《想溝到女千祈唔好學我咁》: 3.9

「算啦正哥哥，我都唔痛啦...」若儀拉一拉我衣袖。

「若儀，唔可以俾易俾人恰㗎。遇到唔公平嘅事要爭取到底。」

「聰聰，你講聲對唔住啦！你係男人，要保護女仔，唔可以傷害女仔知道嘛！」呢個時候，阿南都走咗過嚟勸喻佢，但語氣溫柔好多。

「唔要！」之後佢就走咗去，呢個時候，唯有搵龍Sir幫手。

「唉，佢成日都係咁，等我去睇吓佢啦咁，唔該曬你哋！」





「佢細個應該有啲好差嘅經歷。」我自言自語。

「我都覺得係。」點知俾阿南聽到，然後佢回應。

「若儀，哥哥同你講嘅嘢你記唔記得？要堅強啲。」之後，佢再同若儀複述我頭先講過嘅說話，然後再望住我笑一笑，係咪代表佢冇再嬲我？



直至活動嘅下半節，聰聰先再返返嚟。





「大家好，相信上晝大家同小朋友都有一定認識，嚟緊嘅活動應該可以令大家對小朋友了解更加多。」龍Sir正向我哋交代下半節嘅活動詳情。

「我哋會喺成個院舍裡面放唔同嘅寶藏，記事簿上面嘅提示就係寶藏收藏嘅地方。同學們就要同小朋友一齊搵到呢啲寶藏，集齊先後就要返嚟呢到交俾我，最快嘅一組當然有禮物啦，而最慢果組就會有小懲罰㗎啦！」

我哋由一個大組再拆分做兩個細組，各自帶住兩個小朋友。唔知有心定無意，洛賓第一時間話同子晴一組。

「喂，你搵嘢叻唔叻㗎？」阿南問我。

「唔叻。」我好敷衍咁講。





「咁你就跟住我啦！」

「點解？」

「我哋要贏啊！」佢戰意十足咁講，我心諗，洗唔洗咁認真，我原本諗住慢慢搵，唔做最後就得。​​​​​​​

活動一開始，聰聰就一支箭跑走，我同阿南叫都叫佢唔住。