《我老婆唔係我女朋友》【那些年／九十年代學界／真人】 第七章全新中篇！: 【第八章】 佛爺歸來（１）
佛 爺 歸 來
嘿，Leon你條粉皮十月介菜（嘿～才疏學淺，用嚟形容男生都應該可以啩），不過一場死黨，我當然不會踢爆了，確實見佢兩個又好夾，反正Lulu同總舵主嗰度又觸礁，Lulu又唔係差（好處剛才都俾人講晒了，無謂重覆呃字數），益自己兄弟總好過畀總舵主得米！
眼下不就有一個好機會嗎？一念及此，心中已有計較：「得喇得喇，唔好再提我發脾氣啲嘢好嘛，練水見到佢咪話佢知嗰單廣告嘢囉。係呢，你去唔去睇星呀，上次話有燒嘢食喎。」用上次發脾氣件事扯開話題，唔好再畀佢繼續發姣，避免我搭錯嘴露底，一陣佢知我識穿佢就斷欖了。
「仲諗緊呢，都未有時間再問阿腸單拖點安排，不如我黐埋你同老佛爺一齊咪得囉。」為勢所迫，Leon都有單身狗的煩惱了。
「哦，無所謂呀，一齊去玩仲好啦。」最緊要佢話去，如果唔係台戲就唱唔落去了。
那天晚上在泳池還是沒有見到Lulu，直到星期五晚才見她現身。
「阿Lu，Leon幫妳check過上次個廣告阿姐間公司，話無問題喎，睇妳有無興趣搵佢哋傾吓啦。」終於有機會向她傳遞訊息了。
「哎呀，呢個星期都好忙，上次咪話個表姐返咗嚟嘅，日日都要陪佢。啱先又要返學校搞註冊，遲啲先再搵佢啦，反正我又唔希罕呢啲兼職，暑假梗係放假嘛。」Lulu又一輪機關槍式掃射。
巴閉～我知妳唔等錢使。