《想溝到女千祈唔好學我咁》: 4.3

「喂，阿正，十萬火急！借本數學嚟抄！」小息果陣，阿星衝過嚟搵我抄功課。

「抄還抄啊，唔好俾老師發現。」

「得啦得啦，我抄功課多過你食飯啦。」

「點止啊，留堂多過我食飯添。」洛賓喺側邊笑佢。

「大佬啊，你唔好成日調位得唔得，我就嚟俾歐陽南煩死。」我順便同洛賓講。





「我以為你哋已經破冰添。」阿星講。

「係冇咁討厭嘅...」

「兄弟！你係我兄弟嘛！兄弟終身幸福就靠你啦！」洛賓就嚟雙膝跪地咁講。

「咩幸福咁緊要啊？」

「咁你都睇唔出？有人鐘意咗子晴喔。」阿雄講。





「你喔乜春？男人老狗懶可愛。我覺得佢幾好人啊，又有愛心。上次見佢同千千咁難捨難離，一定好重感情。」佢同我講。

「揀老婆咩家陣，人哋重唔重感情關你咩事？」我非常不屑咁問。

「係做老婆都唔錯啊，又靚又善解人意。」佢一路講，一路沉醉咗喺幻想之中。

「想追？」

「得唔得啊。」





「我冇意見。」

「你哋話呢？」佢將個波拋俾阿星同阿雄。

「鐘意就去，唔鐘意就唔去，無理由鐘意又唔去，唔鐘意就去....」阿雄好長氣咁講。

「得啦得啦得啦。會唔會太煩。呢啲嘢你自己決定啦，當感覺來到你就會識揀。」阿星憑住自己經驗答。

當理智俾感覺蒙蔽，係咪就會不顧一切，向住直覺盲目咁向前衝？就算頭破血流、滿身是傷都唔怕？

「死開啦！坐我張檯係咪想死！」突然阿雄身後響起一把好雄壯嘅聲音，將佢嚇到即刻喺張檯到跳落嚟。

佢向後望，果然見到令人聞風喪膽嘅嘉慧好兇狠咁望住佢，隔離仲企住子晴同阿南。

「坐吓姐，唔洗死啊嘛？」阿雄死死氣咁低吟。





「你唔落嚟我腳都打跛你！」

「好惡喎嘉慧姐，班規都冇話唔坐得同學個位姐。」我喺旁邊搭嗲。

「咩啊，用班長個名撻我啊？我唔怕喎。」

「咁又唔係，和氣生財姐。」

「對住莊偉雄呢啲軟皮蛇，破財就真。一啲男子氣概都冇。」

「我氣概起上嚟嚇嚇…嚇都嚇死你啊。」阿雄不甘示弱，但其實驚到腳都震埋。

「係啦，你有呢一日我向你叩頭啊！」





「算啦，做咩鬧交？」阿南都出聲，為呢場莫名其妙嘅罵戰降溫。

「走啦，啲女人係咁唔講道理。」我搭一搭阿雄膊頭，示意佢返埋位。

「估唔到你怕佢喎，不過都啱嘅。」洛賓學三五成群個阿必同阿雄講。