《我老婆唔係我女朋友》【那些年／九十年代學界／真人】 第七章全新中篇！: 【第八章】 條粉皮係有啲嘢嘅（３）
「佢都唔係日日嚟嘅，我都就快俾佢激死，男人老狗成日俾佢叫姊妹。」我沒好氣的說。
「喂唔係呀，個高妹好信你㗎，唔知係咪老佛爺成日讚你呢。其實佢個人又簡單又鍾意笑，成日都笑容滿面。你諗吓，即使平日有幾忙、有幾攰，睇見佢就覺得輕鬆好多，好似俾佢嘅笑容治癒。」Leon一臉溫柔的想像著。
我非常的不以為然：「哦～係囉～」睇嚟又是一條毒隱，被高妹發自內心的陽光笑容融化咗。
喂，門小你有無俾隻大喇叭喺耳邊疲勞轟炸過㗎？
「你有無留意嗰日去水上樂園呢，爽朗又唔造作，無扭扭擰擰噉樣，又唔會嫌三嫌四、西口西面。嗯～真係幾討好。」Leon仍然活在他編織的夢中。
我繼續不以為然：「哦～係囉～」
明明係粗枝大葉嘅傻大姐啫，大癲大肺你又當係寶？
「喂仲有呀，你嗰日發脾氣，佢都忍住無吵吵鬧鬧，無傷大家感情，幾大方得體呀。你知唔知幾難搵到個女仔嘅言談舉止同待人處事，有咁大方得體呀。」Leon愈發七情上面。
我仍是不以為然：「哦～係囉。咦喂，等等先，我問過佢話唔覺我發脾氣喎，不過我都同佢講咗唔好意思。」我真心相信嗰件「蒸生瓜」係無知覺我曾經有發脾氣啫，根本佢就係個粗線條大神經嘅人。