沙頭角與長洲的距離(重修版): 四十八.

「可能係佢之前畫咗啲，但今日先畫埋淨低嗰啲。」

我幫佢解釋緊，都幫自己搵緊解釋。

「成張畫紙一早就填到滿曬，你話呢？」

咁又好似係，但可能有啲我唔明嘅技巧，例如…

「會唔會有啲咩技巧係我哋唔識或者係佢自創？」





咁你哋啲藝術家好有個人風格架嘛，我點知啫？

「我識咗佢都幾耐下，佢不嬲都係一日畫曬，一日畫唔曬就之後嗰幾日搞掂埋佢。」

咁人係會變架嘛，你細個鍾意E-Kids，而家都變咗鍾意Mirror啦。

「佢變咗你無為意啫。」

講真，你點會得閒到日日走去留意佢？





「我日日都落鋪頭搵佢，你話我會唔會唔為意啊嗱？」

但佢咁講又真，日日見又點會唔知？

「好似係，但如果佢真係呃我，咁會係為咗啲咩？」

或者…佢有驚喜比我？

「到底你係咪戇鳩？」





咁…唔係下下都出軌啩？

「一張重複嘅畫就斷定佢出面有第二個，會唔會太求其？」

而家連咸片都有得假，幅畫係假都唔奇。

「喂大佬啊，我呃你做咩啫？」

我點知你有冇對我有非分之想啫？話曬你上次…

都係唔講好啲，諗起都痛。

「冇啊，搵嘢玩啩。」

咁當然，我唔會咁講，話曬成年人嚟架嘛。





「屌你啊！我悶可以打機、睇片，洗鬼走嚟玩你個死人頭？」

聽完佢咁講，我又好似真係幾自戀。

「Sorry囉，但By the way如果係真嘅話，佢點解要呃我？」

既然證人確認咗係可信，係時候回歸正題。

「咪搵其他仔囉，仲洗審咩？」

唔排除呢個可能性，但…

「但個樣唔似係呢種人喎，同埋我哋都搞過。」





嘢唔係淨係同心愛嘅人搞嘅咩？

「就係因為佢咁嘅樣，先講得通。」

「搞嘢方面就…乜你覺得搞嘢一定要有愛架咩？」