別人名字，我的姓氏(上集): 11. 被欽點嘅隊員

「邊個係程詩敏?」佢真係幾唔客氣下
 
既然係咁，我都冇需要同妳客氣咁啦
 
我好快咁企起身，揈一揈個頭，扮返姑姐最講道理個樣出黎(我覺得係歪理多D)
 
「我就係」果下可以真係好似姑姐，排球隊一眾大姐姐都呆左一下
 
「咁似大白鯊嘅?」我亦聽到有人細細聲講
 




隊長Isabella望一望我，好似有d唔滿意咁，唔鋸呀?打我丫
 
「請問有咩事呢?」
 
Isabella眼光有d不屑「我黎睇下點解Miss LUNG會揀個冇參加過選拔而直接俾佢入隊嘅同學係點」
 
我身後嘅同學呆左唔識俾反應，睇黎佢地都唔太相信呢個係事實
 
佢上下打量我「身型唔錯」
 




如果佢話我肥，我實扔佢落街
 
「星期五，到時見啦」
 
講完，佢地一班排球隊姐姐就轉身離開
 
咁樣我算唔算係樹敵呀?
 
坐返埋位後，Annabelle好似立即諗到d野
 




「Jasmine呀，上次小龍女真係搵妳加入排球隊呀?」
 
我嘆一嘆氣「係啦，有d麻煩」
 
「但係小龍女親自叫妳入隊，就證明妳有實力啦」
 
「妳地唔明架啦」
 
「點解妳一直好似唔想入排球隊或者其他課外活動咁嘅?」
 
「係囉，妳咪話過妳屋企又唔係迫妳讀書果類，做學生除左讀書，都應該有其他活動架嘛」
 
聽到其他同學咁講，我自己都諗一諗
 
「可能係我唔鍾意咁出位掛」




 
「下?呢D唔關出唔出位事呀?」
 
「咁…我放學都有野做，要湊細佬…未必有時間…」
 
「細佬呢家野，好易者，妳同妳媽咪講，入左校隊有著數」
 
我諗妳地見到我媽咪果時就唔會咁講
 
如果我冇估錯，應該係婆婆指明小龍女，要不惜一切送我入排球隊
 
如果俾人知道我同學校關係，一定會俾人閒言閒語
 
我最唔想就係咁樣，我一直都唔明白，婆婆對兩個細佬、孖女表妹同埋慧思都好仁慈
 




慧思係佢親孫女，所以正常
 
但係佢對我地幾個嘅態度真係有天淵之別
 
婆婆對我係最嚴厲，每一次我做錯決定，媽咪教我唔住，就一定會搵婆婆出黎
 
果時連爸爸都救我唔到
 
婆婆對我果種嚴厲，有時連姑姐見到都驚
 
我成績差少少，婆婆都唔會鬧，反而係我闖禍之後，婆婆先教得我最嚴
 
如今我係冇參加選拔下直接入左排球隊，除左婆婆之外，冇第二個人有咁大權力可以咁做
 
晚飯時候，媽咪都應該知道左發生咩事，於是佢開口問我




 
「小敏妳打算點?」
 
「咩點呀?」
 
「排球隊嘅事」
 
「咁係唔係婆婆一口叫小龍女俾我入隊丫」
 
「咁係Miss LUNG見過妳打波，婆婆問起排球隊嘅事先嘅」
 
「咁婆婆都決定左啦，妳可以反對咩?」
 
「用老師身份就唔得，用家長身份就可以。如果妳唔想打波，我幫妳同婆婆講囉」
 




「算啦，唔好要妳難做，咪當對少D呢兩隻野囉」
 
「家姐妳唔係屋企，我都不知覺得幾靜呀」
 
「家陣我係到阻住你咩?」
 
「幾啦，妳又唔係唔知自己幾麻煩架啦」
 
然後，屋企就傳出浩揚俾我追打嘅慘叫聲