別人名字，我的姓氏(上集): 26. 化身大家姐

偷錶風波完結，我地陸續返上課室
 
當我一踏入課室果時，全班同學都不約而同咁起身一齊叫
 
「小敏姐!!」
 
再黎個90度鞠躬，而我立即俾佢地呢個動作嚇到心都離一離
 
「嘩嘩嘩!!!妳地搞咩呀?唔洗咁叫我呀?」
 




「以後要拜託妳照顧啦!!!!」
 
我都估到佢地諗咩架啦
 
「先旨聲明…媽咪同姑姐出嘅考試測驗卷，我唔知佢地放邊架」
 
「少少貼士都冇?」
 
「邊會有丫」
 




「不過呢…我地幫妳起左新名啦」
 
「咩名呀?」
 
「大白鯊係妳姑姐，所以妳就係虎鯊!!!」
 
由果日開始，我就成為左一條虎鯊
 
自從我同媽咪關係曝光後，我唔洗再係西營盤站等巴士返學
 




每日我都會跟住媽咪坐爸爸部車返學校
 
舒服左好多
 
不過舒服嘅背後，一定會付出代價
 
媽咪係屬於早返學校果類人黎，而我為左跟車，所以我都被迫早起身
 
「呀…放過我啦好唔好呀?」我仍然好迷迷糊糊咁講
 
「妳而家跟得車就預左早起身啦，邊個叫妳尋晚咁夜都唔瞓呢?」
 
「咁我要溫書架嘛」
 
「妳尋晚係用電腦喎」




 
「咁都要正常社交架嘛」
 
「做咩呀?妳上網識男仔呀?」媽咪好緊張咁問
 
點解次次d家長聽到子女上網有社交，都一定係認識異性呢?
 
就算係，青春期嘅青少年想認識異性係好正常咋
 
「唔係呀，男仔咁麻煩，屋企都已經有兩件啦，仲出去識男仔，嫌唔夠煩咩?」
 
「嘩!乜妳咁話妳兩個細佬架」
 
「咁佢地真係煩丫嘛」
 




爸爸部車返到學校，我先去買早餐返上課室食
 
係冇人同我爭奪之下，我好快買到燒賣加腸粉
 
腸粉狂落甜醬辣醬花生醬，起勢咁落
 
結果小食部阿姐都忍唔住笑我
 
「小敏呀，妳真係好似姑姐」
 
「點解呀?」
 
「佢同妳一樣，又係起勢咁落醬，每次都係」
 
我諗一諗，係喎，呢個食法係姑姐教我架喎




 
仲有食臭豆腐都係
 
我拎住袋腸粉同檸檬茶返到課室
 
起勢咁食
 
喂，早起身好辛苦架
 
而且臨近學界比賽，練波次數都增加左，所以我都要食多d野黎補充體力
 
我地由之前一星期練一次波，變成隔日練波，所以，大家嘅食量都增加左唔少
 
我地除左要練習球技之外，仲有體能訓練
 




真係少D都唔得
 
跑圈已經係最最最基本嘅練習
 
再加埋要拉筋同跳繩，目的係增加身體嘅柔軟度
 
拉筋真係好鬼痛
 
終於，係兩星期後，我迎來第一次係學界上陣比賽