《想溝到女千祈唔好學我咁》: 4.9

「只係我諗唔到有乜好講，又唔想特登諗話題。」

佢擰擰頭，否定我嘅掩飾。

「你係咪好憎女人？所以先唔鐘意同女仔講嘢？」佢突然對準我嘅痛處問。

「邊係。」我詐傻否認。

「你果然會否認！」





「嗯？」

「係阿星同我講㗎，佢仲話你一定會唔認。」死仔...

「咁你都幾搞笑，成日明知故問。」

「我奇怪姐，單親家庭嘅影響應該冇咁大。」

「你又知？」





「因為我都係單親家庭長大。」

「真係咩？」我心頭突然一震，想像唔到平日經常笑面迎人嘅佢，原來同我一樣，擁有一個破碎嘅成長環境。

「嗯，所以我好明白你嘅孤獨，好明白聰聰嘅期待，我都好期待有一日，我爸爸會返嚟同我講：『我去咗行船之嘛。』，但我越大個，越知道唔會發生。」

「咁點解你可以成日都咁開心？」以前會覺得，佢嘅快樂係扮出嚟，但識得佢耐咗，就覺得佢好多時候嘅快樂都係發自真心。

「愛掛，我之後就同我婆婆一齊住，佢有一間公屋，可以俾我住埋，但我媽咪就要自己出去租樓。婆婆錫到我燶，可能咁先令我覺得我冇被世界遺棄。」





「你有冇嬲你老豆？」我問。

「緊係有啦，好嬲添，以前。與其用咁多力氣去嬲一個，或者唔會再見嘅人，點解唔花啲心思，去愛身邊守護自己嘅人？」

我冇回應佢，但腦中若有所思。

「我同你唔同，我冇辦法原諒我老母。」隔咗一陣，我先講得出呢句說話。

「點解？」佢問。

「喺我最後一次見我阿媽，佢同我老豆鬧咗場好大嘅交，當時我一啲都唔知佢哋喺到講緊乜，但每一句說話，我到而家仲記得。原來佢因為我老豆做醫生啲返工時間日夜顛倒，經常一個人喺屋企，有一晚悶得制，同佢一個男性朋友喺Pub飲酒，醉咗之後搞埋咗一齊，然後就Keep住呢種性關係，直至俾我老豆揭發。」

「咁你阿媽...」

「果晚之後我就冇再見過佢，自從果陣開始，久唔久就會有唔同嘅陌生女人上嚟屋企，同老豆狀甚親熱，每一次佢哋都會匿埋喺房，果陣我唔知佢哋喺到做咩，淨係每次都會聽倒啲女人嘅呻吟聲，嘈到我成晚都瞓唔著。每次見到呢啲女人，佢哋都會好親密咁攬住我，又攬又錫，又話會好好咁照顧我，但冇幾耐之後，呢啲女人都係會消失咗，隔一排又會有個新嘅女人上嚟，重複一樣嘅呻吟聲，對住我講重複嘅說話。」我連最壓箱嘅秘密都講埋出嚟，呢件事，即使阿星佢哋都唔知，果一刻，阿南莫名其妙地成為我最信任嘅人，令我竟無保留咁將一直以嚟嘅經歷講曬出嚟。





「嗯...」聽完我嘅故事，佢就沉默咗一陣，見佢有啲苦惱嘅樣，似係唔知點回應我咁。

「我明白喇。」佢突然講。

「明咩？」