別人名字，我的姓氏(上集): 17. 大白鯊登場

我地幾個去到我屋企，除低鞋後，佢地兩個乖乖坐低

Annabelle好乖咁食藥

我換完衫後，我地三個就一齊做功課

「呀...Jasmine呀…..妳真係….」

「係呀，Miss Lam係我媽咪」





「哦….妳細佬呢?」

「大果個應該係房做哂功課係到整模型，細果個都做好功課，應該瞓緊覺」

「其實…..會唔會麻煩到Miss Lam呀?」

「呵，妳地都算麻煩咩?咁一陣黎果個叫咩呀?」

「一陣黎果個?」





叮噹，一講曹操，曹操就到

「呵，我姑姐黎啦，妳地唔好嚇親呀」

一打開門，慧思一馬當先衝去浩翹間房，飛上床瞓覺

「姑姐」

「妳有同學黎左呀?」





「係呀 ，唔舒服，去完公公到睇醫生，俾媽咪捉上黎食飯」

「呵，佢地有冇嚇親呀?」

「都唔夠見到妳咁驚呀?」

係客廳嘅Katherine同Annabelle應該仲未知咩事，直到我同姑姐行去佢地面前

「兩位，我姑姐，大白鯊」

姑姐成個人企係佢地面前，嚇到佢地兩個唔識講野

同埋，佢地兩個拆左條辮

「Miss…Miss Cheung…..」





「妳地條辮呢?」

「係…係…..」

「得啦，我今次放過妳地」

「知道….」

「唔洗驚喎，校長唔會上黎」

係廚房嘅媽咪，好快就整好D野出廳，果時我地已經做哂功課

「Annabelle，Katherine，妳地過一過黎丫」





「係…」「係…」

姑姐睇緊佢地兩個嘅File，然後開聲

「Annabelle妳爸爸係工程師，媽媽係做會計….唔…所以佢地成日都好夜先返屋企?」

Annabelle點一點頭

「Katherine妳爸爸係大狀，媽媽係貿易公司做經理，所以又係經常唔係屋企?」

Katherine都點一點頭

「之後妳地就每日買外賣返屋企食同帶飯，病左都唔識自己睇醫生?」

「呀…係…」





「妳地點解唔同Miss Chan講?」媽咪開口問佢地

「其實…呢d小事…..」Katherine好細聲講

「呢d都叫做係小事咩??」姑姐開始咬人啦

「係…」

「咁樣好大問題，如果唔係小敏帶妳地去睇醫生，我都唔知妳地咁樣，唔…聽日放學妳地兩個去見校長」

「校…校長?唔洗咁嚴重呀?」

「咩呀?妳地驚校長食左妳地呀?」





「唔係唔係」

「妳地放心啦，婆婆冇姑姐咁野蠻嘅」我係佢地身後講

「衰女，咩野蠻呀!?」

「妳係丫嘛，上次無啦啦搶左我本漫畫去睇呀」

「學校唔俾帶公仔書返去架嘛」

「呵，妳講緊妳呀?」

「喂喂喂，唔好咁串喎」

「咁串係妳教架~」

我同姑姐妳一句我一句之下

「放心啦，呢D小事黎者，佢地兩個詩敏就係咁溝通架啦」

「不過Miss Lam…妳唔頭痛架?」

「已經慣哂，妳地兩個記住，小敏係我個女呢件事，唔可以俾其他同學知道」

「明白!!」

「如果走漏風聲，會好大問題」

「放心!!我地一定唔會講出去」

「我知妳地乖，一陣拎飯盒出黎，聽日帶返學校食啦」

「但係Miss Lam…咁樣….」

「好過妳地成日食味精野嘛」

係大家笑緊果陣，慧思中下中下咁行出黎

佢去廁所，然後走返去浩翹間房到繼續瞓

「果個妹妹…好得意」

「當然得意啦，我個女喎」

「估唔到小鯊魚係咁可愛嘅」

「咩叫估唔到呀?我好惡咩??」

「係」然後我極速返入房