[中六續集][愛情][懸疑？]擁抱，失憶(重修版): 七十.

我周圍行嚟行去，好快就嚟到八點。

//

「傻佬！」啊晴衝向我。

我擘大雙手，之後就同佢攬埋一舊。

「我哋去食嘢先？」我問佢。





我估你都餓架喇。

「好啊，我要食譚仔！」佢喺到揈我隻手。

唔係咁好嘅，話曬一間單嘢咁重要。

「去鋸扒好冇啊？」我諗咗陣：「定係你有嘢想食？」

食貴啲啦，搞好個氣氛佢。





「做咩無啦啦食咁貴啊？」佢上下來回咁掃視我：「今日咩日子？」

我先唔會同你講。

「冇特別架，想食咪食囉。」

先冇咁易比你Chok到。

「唔通你…」佢皺曬眉咁望住住：「做咗虧心事？」





我呢啲擔屎唔偷食嘅人會做啲咩虧心事？

「冇啊。」我輕輕敲咗佢額頭一下：「食懵你啊傻婆？」

咁諗我嘅，抵打。

「喂呀！」佢扁嘴：「呢餐就食到你破產。」

無任歡迎，睇你爆肚先定我破產先。

//

「唔排得喇。」櫃台姐姐答啊晴。

連排都唔排得。





「唔該曬。」啊晴微笑點頭。

雖然佢微笑緊，但都只不過係因為禮貌。

//

我千算萬算，都係算漏咗樣嘢。

今日星期日，唔Book位根本連屎都冇得食。

//

我哋行下行下就嚟到兆萬，而啊晴竟然…





「不如上去睇下？」佢問我。

唔係啊？

我吞咗啖口水：「你認真架？」

會唔會無命出嚟架？

「我認真架，其他都冇位。」

對唔住。

我耷低頭：「我下次會Book位架喇。」

搞到你連飯都冇得食。





「冇事啊。」佢摸咗摸我個頭：「行啦。」

//

「有放題喎。」佢停喺一間放題前面：「食呢間好唔好？」

放題本身就冇咩問題嘅，但喺兆萬食放題就…好似唔係咁好囉。

「你想食？」我問佢。

如果你想食嘅話就食啦。

「咁行啦。」佢趷高腳望入去：「有冇人啊？」





佢講完之後裡面就傳嚟腳步聲，之後一個啊姨就嚟到我哋面前。

「係咪食嘢啊？」啊姨問我哋。

嗌你出嚟唔通搵你傾計咩？