇下。

「做咩啊凱婷？」我拉開身邊嘅凳：「坐低先啦。」

凱婷先喺門口向龍伯鞠咗個躬，之後先行過嚟做低。

「你哋傾成點啊？」凱婷向龍伯點頭示好：「早晨啊龍叔。」

你條友真係衰。

見到龍伯就鞠躬加扤頭，對住我就淨係識要錢買煙。





「你過嚟做咩啊？」我問佢。

正所謂「凱婷自辦公室來，非奸即盜」，所以我估你唔係真係過嚟睇我傾成點。

「係咁嘅…」佢伸出雙手：「我想問你攞錢買煙。」

我屌啊！

「你今朝唔係開咗一包咩？」我諗咗諗：「你唔係…」

拎曬去開心Share啊嘛？

「係，我派曬比人。」凱婷唔夠膽直視我。

你真係仆街嚟，周街派我啲銀紙。





「龍伯你話點算好？」我向龍伯打咗個眼色。

我就唔比架喇。

龍伯喺褲袋摷咗幾張廿蚊出嚟：「拎去啦。」

凱婷拎走啲錢之後即刻笑到好似啪咗滴滴咁，唔講仲以為啲錢溝咗嘢。

「多謝龍伯！」凱婷送咗個飛吻比佢。

龍伯都未接到個飛吻，凱婷就已經一枝箭咁衝咗出去。

成日比錢你都唔見你比飛吻我，真係枉我對你咁好。





「你真係縱壞曬啲細嘅。」我嘆氣：「搞到佢哋燒銀紙燒得快過焚化爐。」

要識理財先得架。

「鬼叫你唔加人工。」佢講笑咁講。

係啊係啊，又係我啊。

「啲細嘅係要嚟錫架嘛。」佢企起身：「我走先喇。」

「我送你出去？」

「唔洗喇，我想自己行下。」

「咁好啦，掰掰。」

「有緣再會。」

應該都無下次架喇，遲下等我死咗上嚟搵你煲煙啦。