《我老婆唔係我女朋友》【那些年／九十年代學界／真人】 第七章全新中篇！: 【第八章】 佛爺歸來（２）
「咁忙？仲想約妳下星期一齊去玩添，睇嚟都係唔預妳嚕。」從上次水上樂園的觀察得知，呢個Lulu超級爛玩，愈唔畀佢玩就愈心癢。
「吓？點呀，點呀，去邊呀？」果然一提起去玩，Lulu就無比精神了。
「無，下星期【山大】搞聯校燒烤順便睇流星雨，有個friend阿腸呢，上次我比賽時都有見過吓呢，佢話叫埋妳去喎。」阿腸真係有叫Lulu去的，只是當時以為佢是我女友。
Lulu有點茫然的微微點頭，似乎對誰人是阿腸有點模糊，但茫然的表情瞬間被興奮取代。「去呀去呀～星期幾呀？」
「下星期五13號，欵～但佢哋要求要二人同行呢，我同阿心去，妳如果去就差個伴喎。」我開始說出關鍵部份。
「哦？去玩都有啲咁嘅要求嘅？噉點呀～」她皺眉有點惆悵。
「嗱，上次Leon無啦啦俾我拉咗去水上樂園陪妳，不如今次妳陪佢啦？佢好似未約到人去。不過妳千祈唔好話我爆畀妳知喎，一陣佢小器話我講佢啲淤嘢，反正聯校活動妳都應該收到風嘅。」我小心翼翼，怕說得太白。
「呵～好呀，無所謂呀，你幫我約佢啦。」
「誒…唔得喎，最好妳親自打畀佢約佢了，順便唔該佢幫妳查廣告單嘢都好吖，一來我唔想俾佢知道我爆響口佢未約到人，二來聽日開始我會好唔得閒，因為有個大人物返嚟呢。」Lulu一向主攻，梗係要佢自己約Leon先合情合理嘛。
那知道高妹卻將重點放到別處。「邊個大人物返嚟呀？你又有表姐放暑假返香港咩？」
我自然無氣再跟她糾纏了。