《想溝到女千祈唔好學我咁》: 3.10

「正哥哥，我哋點啊？係咪跟住南姐姐？」若儀拖住我隻手，好無助咁問。

「唯有我哋分開兩組搵，咁樣會快啲。」

「咁我哋搵邊到先啊？」

「嗯…搵呢個先囉。地圖上面嘅提示係『音樂天使』，即係邊到？」

「嗯...音樂室！姑娘會同我哋喺音樂室唱歌！」若儀諗一諗之後答。





「好，咁我哋就去音樂室搵！你帶我去啦！」

我哋去到音樂室之後，搵唔到任何寶藏，即係話謎底唔係喺音樂室。

「咁點算啊正哥哥？」若儀語氣有啲失落，果一刻我淨係知道一定要穩定佢嘅情緒，唔好令佢有挫敗嘅感覺。

「若儀，唔好心急，失敗咗最多再嘗試。仲有冇其他地方你哋平時會去唱歌㗎？」我嘅語氣史無前例咁溫柔，連我自己都俾自己搞到打冷震。

「小…小聖堂，Sister會同我哋唱聖詩。」





「喔，原來天使就係咁解，今次一定冇錯，去啦我哋！」我連聲都擢埋，真係豁出去。

果然，我哋喺聖堂真係搵到第一個寶藏，係一張咪型嘅卡。搵到寶藏嘅若儀突然信心大增，不斷指引我去唔同嘅地方尋寶，即使有啲地方唔係謎底，佢都好堅強咁繼續搵。



直至去到一間更衣室，先發現阿南不斷向住男更衣室敲門。

「聰聰，聰聰，出嚟先啦，我哋努力啲一定搵到㗎。」





「搞咩？」我問阿南。

「聰聰一開始就盲樁樁咁亂咁搵，我叫佢睇住地圖搵佢又唔要，結果咩都搵唔到就發脾氣，仲衝咗入更衣室。但結終係男更衣室…我唔方便入去。」佢騰曬雞咁講，聲線都好似有啲抖震。

「你冷靜啲先。」我講。

然後連龍Sir同一位同事都過埋嚟觀察情況。

「龍Sir，點解聰聰會咁樣嘅？」阿南問。

「聰聰係來自單親家庭，爸爸本來係小巴司機，但因為有外遇而離開咗，媽媽之後獨自養佢，不過太辛苦而將佢寄養喺呢到，之後更失咗聯絡。佢覺得自己冇人愛所以就變得好百厭，周圍整蠱人。」龍Sir拉開我哋，同我哋講返聰聰嘅背景。一聽到佢嘅故事，我立刻如遭電殛，手心忍唔住不斷冒汗。

「陪住佢嘅只有一架爸爸送俾佢嘅小巴車仔，但最近佢唔見咗架車仔，每一日都喺到周圍搵架車。因為佢一直相信，只要搵到車仔，爸爸就會嚟接佢走。」

「所以原來佢頭先一路都只係搵架車…」阿南回應。





「我入去睇吓佢咩事啦，再一次麻煩你哋。」龍Sir見慣不怪咁講。

「等我試下入去。」我自告奮勇，佢哋都好愕然。

「可能唔係咁好嘅，始終都..」龍Sir欲言又止，我明白佢係驚我搞唔掂。

「俾佢試下啦，我相信佢可以。」阿南講，我唔知有咩令到佢咁信任我，但龍Sir最後都係妥協咗。而入去之前，我秘密咁同若儀交待少少嘢。​​​​​​​