《我老婆唔係我女朋友》【那些年／九十年代學界／真人】 第七章全新中篇！: 【第八章】 英國家書（３）
既然有人憑歌寄意，我也來個東施效顰好了。哎呀，日日都要開工，係咁上下抄得就抄啦。要憑歌寄意就梗係要有首歌先，反正未到晚飯時間，不如出旺角襯吓搵靈感吧（其實是找藉口躝街）。
在醫館門口坐小巴，不消廿分鐘，已經身在【信和】地庫了，四處逛逛、聽聽每家店的店主推介，又去街尾【鐳交所】睇吓碟評。嗯～聽來聽去又是張學友啲歌啱feel喎，仆你個街，又要交數畀烏蠅？！不了。
踱到【黑店】望吓日本碟時，咦喂？！唔係喎，張學友咪又係專揀改編歌先嚟紅？君不見有啲人宣佈以後唔唱改編歌之後，一兩張碟就收皮哩；我聽開日文歌嘛，整首日本歌做回禮，都算合情合理吖。
剛才睇碟評時，見到啱feel嗰隻歌嘅日文原版資料，一於喺【黑店】搵吓有無原曲先！因為資料唔多，要逐隻碟對名，當然又唔想「打擾」西面啦，花了十多分鐘最終都搵到嗰隻由日本組合【南方之星】在90年推出的《真夏の果実》，隻歌出咗幾個月就火速俾阿張生改編咗，並在91年1月唱到街知巷聞；《真夏の果実》這隻single當時的「火棒價」飆到250大洋（日本原價：税抜：900円 税込：930円），闔家祥～係27算呀！不過就算你有錢想買都買唔到，因為烏蠅隻改編實在太勁，連帶日本原曲都炒起埋，返貨返極都唔夠，所以當時根本無考慮過買這隻碟。
《真夏の果実》 南方之星, 1990
https://youtu.be/zkRbWCtKmfU