《想溝到女千祈唔好學我咁》: 4.10

「其實你憎嘅唔係女人，你只係憎你阿媽。因為佢嘅行為令到你覺得自己對女人失去信心，你對女人嘅印象就定型咗喺果班曇花一現嘅女人，同埋你媽媽嘅言行舉止上，令你不自覺同唔同嘅異性保持距離。又有可能即使有女仔主動埋你身，對你嚟講都係有目的嘅。」佢好似心理醫生咁剖析我嘅心理狀況，我都唔可以肯定佢有冇講中我咁討厭女人嘅原因，但爸爸果晚醉酒之後對我講嘅說話，確實令我咁多年嚟都好耿耿於懷。

「俾賤男呃過嘅女仔都有機會唔再相信愛情姐。」

「咁都係佢一時三刻未可以放低姐，終有一日，佢都會醒覺自己唔應該為咗個衰人放棄自己嘅未來。」

「你會唔會太樂觀？」我唔明白，任何事佢都好似睇到好簡單，抑或係我哋將任何事都複雜化？

「唔係我樂觀啊，係你悲觀姐。刻板嘅印象令到你即使開始明白世界嘅價值觀，亦改變唔到心底咁根深蒂固嘅感覺，你唔係唔知要改變，而係因為放唔低嘅執著令你逃避女人冇想像咁萬惡嘅現實。你，根本冇需要為咗過往經歷而逼自己憎女人。」佢嘅一言一語好似一個個孫悟空發出嘅氣彈不停向我攻擊，不斷撃潰我嘅防線，破壞我為自己心靈築起嘅防護罩。而家喺佢面前嘅我，就好似一個赤裸裸嘅細路咁。





因此我都承認，刻意疏遠阿南，都係為咗唔想改變呢個一直以嚟所相信嘅事。

「但女人都真係一樣好麻煩嘅生物，又難捉摸，又難溝通。」我回應，或者你可以當作，我最後嘅垂死掙扎。

「當有一日你遇到一個好嘅女仔，或者俾佢煩下你都開心。」

「我實冇咁犯賤。」

「你對過好多女人咩，你又知個個都係咁麻煩？」





「阿星講嘅，佢話佢果三個家姐都係有啲麻煩嘅事。」

「阿星識條鐵咩，佢係咁叻一早追到阿柔。」佢取笑阿星。

「咁...你都係啦，開學第一日果陣又喊又笑。」突然諗返起第一日認識嘅阿南，果種捉摸不定嘅情緒已經足夠令我捉摸唔透。

「呃！你啊！開解你仲咁話我！咁第一日去到新環境好驚㗎嘛！」佢一拳打過嚟，扮到好嬲咁講。我而家先知，當時佢果份難以接近，原來只係因為佢去對新環境嘅一份擔憂。