《我老婆唔係我女朋友》【那些年／九十年代學界／真人】 第七章全新中篇！: 【第八章】 條粉皮係有啲嘢嘅（１）
條粉皮係有啲嘢嘅
星期三早上，Leon打來說今天會去九龍城，可以順便過來「交換禮物」，遂約他直接去士多，可以順便飲支汽水吹返陣。
巡完醫館返到士多開舗，稍事休息了20分鐘左右。Leon揪住一疊用繩扎住的Jump抹著汗的搵到來了。「喂老細，整支可樂飲吓先啦。」
「自便啦。」我近乎下意識的回應，唔使問又是慷女友之慨。
我在指示他自己打開「老古董」在裡面攞汽水的同時，找來一張木凳讓他坐在士多門口歇息。「喂喂，唔好用飲筒呀，抹乾淨成支隊好啲。」
Leon一臉狐疑的望望嗰捆飲筒，又望望我。
我續說：「係呀，無老點你㗎。」我想起成日有人中招，說時不禁陰陰笑起來。
「今日真係好熱呀，吁～」一口氣灌咗半支可樂的Leon，嘔了口氣後繼續說。「嗰疊Jump係你之前未睇㗎，睇完丢咗佢，唔好畀返我。」
隨手揭一下那疊週刊少年，其中有一本特別厚的，是93年五月出版的21／22期合併號（週刊少年ジャンプ93年21/22号，它們有時候在特別節日會將兩期合併一起發行），封面是戰情進入白熱化的《入樽》——【127話 打倒・牧】，湘北對海南大附去到最後階段，而《龍珠》是【四百二十話 未来に平和を…】，功力大進的杜拉格斯回到未來處理人造人和最後一隻斯路。
