[中六續集][愛情][懸疑？]擁抱，失憶(重修版): 八十四.

「琴日見完佢，今日就出事。」我嘆氣：「應該都去咗九成。」

但…

「點解係唔記得佢，而唔係唔記得我？」啊晴笑咗聲：「奇鳩怪架喎。」

我都係咁諗。

「唔記得佢對我一啲影響都冇架喎。」我苦笑：「你有冇咩諗法？」





但正常人係唔會嘥時間做啲無意義嘅嘢。

「暫時冇。」佢嘆氣：「我返工啊，一間再講。」

收到你。

「咁你諗到咩就再同我講啦。」我收線。

我睇埋封信，之後就開始翻睇電話相簿。





//

要睇嘅都睇曬，係時候做返正經嘢。

「好攰啊。」我睇一睇錶：「原來已經咁晏架喇。」

落去食個飯再講啦。

「工欲善其事，必先利其器。」





//

我離開魚蛋粉鋪，點煙嗰陣睄到一個熟悉嘅身影。

我行過去：「點解你喺到嘅？」

係搵我抄嘢個伯伯。

佢坐喺石壆上面擔住個煙斗，但啲煙草仲未點著。

佢笑得好慈祥：「點解我唔可以喺到？」

咁又係，人係流動架嘛。

「咁你過嚟做咩啊？」我遞個火機比佢：「你未點火。」





既然都撞到，咁就一齊食啦。

佢拎走個火機之後就諗住點火，點知就手震到點極都點唔著。

我拎返個火機：「我幫你啦。」

手騰腳震咁，點搞啊？

「唔該。」佢苦笑住咁拍咗拍我隻手：「老喇，好多嘢都搞唔掂。」

你老都唔係第一日嘅事啦。

「你識我嗰陣已經白曬頭啦。」我嘆氣：「呢啲嘢避唔到架。」





生老病死呢啲，邊個都走唔甩。

「咁又係，睇幾時到架啫。」佢苦笑：「最好快啲死。」

做咩咁厭世啊？

「點解啊？」我拍咗拍佢膊頭：「你哋老一輩唔係鍾意長命百歲架咩？」

我啊媽成日都話長命係福氣嚟。

「開開心心咁長命就話有福氣啫。」佢嘆氣：「身邊啲親人死曬，間屋得返四面牆。」

吓。

「你冇朋友架咩？」我嘆氣：「雖然我都冇咩朋友。」





諗諗下先發現。

「呢個世界上最可怕嘅嘢，係寂寞。」佢拍咗拍身邊：「坐低啦，我係嚟搵你架。」

都估到架喇。