別人名字，我的姓氏(上集): 3. 第一日的中學

9月1 日，全香港開學嘅日子
 
我係自己房中，著起屬於我自己嘅新校服，一套藍色長衫校服
 
點解我有自己房?因為幾年前，爸爸發現佢同姑媽以前住果兩間屋唔夠俾我地一家五口住
 
所以佢就買間新屋，我地三姊弟一人一間房，仲要有會所俾我地搗亂
 
扎好雙辮後，我行出房門果時，已經見到我讀五年級嘅細佬，浩揚Ethan企係到等我
 




「你企係到做乜呀?」
 
「望妳囉」
 
「有咩好望呀?」
 
「估唔到家姐妳著起套長衫果時，係咁靚女架喎」
 
「我靚女就出哂名嘅，你換好校服就快d食早餐，爸爸開車送我地返學」
 




「家姐妳都坐爸爸車呀?」
 
「係附近落車再行返去，費事俾人知咁多野」
 
「怕咩喎」浩揚邊食早餐邊講
 
「始終都唔好呀」
 
「不過家姐妳冇小學同學去英華咩?」
 




「隔離班有d囉，做咩呀?」
 
「咁佢地唔會爆響口咩?」
 
「咁我同佢地唔熟嘛，做咩呀?」
 
「冇呀，妳怕嘅話，妳俾錢我，我幫妳做低佢地囉」
 
「算數啦你」
 
我呢個細佬，由細到大都已經好識搵錢，佢真係好有做生意嘅天份
 
爸爸車住我地同媽咪一齊返學
 
首先落車嘅係浩揚浩翹兩個，浩揚佢落車時不忘潤下我




 
「睇路呀家姐!!」係我隻鞋未飛到佢塊面之前，佢自己跑左入學校
 
「屎袋belt!!!!」(客家話)
 
「拜拜家姐」浩翹笑笑口咁同我講拜拜
 
「拜拜浩翹」都係呢個細佬乖D，不枉我咁錫佢
 
然後爸爸將部車渣到西營盤站，我打開車門落車
 
企係巴士站到等巴士，搭兩個站就到
 
巴士站有好多同我一樣著長衫嘅學生，包括我地學校同聖士提反嘅同學
 




上左巴士後，我都唔打算坐，因為好快就會落車
 
到左我地學校嘅站，我跟住一大班同學落車
 
一去到門口，就已經見到佢企係到
 
校長婆婆嘅獨生女，英華女校嘅訓導主任
 
大白鯊張詩敏
 
佢撓實雙手好有氣勢咁企係到佢嘅眼神非常銳利，每一個入校門前嘅同學都要俾佢檢視一番
 
「Miss Cheung早晨…」「Miss Cheung早晨…」
 
輪到我入校門時，我都講左一句後，就走去我班房




 
媽咪話過，我係1D班而佢係呢六年就一定唔會教我
 
入到黎冇分精英班，因為入得英華女校，成績一定唔差
 
去到1D班，已經有幾個同學返到
 
而我就揀左窗邊一個位坐低，靜靜地望住外邊
 
好快，其他同學都陸陸續續咁黎到班房坐好
 
班主任係Miss CHAN，佢教我地班英文
 
第一日，一定係選班長
 




「請問有冇同學自願做班長?」
 
冇人肯舉手
 
結果Miss CHAN都係要係名單中揀人
 
結果，第一個就叫我個名
 
「程詩敏…Jasmine」
 
「係」我冇咩中氣咁回答
 
「如果搵妳做班長有冇問題?」
 
當然有問題啦，我真係唔太想幫其他人做野，所以我就回覆左一句
 
「有，唔想」
 
班主任俾我咁樣拒絕法，佢都呆一呆
 
「Miss CHAN，我屋企仲有兩個細佬要我湊，我真係抽唔到時間呢」
 
「咁樣呀…」班主任好似想說服我咁
 
「妳可以問下我媽咪嘅」
 
「唔…咁好啦…」然後Miss CHAN再抽過其他同學
 
要我做班長?冇可能