沙頭角與長洲的距離(重修版): 四十七.

落樓下上咗的士之後，我就即刻同啊晴報到。

「我送咗佢上酒店喇。」

「哦，好。」

「佢嘔到我成身都係，同埋佢都應該知趕唔到尾班船。」

「你而家返緊去？」





「係啊，上咗的士喇。」

「咁你返到去講聲啦。」

係喎，我一路都唔知佢今日突然有咩搞。

「你今日話突然有嘢搞，有客？」

咁係人都鍾意錢架啦，返工重要啲。





「係啊，做咩？」

「冇啊，想睇下你整咗啲咩。」

「好啊。」

講完，佢就Send咗張相過嚟。

相裡面嘅係一幅畫，但感覺好熟悉，但我唔肯定係咪真係見過。





我睇咗睇錶：「咁你早啲瞓啦，都夜喇。」

「早唞。」

「早唞。」

我閂咗Mon諗住收埋嘅時候，佢又響咗嘢。

我以為係啊晴，但原來係啊恩。

「喂。」

「你唔係瞓咗喇咩？」

「你咪理啦。」





「Ok fine。」

「啊晴有冇搵你？」

「有啊，做咩？」

「佢有冇同你講今日做咩突然唔嚟？」

「有啊，佢話有客搵佢，之後走咗去畫畫。」

「有冇相？」

「有啊。」





講完，我就將啊晴頭先Send比我張相Send比佢。

「…」

「有咩問題？」

「你唔認得呢幅畫？」

老老豆豆，你話我無禮貌、無文化都好，其實我覺只要係同一個人畫，基本上幅幅都差唔多樣。

「唔認得架。」

「傻仔，佢講你就信啊？」

「信架，你估TVB啲膠劇咩？」





「咁對唔住，真係同TVB啲膠劇一樣。」

「你又想講咩啊？」

「幅畫唔係今日畫，佢喺到好耐。」

「你今日真係全面老屈架喎。」

「等我一陣。」

講完，佢就Send咗張電話相簿嘅Cap圖過嚟。

一堆格仔之中有一格就係頭先佢Send比我嗰幅畫嘅相，但上面個日期…





唔係今日。