《我老婆唔係我女朋友》【那些年／九十年代學界／真人】 第七章全新中篇！: 【第八章】 小別勝新婚（６）
我失聲叫道：「無聊？！我日日做到隻狗噉呀。」
於是我又說了Lulu跟尾去了水上樂園，和買短裙時的奇遇。
「吓？Lulu著短裙？佢實走光喎。我哋中學時佢都要著條四個骨長排球褲打底，勁核突。」阿心失笑。
「哈…全中呀，試身已經走咗，好彩Leon幫佢擋住咋。」我講出對他們兩人的觀察，又說了士多每天開舗兩個鐘等等。
「你自己開舗咁叻？唔怪得阿爸話舗頭多咗錢啦。」她只表現得稍稍驚奇，似乎早估到是我。
「係呀，但我唔識攞貨囉。」
「你搵日過嚟我教你啦。」
「嘻嘻，我日日都嚟黐住妳。」
想不到她狡黠的笑了笑：「真好，教識你第日代我看舗，我可以喺後欄打麻雀或者瞓覺都得～」
「呀，我同Leon有個老朋友喺【山大】讀嘅，佢哋攪睇流星雨，想約埋一齊去呢，我都叫咗Lulu約Leon去。」想起要約她去睇星。
「你去我咪去囉，反正放假啫。流星雨我都未睇過，都想睇㗎。」女友欣然說好。
那晚談談、笑笑、咀嘴，不經不覺在公園坐了4小時，這是我們相識以來纏綿時間最長、次數最多的一次約會。
小別勝新婚是不是就是這種感覺呢？