《我老婆唔係我女朋友》【那些年／九十年代學界／真人】 第七章全新中篇！: 【第八章】 睇星？！自殺咋啩～（１）
睇星？！自殺咋啩～
得知Lulu沒有介意我那天胡亂爆氣，總算稍微鬆了口氣，然後自然要八卦一下她的「世紀約會」了。「咦喂，噉你星期日同總舵主去街去成點呀？連續兩日都無嚟，等我又唔敢問妳。」
她罕有的露出少許悵然的神態：「唉～我都唔知呀。同師兄去咗睇戲，食埋下午茶，跟住就返屋企喇。」她扁著嘴有點不甘心的意味。
「吓，無下文嗱？你睇乜嘢戲呀，唔通悶親？」這結局確是有點出人意表，明明看似姣婆遇著脂粉客，我以為傻大姐應該會餓虎擒羊嘛。
「去咗睇《阿拉丁》囉。哎吔，師兄個人都唔出聲噉，有…有啲悶囉。」她吞吞吐吐的說著。
第一次約會去睇卡通片阿拉星都算正正常常了，我幾驚個傻婆癲到去睇《超級學校霸王》啲割凳片，我相信總舵主會詐肚痛即閃。
「喂大姐呀，佢唔講咪妳講囉，講嘢妳強項啦。」我堅信論口水係唔會有人夠Lulu多的。
「哎吔，我有呀，但佢啲反應仲差過你呀，我覺得同你哋去玩仲開心啲囉…」Lulu大呼冤枉。
「吓，咁大鑊？會唔會總舵主怕醜咋。」在我的認知和往績中，陳嘉樂應付女生肯定比我得體喎。
「嗯…所以我咪話唔知囉。」她若有所失的答道。
我見形勢好像不妙，倒不如扯開話題好了。「唏，去多幾次街，可能會漸入佳境呢，妳都未答我點解兩日都唔嚟練水喎。」