[中六續集][愛情][懸疑？]擁抱，失憶(重修版): 八十七.

佢過嚟拍咗拍我膊頭：「你冇事啊嘛？」

擺到明就好撚有事啦。

我捉住佢隻手：「可唔可以扶我埋一邊？」

唔好對住我以前坐個位應該好會好啲。

「梗係得啦。」佢秤住我：「去坐低唞下先？」





是但啦。

我深呼吸：「嗯。」

佢諗住扶我入去我以前中六嘅班房，我即刻用所剩無幾嘅力拉住佢。

佢耷低頭：「做咩啊？」

人都死幾個啊大佬。





我苦笑：「過隔離啦，呢邊太多回憶。」

諗起會痛嗰隻。

「你條友真係。」佢拍咗下我：「咁鬼好記性嘅。」

唔係我好記性。

「佢難忘啫。」我嘆氣：「中學生涯最後一年喎大佬。」





然而事實係…因為中六有啊晴。

只要有啊晴就記得。

佢扶我去隔離課室坐低：「你仲行唔行啊？」

一坐低就咩事都冇，應該係見到個班房就出事。

我想架。

我嘆氣：「唔喇，唔舒服。」

可惜事實係唔得。

既然都睇唔到，留喺到都冇意思。





「你自己慢慢落去？」佢微笑：「我仲有嘢要搞。」

可以。

我起身：「咁我走先喇。」

我行出校門之後就嚟到天橋邊嘅垃圾桶隔離，遠處仲有個咬住煙仔嘅女仔望住我。

佢著住黑色T-Shirt、白色短裙，仲有對中筒Converse。

佢戴住文青眼鏡個樣都唔差，但感覺好撚MK。

可能唔關衣著事，係佢個氣場問題。





我點煙：「嘥撚曬。」

咁靚女食煙不突止，仲要有MK氣場。

佢見到我點煙就行咗埋嚟，我下意識退後幾步。

「唔洗啊嘛？」佢拎住枝煙：「想借個火機啫。」

無計，你氣場嚇親我。

我苦笑：「早講啊嘛。」

佢咬住枝煙，而我就幫佢點火。

「唔該。」佢拍咗拍我手背：「我叫啊水。」





做咩啫你？

「借個火機咋喎。」我冷笑：「而家同你過人世咩？」

唔洗自我介紹架喎。

「人生嘅嘢…」佢微笑：「總會有機會再見。」