沙頭角與長洲的距離(重修版): 八十八.

「喺Club返工咋嘛，有幾出奇？」佢拍咗下我膊頭：「行啦，嘥曬啲時間。」

咁你又冇錯嘅，都係打份工啫。

「行啦咁。」我望咗望錶：「嗱嗱臨搞掂佢。」

我慣咗少瞓，唔係唔瞓。

//





「啊聲！」佢向住門口著曬西裝、Gel曬頭嘅靚仔打招呼：「好耐冇見喇。」

靚仔過嚟同佢輕輕攬咗嘢，之後就例牌式寒喧咗陣。

「話時話你個Friend呢？」佢伸咗個懶腰。

邊個啊？

「你講緊邊個啊？」啊恩笑咗聲：「我有好多Friend架喎。」





係囉，所以係邊個啫？

「屌你講呢啲。」啊聲撞咗撞佢：「咪啊晴囉，佢以前成撚日落嚟架嘛。」

我一早知但唔信，不過而家都唔到我唔信。

「佢落嚟飲酒咋嘛，講到人咁衰架。」佢指住啊聲個褲袋：「罰你請我食煙！」

咁你又冇錯，Club都算係酒吧。





「講閪咩，佢次次都一個入兩個出架。」佢抆包煙出嚟：「拎去啦，成日食煙又唔買。」

喂，呢個又係咩料？

啊恩拎咗技就遞咗包煙比我，我拎咗枝就還返比啊聲。

啊聲拎個Zippo火機出嚟點曬三枝煙，之後就玩咗幾個花式先收返埋。

「我出嚟先食就費事買啦。」啊恩呼出煙圈：「搲你一兩枝啫，唔係咁都介意啊嘛？」

嗱，咁我就唔同意喇。

「小數怕長計啊。」我成啖煙直吹落佢塊面到：「一日一枝，三蚊一枝，一個月就九十蚊，一年就成千蚊架喇。」

一年一張金牛，過多幾年財富自由都仲得啊。





「你咁又唔啱啦，吹到我成塊面都係煙味。」佢還返大大啖比我：「做人唔可以咁小氣架嘛。」

咁又係嘅，男人咁小家唔多掂。

「話時話呢個你條仔嚟架？」啊聲問：「點叫你啊師兄？」

喂，好撚大誤會啊呢單嘢。

「叫我啊武得喇。」我遠離啊恩兩步：「不過我係啊晴條仔。」

啊聲聽到就瞬間爆笑，而啊恩就好有禮貌咁忍住。

「上次聽到有人自認係佢條仔已經係56K上網時代嘅事。」啊聲笑到拍曬心口：「除咗戇鳩應該都冇咩形容到你。」





喂，串咗少少喎老細。

「我有溝佢架，不過佢唔受咋嘛。」佢向啊聲打咗個眼色：「我好過啊晴好多啦吓嘛？」

呢個我唔知啦，唔係好熟你。

「呢啲梗架啦。」啊聲淫笑：「咁喎。」

呢個我認同，係正嘅。

我好有禮貌咁微笑回應：「咁但係唔可以咁架嘛。」

我唔係見到靚女就上架。

「係咩？你哋應該下個禮拜六就分。」啊聲彈走煙頭：「做嘢先。」





我都覺…等陣先。

你點解咁肯定係下個禮拜六？

我想追問，但佢已經行咗入去。