[中六續集][愛情][懸疑？]擁抱，失憶(重修版): 七十一.

「兩位啊唔該。」我同啊姨講。

快快手啦唔該。

「你哋好彩啊，咁啱好有位。」啊姨答我。

佢講完就行咗入去，而我哋就跟住佢。

//





入去之後我有一句嘢好想講…

「你肯定呢個叫做咁啱好有位？」

你個場連烏蠅都冇隻，空到直頭可以拎去打War Game喎大佬。

不過個場空都唔代表啲嘢難食嘅，話唔定係隱世鋪頭呢？

人與人之間係應該要有信任架，比次機會佢啦。





//

雖然去食放題通常都應該要食下刺身同壽司，但特別嘅鋪頭應該要有特別嘅對待。

我哋暫時淨係嗌咗兩個湯烏冬，話曬一間仲有行程。

//

我懷疑呢間鋪嚴重人手不足，因為真係等到蚊都瞓。





等到我哋差唔多瞓著嘅時候…

「兩個湯烏冬。」啊姨將兩碗冚咗蓋嘅湯烏冬擺上枱。

又係你嘅？

加埋呢個製作速度，廚師應該都係佢。

我絕對欣賞啊姨你呢個一腳踢嘅精神，但如果我一間肚痾嘅話都係會投訴你。

//

我開蓋：「你嗰碗咩樣架？」

一定係出咗啲意外啫。





啊晴開蓋：「一樣。」

呢間其實係提倡健康飲食嘅鋪頭，唔接受任何反駁。

湯烏冬全名係清湯烏冬，而清湯講緊嘅係雞湯之類嘅嘢。

我相信大家都係咁樣理解，但睇嚟廚師有唔同嘅睇法。

佢個湯係清到冇味嗰隻，因為佢係…

清水嚟架仆街！

「都好合理啫。」啊晴同飲咗啖湯。





咁合理咩？

「願聞其詳。」我食咗條烏冬。

無味，但至少食得。

「清水咪夠曬清囉。」佢苦笑。

你咁講…

「都冇錯嘅。」

現代人餐餐都味精，一餐冇味精都唔係好過份啫。

健康啲就可以慳返啲醫藥費，到時咪藥箱都變手飾箱。





佢比咗個讚我：「正能量啊。」