《想溝到女千祈唔好學我咁》: 4.2

「咁...估錯咗會點？」我問。

「咁估錯嘅都要飲啦。」有份輸嘅洛賓回答。

去到第二輪，大家都開始熟悉個玩法，抽中最大果隻嘅阿柔已經自告奮勇咁講出「秘密」：「中四果年嘅籃球決賽，我輸波之後去食咗五杯雪糕先冷靜倒，結果第二日肚痛到返唔到學。」

「有啲咁嘅事咩？點解我唔記得？」阿南問。

「你咪估下係咪囉，呵呵！」





「呢個人物設定似你啊。」我答，然後就投咗真話。

中學嘅呢場波，我有睇，雖然唔係自願去，但果種刺激感，而家諗返起都仲好歷歷在目。

喺完成第一次孤兒院探訪之後，好似身邊啲嘢都少少少少咁改變緊。

首先係我同阿南嘅關係，好似冇之前咁緊張...其實係我對佢嘅戒心冇咁高。喺我哋討論Project嘅方向果陣，大家都有俾唔同嘅意見，氣氛大致都算輕鬆。我承認探訪之後，我對阿南嘅偏見已經冇咁大。但冇因為咁而減低我對女性嘅抗拒，心中果道保護罩仍然好堅固咁幫我防守，或者呢個先係我嘅舒適圈。

其次係洛賓，自從上次喺小朋友自我介紹果陣幫子晴解圍之後，佢哋嘅接觸多咗好多，甚至喺班級間傳起緋聞。但其實只係佢單方面動情，完全唔知人哋係點諗。果陣時嘅佢，為咗同子晴接近啲，真係無所不用其極。好似每次上生命教育堂，佢就會用不同藉口同阿南調位，變咗坐我隔離嘅經常係阿南。所以就變返中一咁，阿南會不斷喺我身邊講嘢。





「死啦，我驚放學之後嘅籃球比賽會輸。」有次上上下堂，佢冇啦啦趴喺張檯到呻。

「驚咪唔好打囉，唔打咪唔會驚囉。」

「唔得，我點可以咁冇義氣走咗去架？」

「咁驚都要頂硬上啦。」

「乜你咁樣比意見人架，你唔可以鼓勵下我架咩？」





「加油啦。」我好冷淡咁講。

「咁你嚟唔嚟睇啊？」佢雙眼眨眨咁望住我問。

「唔啦，翻屋企溫多陣書好過。」

「壞人啊，Form 4啦！仲係咁死咕咕淨係識溫書點溝女啊。」

「咪搞我，你哋啲女人咁麻煩。」

「…你係咪真係基㗎？」佢扮到好驚訝問。

「咪煩啦！」

你睇下，其實我係一個好好嘅聆聽者，但絕對唔係一個會幫你解決煩惱嘅人，啲回應仲會好Mean，所以成日會搞到佢好嬲，但佢每次嬲完又係繼續同我講好多佢生活上嘅嘢，但唯獨係佢嘅私人事，我就好少聽佢講。