別人名字，我的姓氏(上集): 4. 逃避責任

開學第一日。不外乎派通告簽通告之類
 
我係中學暫時仲未識到朋友，所以一放學時，我就趕去接兩個細佬放學
 
到左黃昏，媽咪接我地三個返再煮飯
 
係食飯時，媽咪就開始煩我
 
「小敏，今日Miss CHAN搵妳做班長妳拒絕左?」
 




「係呀，點解要做呀」
 
媽咪聽到我咁答佢，好驚訝
 
「但係…」
 
「我搵唔到有咩理由要我做班長喎」
 
媽咪繼續向我訓話
 




「妳咁樣咁自我中心邊得架!!!」
 
「有咩唔得」
 
「妳….喂!!!你話下個女啦!!!」媽咪見講我唔掂，於是佢要爸爸代為教訓我
 
話明係爸爸，佢點會忍心佢上世情人俾人鬧
 
「個女唔想做，妳咪由得佢囉」
 




「佢咁自我中心點得架?」
 
「有咩唔得呢?」
 
「就係你寵到個女咁架，你同我去洗碗呀!!!!」
 
爸爸已經係唔知第幾次為左保護我，而俾媽咪罰去洗碗。食完飯，我返到自己房時，浩揚又走入黎
 
「咩事入侵我領土呀你!?」
 
「有D野想問者」
 
「班上有靚女，胸唔太大，得未?」
 
「得啦，拜拜」




 
我呢個細佬，唔知咩原因，佢好鍾意女仔著長衫
 
一名死變態仔，我有預感佢會好似爸爸咁樣，追個讀英華嘅女仔返黎
 
到時媽咪實頭痛
 
細果個呢?佢經常都係痴到姑姐個女實一實，好彩佢地唔同學校
 
姑姐個女讀大坑真光幼稚園，睇黎佢都應該會返真光小學
 
細細佬就讀聖類斯幼稚園，亦應該會升返聖類斯小學
 
兩個真係堅慘，一個幼稚園開始就讀女校，另一個就男校
 




好在本小姐小學果時係男女校
 
男人真係冇一個係好人，除左我屋企人之外
 
我細細個就經常俾男同學蝦，如果唔係我郁手教訓佢地，我都唔知仲會俾人蝦幾耐
 
第二日又一早返學，今日有開學禮
 
我地成班俾班主任帶到去禮堂，聽校長婆婆嘅訓詞，另加姑姐嘅訓詞
 
真係好悶好眼瞓
 
終於第三日，正式上堂啦
 
不過呢….D Miss講野真係好悶下




 
令我不其然瞓左著
 
係睡夢間，我feel到不斷有人叫我
 
「Jasmine…. Jasmine….程詩敏!!!」
 
突如其來嘅喝聲令我彈左起身
 
「係!!!」
 
「做咩上堂瞓覺!!!第二堂咋喎」
 
「眼瞓囉」
 




「眼瞓就返屋企瞓飽佢!!!」
 
「哦」
 
哦完一聲之後我又坐返低，直到落左堂之後我再去洗手間洗面
 
果時班上已經有人竊竊私語「咁大膽嘅…第一日上堂就瞓…」
 
但係我都冇理佢地，洗左個面精神好多坐低等IS堂嘅來臨
 
相對於語文科目，我對科學更加有興趣
 
不過到而家F.1，我都未諗過自己嘅將來
 
至少呢一刻未
 
我試過問爸爸，佢F.1時有咩志願。不過姑媽同我講過，爸爸F.1-2果兩年，係去左一間band 5尾(以前5個band年代)嘅中學讀書。
 
果時爸爸日日都同人打架，經常上警署，令到麻麻好擔心，要知道爺爺已經係爸爸9歲時過左身(唔係爺爺係9歲時過身)，去到爸爸14歲果時，麻麻過身後佢至生性轉校讀書
 
而媽咪呢?佢小學時已經係全級第一，然後中學黎到英華女校讀書
 
佢地兩個一個天一個地，都唔知媽咪會鍾意爸爸d乜
 
既然係科學堂，我就好好地聽書啦